1. විභඞ්ගවාරො

හෙතුපච්චයො

210. චිත්තසමුට්ඨානො ධම්මො චිත්තසමුට්ඨානස්ස ධම්මස්ස හෙතුපච්චයෙන පච්චයො – චිත්තසමුට්ඨානා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

චිත්තසමුට්ඨානො ධම්මො නොචිත්තසමුට්ඨානස්ස ධම්මස්ස හෙතුපච්චයෙන පච්චයො – චිත්තසමුට්ඨානා හෙතූ චිත්තස්ස හෙතුපච්චයෙන පච්චයො; පටිසන්ධික්ඛණෙ චිත්තසමුට්ඨානා හෙතූ චිත්තස්ස කටත්තා ච රූපානං හෙතුපච්චයෙන පච්චයො. (2)

චිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස හෙතුපච්චයෙන පච්චයො – චිත්තසමුට්ඨානා හෙතූ සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

ආරම්මණපච්චයො

211. චිත්තසමුට්ඨානො ධම්මො චිත්තසමුට්ඨානස්ස ධම්මස්ස ආරම්මණපච්චයෙන පච්චයො – චිත්තසමුට්ඨානෙ ඛන්ධෙ ආරබ්භ චිත්තසමුට්ඨානා ඛන්ධා උප්පජ්ජන්ති. (මූලං කාතබ්බං) චිත්තසමුට්ඨානෙ ඛන්ධෙ ආරබ්භ චිත්තං උප්පජ්ජති. (මූලං කාතබ්බං) චිත්තසමුට්ඨානෙ ඛන්ධෙ ආරබ්භ චිත්තසමුට්ඨානා ඛන්ධා ච චිත්තඤ්ච උප්පජ්ජන්ති. (3)

212. නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං…පෙ… නිබ්බානං පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො; චක්ඛුං…පෙ… වත්ථුං නොචිත්තසමුට්ඨානෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති, තං ආරබ්භ චිත්තං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන නොචිත්තසමුට්ඨානචිත්තසමඞ්ගිස්ස චිත්තං ජානාති, ආකාසානඤ්චායතනං…පෙ… ආකිඤ්චඤ්ඤායතනං…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං…පෙ… නොචිත්තසමුට්ඨානා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස ආරම්මණපච්චයෙන පච්චයො – අරියා මග්ගා…පෙ… නිබ්බානං පච්චවෙක්ඛන්ති (පඨමගමනසදිසං); චක්ඛුං…පෙ… වත්ථුං නොචිත්තසමුට්ඨානෙ ඛන්ධෙ අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති…පෙ… රූපායතනං චක්ඛුවිඤ්ඤාණසහගතානං ඛන්ධානං…පෙ… ඵොට්ඨබ්බායතනං…පෙ… නොචිත්තසමුට්ඨානා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස ආරම්මණපච්චයෙන පච්චයො – අරියා මග්ගා…පෙ… නිබ්බානං පච්චවෙක්ඛන්ති (පඨමගමනසදිසං), නොචිත්තසමුට්ඨානෙ ඛන්ධෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… ඵොට්ඨබ්බායතනං…පෙ… නොචිත්තසමුට්ඨානා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (3)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස ආරම්මණපච්චයෙන පච්චයො… තීණි (ආරබ්භ කාතබ්බා).

අධිපතිපච්චයො

213. චිත්තසමුට්ඨානො ධම්මො චිත්තසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – චිත්තසමුට්ඨානෙ ඛන්ධෙ ගරුං කත්වා චිත්තසමුට්ඨානා ඛන්ධා උප්පජ්ජන්ති. සහජාතාධිපති – චිත්තසමුට්ඨානාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො (තීණිපි ආරම්මණාධිපති, සහජාතාධිපතිපි කාතබ්බා). (3)

නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති – අරියා මග්ගා…පෙ… නිබ්බානං ගරුං කත්වා…පෙ… නොචිත්තසමුට්ඨානෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා චිත්තං උප්පජ්ජති. (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා…පෙ… නිබ්බානං ගරුං කත්වා පච්චවෙක්ඛන්ති…පෙ… නොචිත්තසමුට්ඨානෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – නොචිත්තසමුට්ඨානාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස අධිපතිපච්චයෙන පච්චයො. ආරම්මණාධිපති – අරියා මග්ගා…පෙ… නිබ්බානං ගරුං කත්වා පච්චවෙක්ඛන්ති…පෙ… නොචිත්තසමුට්ඨානෙ ඛන්ධෙ ගරුං කත්වා…පෙ… චිත්තඤ්ච සම්පයුත්තකා ච ඛන්ධා උප්පජ්ජන්ති. (3)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස අධිපතිපච්චයෙන පච්චයො – ආරම්මණාධිපති… තීණි (ආරම්මණාධිපතියෙව).

අනන්තර-සමනන්තරපච්චයා

214. චිත්තසමුට්ඨානො ධම්මො චිත්තසමුට්ඨානස්ස ධම්මස්ස අනන්තරපච්චයෙන පච්චයො… තීණි (වුට්ඨානං නත්ථි).

නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස අනන්තරපච්චයෙන පච්චයො – පුරිමං පුරිමං චිත්තං පච්ඡිමස්ස පච්ඡිමස්ස…පෙ… නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො (ඉතරෙ ද්වෙ ගණනා, ඉමස්ස සදිසායෙව කාතබ්බා).

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස අනන්තරපච්චයෙන පච්චයො (තීණි කාතබ්බා, වුට්ඨානං නත්ථි)… සමනන්තරපච්චයෙන පච්චයො.

සහජාතපච්චයාදි

215. චිත්තසමුට්ඨානො ධම්මො චිත්තසමුට්ඨානස්ස ධම්මස්ස සහජාතපච්චයෙන පච්චයො (පටිච්චවාරසදිසං)… අඤ්ඤමඤ්ඤපච්චයෙන පච්චයො (පටිච්චවාරසදිසං)… නිස්සයපච්චයෙන පච්චයො (පච්චයවාරසදිසං).

උපනිස්සයපච්චයො

216. චිත්තසමුට්ඨානො ධම්මො චිත්තසමුට්ඨානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – (තීණි පඤ්හා කාතබ්බා). (3)

නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – උතුං… භොජනං… සෙනාසනං චිත්තං උපනිස්සාය දානං දෙති…පෙ… සඞ්ඝං භින්දති; උතු… භොජනං… සෙනාසනං චිත්තං චිත්තස්ස උපනිස්සයපච්චයෙන පච්චයො. (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – උතුං… භොජනං… සෙනාසනං චිත්තං උපනිස්සාය දානං දෙති…පෙ… සඞ්ඝං භින්දති; උතු… භොජනං… සෙනාසනං චිත්තං සද්ධාය…පෙ… මග්ගස්ස ඵලසමාපත්තියා උපනිස්සයපච්චයෙන පච්චයො. (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – උතුං… භොජනං… සෙනාසනං චිත්තං උපනිස්සාය දානං දෙති…පෙ… සඞ්ඝං භින්දති; උතු… භොජනං… සෙනාසනං චිත්තං චිත්තසමුට්ඨානානං ඛන්ධානං චිත්තස්ස ච උපනිස්සයපච්චයෙන පච්චයො. (3)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො… තීණි.

පුරෙජාතපච්චයො

217. චිත්තසමුට්ඨානො ධම්මො චිත්තසමුට්ඨානස්ස ධම්මස්ස පුරෙජාතපච්චයෙන පච්චයො. ආරම්මණපුරෙජාතං – චිත්තසමුට්ඨානෙ රූපෙ…පෙ… ඵොට්ඨබ්බෙ අනිච්චතො…පෙ… විපස්සති…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණසහගතානං ඛන්ධානං පුරෙජාතපච්චයෙන පච්චයො…පෙ… ඵොට්ඨබ්බායතනං කායවිඤ්ඤාණසහගතානං ඛන්ධානං පුරෙජාතපච්චයෙන පච්චයො. (1)

චිත්තසමුට්ඨානො ධම්මො නොචිත්තසමුට්ඨානස්ස ධම්මස්ස පුරෙජාතපච්චයෙන පච්චයො. ආරම්මණපුරෙජාතං – චිත්තසමුට්ඨානෙ රූපෙ…පෙ… ඵොට්ඨබ්බෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. (2)

චිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස පුරෙජාතපච්චයෙන පච්චයො. ආරම්මණපුරෙජාතං – චිත්තසමුට්ඨානෙ රූපෙ…පෙ… ඵොට්ඨබ්බෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං පුරෙජාතපච්චයෙන පච්චයො…පෙ… ඵොට්ඨබ්බායතනං…පෙ…. (3)

218. නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… කායං, රූපෙ…පෙ… ඵොට්ඨබ්බෙ වත්ථුං අනිච්චතො…පෙ… තං ආරබ්භ චිත්තං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං …පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං…පෙ… වත්ථු චිත්තස්ස පුරෙජාතපච්චයෙන පච්චයො. (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණසහගතානං ඛන්ධානං…පෙ… ඵොට්ඨබ්බායතනං…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණසහගතානං ඛන්ධානං…පෙ… කායායතනං…පෙ… වත්ථු චිත්තසමුට්ඨානානං ඛන්ධානං පුරෙජාතපච්චයෙන පච්චයො. (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… තං ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… ඵොට්ඨබ්බායතනං…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… කායායතනං…පෙ… වත්ථු චිත්තස්ස සම්පයුත්තකානඤ්ච ඛන්ධානං පුරෙජාතපච්චයෙන පච්චයො. (3)

219. චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. චිත්තසමුට්ඨානං රූපායතනඤ්ච චක්ඛායතනඤ්ච චක්ඛුවිඤ්ඤාණසහගතානං ඛන්ධානං …පෙ… චිත්තසමුට්ඨානං ඵොට්ඨබ්බායතනඤ්ච කායායතනඤ්ච කායවිඤ්ඤාණසහගතානං ඛන්ධානං පුරෙජාතපච්චයෙන පච්චයො; චිත්තසමුට්ඨානං රූපායතනඤ්ච වත්ථු ච චිත්තසමුට්ඨානානං ඛන්ධානං පුරෙජාතපච්චයෙන පච්චයො…පෙ… චිත්තසමුට්ඨානං ඵොට්ඨබ්බායතනඤ්ච වත්ථු ච…පෙ…. (1)

චිත්තසමුට්ඨානො ච නොචිත්තසමුට්ඨානො ච ධම්මා නොචිත්තසමුට්ඨානස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. චිත්තසමුට්ඨානං රූපායතනඤ්ච චක්ඛායතනඤ්ච චක්ඛුවිඤ්ඤාණස්ස…පෙ… චිත්තසමුට්ඨානං ඵොට්ඨබ්බායතනඤ්ච කායායතනඤ්ච කායවිඤ්ඤාණස්ස පුරෙජාතපච්චයෙන පච්චයො; චිත්තසමුට්ඨානං රූපායතනඤ්ච වත්ථු ච චිත්තස්ස පුරෙජාතපච්චයෙන පච්චයො…පෙ… චිත්තසමුට්ඨානං ඵොට්ඨබ්බායතනඤ්ච වත්ථු ච…පෙ…. (2)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. චිත්තසමුට්ඨානං රූපායතනඤ්ච චක්ඛායතනඤ්ච චක්ඛුවිඤ්ඤාණස්ස සම්පයුත්තකානඤ්ච ඛන්ධානං පුරෙජාතපච්චයෙන පච්චයො…පෙ… චිත්තසමුට්ඨානං ඵොට්ඨබ්බායතනං ච…පෙ… චිත්තසමුට්ඨානං රූපායතනඤ්ච වත්ථු ච චිත්තස්ස සම්පයුත්තකානඤ්ච ඛන්ධානං පුරෙජාතපච්චයෙන පච්චයො…පෙ… චිත්තසමුට්ඨානං ඵොට්ඨබ්බායතනඤ්ච වත්ථු ච…පෙ…. (3)

පච්ඡාජාතාසෙවනපච්චයා

220. චිත්තසමුට්ඨානො ධම්මො චිත්තසමුට්ඨානස්ස ධම්මස්ස පච්ඡාජාතපච්චයෙන පච්චයො – පච්ඡාජාතා චිත්තසමුට්ඨානා ඛන්ධා පුරෙජාතස්ස ඉමස්ස චිත්තසමුට්ඨානස්ස කායස්ස පච්ඡාජාතපච්චයෙන පච්චයො (ඉමිනාකාරෙනෙව පච්ඡාජාතො විත්ථාරෙතබ්බො)… ආසෙවනපච්චයෙන පච්චයො… නව.

කම්ම-විපාකපච්චයා

221. චිත්තසමුට්ඨානො ධම්මො චිත්තසමුට්ඨානස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චිත්තසමුට්ඨානා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චිත්තසමුට්ඨානා චෙතනා විපාකානං ඛන්ධානං කම්මපච්චයෙන පච්චයො. (1)

චිත්තසමුට්ඨානො ධම්මො නොචිත්තසමුට්ඨානස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චිත්තසමුට්ඨානා චෙතනා චිත්තස්ස කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චිත්තසමුට්ඨානා චෙතනා විපාකස්ස චිත්තස්ස කටත්තා ච රූපානං කම්මපච්චයෙන පච්චයො. (2)

චිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චිත්තසමුට්ඨානා චෙතනා සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චිත්තසමුට්ඨානා චෙතනා විපාකානං ඛන්ධානං චිත්තස්ස ච කටත්තා ච රූපානං කම්මපච්චයෙන පච්චයො. (3)

චිත්තසමුට්ඨානො ධම්මො චිත්තසමුට්ඨානස්ස ධම්මස්ස විපාකපච්චයෙන පච්චයො… නව.

ආහාරපච්චයො

222. චිත්තසමුට්ඨානො ධම්මො චිත්තසමුට්ඨානස්ස ධම්මස්ස ආහාරපච්චයෙන පච්චයො – චිත්තසමුට්ඨානා ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං) චිත්තසමුට්ඨානා ආහාරා චිත්තස්ස ආහාරපච්චයෙන පච්චයො; පටිසන්ධික්ඛණෙ…පෙ… චිත්තසමුට්ඨානො කබළීකාරො ආහාරො ඉමස්ස නොචිත්තසමුට්ඨානස්ස කායස්ස ආහාරපච්චයෙන පච්චයො. (මූලං කාතබ්බං) චිත්තසමුට්ඨානා ආහාරා සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ…. (3)

223. නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස ආහාරපච්චයෙන පච්චයො – පටිසන්ධික්ඛණෙ නොචිත්තසමුට්ඨානා ආහාරා කටත්තාරූපානං ආහාරපච්චයෙන පච්චයො; නොචිත්තසමුට්ඨානො කබළීකාරො ආහාරො ඉමස්ස නොචිත්තසමුට්ඨානස්ස කායස්ස ආහාරපච්චයෙන පච්චයො. (මූලං කාතබ්බං) නොචිත්තසමුට්ඨානා ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං) පටිසන්ධික්ඛණෙ නොචිත්තසමුට්ඨානා ආහාරා සම්පයුත්තකානං ඛන්ධානං කටත්තා ච රූපානං ආහාරපච්චයෙන පච්චයො. (3)

224. චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස ආහාරපච්චයෙන පච්චයො – චිත්තසමුට්ඨානා ච නොචිත්තසමුට්ඨානා ච ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ…. (මූලං කාතබ්බං) පටිසන්ධික්ඛණෙ චිත්තසමුට්ඨානා ච නොචිත්තසමුට්ඨානා ච ආහාරා කටත්තාරූපානං ආහාරපච්චයෙන පච්චයො; චිත්තසමුට්ඨානො ච නොචිත්තසමුට්ඨානො ච කබළීකාරො ආහාරො ඉමස්ස නොචිත්තසමුට්ඨානස්ස කායස්ස ආහාරපච්චයෙන පච්චයො. (මූලං කාතබ්බං) පටිසන්ධික්ඛණෙ චිත්තසමුට්ඨානා ච නොචිත්තසමුට්ඨානා ච ආහාරා සම්පයුත්තකානං ඛන්ධානං කටත්තා ච රූපානං ආහාරපච්චයෙන පච්චයො. (3)

ඉන්ද්‍රියපච්චයාදි

225. චිත්තසමුට්ඨානො ධම්මො චිත්තසමුට්ඨානස්ස ධම්මස්ස ඉන්ද්‍රියපච්චයෙන පච්චයො… තීණි.

නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස ඉන්ද්‍රියපච්චයෙන පච්චයො – පටිසන්ධික්ඛණෙ නොචිත්තසමුට්ඨානා ඉන්ද්‍රියා කටත්තාරූපානං ඉන්ද්‍රියපච්චයෙන පච්චයො; පටිසන්ධික්ඛණෙ…පෙ… චක්ඛුන්ද්‍රියං චක්ඛුවිඤ්ඤාණස්ස…පෙ… කායින්ද්‍රියං කායවිඤ්ඤාණස්ස…පෙ… රූපජීවිතින්ද්‍රියං කටත්තාරූපානං ඉන්ද්‍රියපච්චයෙන පච්චයො. (මූලං කාතබ්බං) නොචිත්තසමුට්ඨානා ඉන්ද්‍රියා සම්පයුත්තකානං ඛන්ධානං චිත්තසමුට්ඨානානඤ්ච රූපානං ඉන්ද්‍රියපච්චයෙන පච්චයො; පටිසන්ධික්ඛණෙ…පෙ… චක්ඛුන්ද්‍රියං චක්ඛුවිඤ්ඤාණසහගතානං ඛන්ධානං…පෙ… කායින්ද්‍රියං…පෙ…. (මූලං කාතබ්බං) පටිසන්ධික්ඛණෙ නොචිත්තසමුට්ඨානා ඉන්ද්‍රියා සම්පයුත්තකානං ඛන්ධානං කටත්තා ච රූපානං ඉන්ද්‍රියපච්චයෙන පච්චයො; චක්ඛුන්ද්‍රියං චක්ඛුවිඤ්ඤාණස්ස චක්ඛුවිඤ්ඤාණසහගතානඤ්ච ඛන්ධානං…පෙ… කායින්ද්‍රියං…පෙ…. (3)

226. චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස ඉන්ද්‍රියපච්චයෙන පච්චයො – චිත්තසමුට්ඨානා ච නොචිත්තසමුට්ඨානා ච ඉන්ද්‍රියා සම්පයුත්තකානං ඛන්ධානං චිත්තසමුට්ඨානානඤ්ච රූපානං ඉන්ද්‍රියපච්චයෙන පච්චයො; පටිසන්ධික්ඛණෙ…පෙ… චක්ඛුන්ද්‍රියඤ්ච උපෙක්ඛින්ද්‍රියඤ්ච චක්ඛුවිඤ්ඤාණසහගතානං ඛන්ධානං…පෙ… කායින්ද්‍රියඤ්ච සුඛින්ද්‍රියඤ්ච…පෙ… කායින්ද්‍රියඤ්ච දුක්ඛින්ද්‍රියඤ්ච කායවිඤ්ඤාණසහගතානං ඛන්ධානං ඉන්ද්‍රියපච්චයෙන පච්චයො. (මූලං කාතබ්බං) පටිසන්ධික්ඛණෙ චිත්තසමුට්ඨානා ච නොචිත්තසමුට්ඨානා ච ඉන්ද්‍රියා කටත්තාරූපානං ඉන්ද්‍රියපච්චයෙන පච්චයො; චක්ඛුන්ද්‍රියඤ්ච උපෙක්ඛින්ද්‍රියඤ්ච චක්ඛුවිඤ්ඤාණස්ස …පෙ… කායින්ද්‍රියඤ්ච…පෙ…. (මූලං කාතබ්බං) පටිසන්ධික්ඛණෙ චිත්තසමුට්ඨානා ච නොචිත්තසමුට්ඨානා ච ඉන්ද්‍රියා සම්පයුත්තකානං ඛන්ධානං කටත්තා ච රූපානං ඉන්ද්‍රියපච්චයෙන පච්චයො; චක්ඛුන්ද්‍රියඤ්ච උපෙක්ඛින්ද්‍රියඤ්ච චක්ඛුවිඤ්ඤාණස්ස සම්පයුත්තකානඤ්ච ඛන්ධානං ඉන්ද්‍රියපච්චයෙන පච්චයො; කායින්ද්‍රියං ච…පෙ…. (3)

ඣානපච්චයෙන පච්චයො… තීණි… මග්ගපච්චයෙන පච්චයො… තීණි… සම්පයුත්තපච්චයෙන පච්චයො… පඤ්ච…පෙ….

විප්පයුත්තපච්චයො

227. චිත්තසමුට්ඨානො ධම්මො චිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

චිත්තසමුට්ඨානො ධම්මො නොචිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතං – පටිසන්ධික්ඛණෙ (සංඛිත්තං). (2)

චිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස විප්පයුත්තපච්චයෙන පච්චයො… පච්ඡාජාතං (සංඛිත්තං). (3)

228. නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතං – පටිසන්ධික්ඛණෙ චිත්තං කටත්තා රූපානං විප්පයුත්තපච්චයෙන පච්චයො, චිත්තං වත්ථුස්ස විප්පයුත්තපච්චයෙන පච්චයො, වත්ථු චිත්තස්ස විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු චිත්තස්ස විප්පයුත්තපච්චයෙන පච්චයො. පච්ඡාජාතා – නොචිත්තසමුට්ඨානා ඛන්ධා පුරෙජාතස්ස ඉමස්ස නොචිත්තසමුට්ඨානස්ස කායස්ස විප්පයුත්තපච්චයෙන පච්චයො. (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (3)

229. චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

චිත්තසමුට්ඨානො ච නොචිත්තසමුට්ඨානො ච ධම්මා නොචිත්තසමුට්ඨානස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (2)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස විප්පයුත්තපච්චයෙන පච්චයො… පච්ඡාජාතං (සංඛිත්තං). (3)

අත්ථිපච්චයාදි

230. චිත්තසමුට්ඨානො ධම්මො චිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (1)

චිත්තසමුට්ඨානො ධම්මො නොචිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං (සංඛිත්තං). (2)

චිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (3)

නොචිත්තසමුට්ඨානො ධම්මො නොචිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). (1)

නොචිත්තසමුට්ඨානො ධම්මො චිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං). (2)

නොචිත්තසමුට්ඨානො ධම්මො චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං (සංඛිත්තං). (3)

231. චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං. සහජාතො – චක්ඛුවිඤ්ඤාණසහගතො එකො ඛන්ධො…පෙ… (සංඛිත්තං). (1)

චිත්තසමුට්ඨානො ච නොචිත්තසමුට්ඨානො ච ධම්මා නොචිත්තසමුට්ඨානස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතා – චක්ඛුවිඤ්ඤාණසහගතා ඛන්ධා ච චක්ඛායතනඤ්ච චක්ඛුවිඤ්ඤාණස්ස අත්ථිපච්චයෙන පච්චයො…පෙ… කායවිඤ්ඤාණසහගතා…පෙ…. සහජාතා – චිත්තසමුට්ඨානා…පෙ… (පච්චයවාරසදිසං පටිසන්ධිපි පවත්තිපි කාතබ්බා සබ්බෙසම්පි පඤ්හානං.) පච්ඡාජාතා – චිත්තසමුට්ඨානා ඛන්ධා ච චිත්තඤ්ච පුරෙජාතස්ස ඉමස්ස නොචිත්තසමුට්ඨානස්ස කායස්ස අත්ථිපච්චයෙන පච්චයො. පච්ඡාජාතා – චිත්තසමුට්ඨානා ඛන්ධා ච චිත්තඤ්ච කබළීකාරො ආහාරො ච ඉමස්ස නොචිත්තසමුට්ඨානස්ස කායස්ස අත්ථිපච්චයෙන පච්චයො. පච්ඡාජාතා – චිත්තසමුට්ඨානා ඛන්ධා ච චිත්තඤ්ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

චිත්තසමුට්ඨානො ච නොචිත්තසමුට්ඨානො ච ධම්මා චිත්තසමුට්ඨානස්ස ච නොචිත්තසමුට්ඨානස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං. සහජාතො – චක්ඛුවිඤ්ඤාණසහගතො…පෙ… (සංඛිත්තං). (3)

නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.