1. විභඞ්ගවාරො

හෙතුපච්චයො

201. චිත්තසමුට්ඨානං ධම්මං පච්චයා චිත්තසමුට්ඨානො ධම්මො උප්පජ්ජති හෙතුපච්චයා… තීණි (පටිච්චවාරසදිසං).

නොචිත්තසමුට්ඨානං ධම්මං පච්චයා නොචිත්තසමුට්ඨානො ධම්මො උප්පජ්ජති හෙතුපච්චයා – වත්ථුං පච්චයා චිත්තං; පටිසන්ධික්ඛණෙ…පෙ… (පටිච්චවාරසදිසා). (1)

නොචිත්තසමුට්ඨානං ධම්මං පච්චයා චිත්තසමුට්ඨානො ධම්මො උප්පජ්ජති හෙතුපච්චයා – චිත්තං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං, වත්ථුං පච්චයා චිත්තසමුට්ඨානා ඛන්ධා (පටිසන්ධික්ඛණෙ ද්වෙපි කාතබ්බා). (1)

නොචිත්තසමුට්ඨානං ධම්මං පච්චයා චිත්තසමුට්ඨානො ච නොචිත්තසමුට්ඨානො ච ධම්මා උප්පජ්ජන්ති හෙතුපච්චයා – වත්ථුං පච්චයා චිත්තං සම්පයුත්තකා ච ඛන්ධා; පටිසන්ධික්ඛණෙ ද්වෙ (පටිච්චවාරසදිසං). (3)

202. චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා චිත්තසමුට්ඨානො ධම්මො උප්පජ්ජති හෙතුපච්චයා – චිත්තසමුට්ඨානං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… චිත්තසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… (පටිසන්ධික්ඛණෙ ද්වෙපි පටිච්චවාරසදිසා). (1)

චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා නොචිත්තසමුට්ඨානො ධම්මො උප්පජ්ජති හෙතුපච්චයා – චිත්තසමුට්ඨානෙ ඛන්ධෙ ච වත්ථුඤ්ච පච්චයා චිත්තං (පටිසන්ධික්ඛණෙ තීණිපි කාතබ්බා පටිච්චවාරසදිසා). (2)

චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා චිත්තසමුට්ඨානො ච නොචිත්තසමුට්ඨානො ච ධම්මා උප්පජ්ජන්ති හෙතුපච්චයා – චිත්තසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… (පටිසන්ධික්ඛණෙ ද්වෙපි කාතබ්බා පටිච්චවාරසදිසා). (3)

ආරම්මණපච්චයො

203. චිත්තසමුට්ඨානං ධම්මං පච්චයා චිත්තසමුට්ඨානො ධම්මො උප්පජ්ජති ආරම්මණපච්චයා… තීණි (පටිච්චවාරසදිසා).

නොචිත්තසමුට්ඨානං ධම්මං පච්චයා නොචිත්තසමුට්ඨානො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං…පෙ… වත්ථුං පච්චයා චිත්තං. (1)

නොචිත්තසමුට්ඨානං ධම්මං පච්චයා චිත්තසමුට්ඨානො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං පච්චයා කායවිඤ්ඤාණසහගතා ඛන්ධා, චිත්තං පච්චයා සම්පයුත්තකා ඛන්ධා, වත්ථුං පච්චයා චිත්තසමුට්ඨානා ඛන්ධා (පටිසන්ධික්ඛණෙ ද්වෙපි). (2)

නොචිත්තසමුට්ඨානං ධම්මං පච්චයා චිත්තසමුට්ඨානො ච නොචිත්තසමුට්ඨානො ච ධම්මා උප්පජ්ජන්ති ආරම්මණපච්චයා – චක්ඛායතනං පච්චයා චක්ඛුවිඤ්ඤාණං සම්පයුත්තකා ච ඛන්ධා…පෙ… කායායතනං…පෙ… වත්ථුං පච්චයා චිත්තං සම්පයුත්තකා ච ඛන්ධා; පටිසන්ධික්ඛණෙ…පෙ…. (3)

204. චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා චිත්තසමුට්ඨානො ධම්මො උප්පජ්ජති ආරම්මණපච්චයා – චිත්තසමුට්ඨානං එකං ඛන්ධඤ්ච චිත්තඤ්ච පච්චයා ද්වෙ ඛන්ධා, ද්වෙ ඛන්ධෙ …පෙ… චිත්තසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ…පෙ… (පටිසන්ධික්ඛණෙ ද්වෙපි කාතබ්බා). (1)

චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා නොචිත්තසමුට්ඨානො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතෙ ඛන්ධෙ ච චක්ඛායතනඤ්ච පච්චයා චක්ඛුවිඤ්ඤාණං…පෙ… කායවිඤ්ඤාණසහගතෙ…පෙ… චිත්තසමුට්ඨානෙ ඛන්ධෙ ච වත්ථුඤ්ච පච්චයා චිත්තං; පටිසන්ධික්ඛණෙ…පෙ…. (2)

චිත්තසමුට්ඨානඤ්ච නොචිත්තසමුට්ඨානඤ්ච ධම්මං පච්චයා චිත්තසමුට්ඨානො ච නොචිත්තසමුට්ඨානො ච ධම්මා උප්පජ්ජන්ති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා චක්ඛුවිඤ්ඤාණඤ්ච, ද්වෙ ඛන්ධෙ…පෙ… කායවිඤ්ඤාණසහගතං…පෙ… චිත්තසමුට්ඨානං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා චිත්තඤ්ච, ද්වෙ ඛන්ධෙ…පෙ… පටිසන්ධික්ඛණෙ…පෙ…. (3) (සංඛිත්තං).