1. විභඞ්ගවාරො

නහෙතුපච්චයො

158. චිත්තසම්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති නහෙතුපච්චයා… තීණි (පටිච්චසදිසා).

චිත්තවිප්පයුත්තං ධම්මං පච්චයා චිත්තවිප්පයුත්තො ධම්මො උප්පජ්ජති නහෙතුපච්චයා – එකං මහාභූතං…පෙ… (යාව අසඤ්ඤසත්තා). (1)

චිත්තවිප්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති නහෙතුපච්චයා – චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං…පෙ… වත්ථුං පච්චයා අහෙතුකා චිත්තසම්පයුත්තකා ඛන්ධා; පටිසන්ධික්ඛණෙ…පෙ… වත්ථුං පච්චයා විචිකිච්ඡාසහගතො උද්ධච්චසහගතො මොහො. (2)

චිත්තවිප්පයුත්තං ධම්මං පච්චයා චිත්තසම්පයුත්තො ච චිත්තවිප්පයුත්තො ච ධම්මා උප්පජ්ජන්ති නහෙතුපච්චයා – වත්ථුං පච්චයා අහෙතුකා චිත්තසම්පයුත්තකා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

චිත්තසම්පයුත්තඤ්ච චිත්තවිප්පයුත්තඤ්ච ධම්මං පච්චයා චිත්තසම්පයුත්තො ධම්මො උප්පජ්ජති නහෙතුපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… කායවිඤ්ඤාණසහගතං එකං ඛන්ධඤ්ච කායායතනඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… අහෙතුකං චිත්තසම්පයුත්තං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (එවං ද්වෙ පඤ්හා පවත්තිපටිසන්ධි කාතබ්බා. සංඛිත්තං.)