1. විභඞ්ගවාරො

හෙතුපච්චයො

154. චිත්තසම්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති හෙතුපච්චයා… තීණි (පටිච්චසදිසා).

චිත්තවිප්පයුත්තං ධම්මං පච්චයා චිත්තවිප්පයුත්තො ධම්මො උප්පජ්ජති හෙතුපච්චයා… එකං (පටිච්චසදිසං). (1)

චිත්තවිප්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති හෙතුපච්චයා – වත්ථුං පච්චයා චිත්තසම්පයුත්තකා ඛන්ධා; පටිසන්ධික්ඛණෙ…පෙ…. (2)

චිත්තවිප්පයුත්තං ධම්මං පච්චයා චිත්තසම්පයුත්තො ච චිත්තවිප්පයුත්තො ච ධම්මා උප්පජ්ජන්ති හෙතුපච්චයා – වත්ථුං පච්චයා චිත්තසම්පයුත්තකා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

155. චිත්තසම්පයුත්තඤ්ච චිත්තවිප්පයුත්තඤ්ච ධම්මං පච්චයා චිත්තසම්පයුත්තො ධම්මො උප්පජ්ජති හෙතුපච්චයා – චිත්තසම්පයුත්තං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… පටිසන්ධික්ඛණෙ…පෙ…. (1)

චිත්තසම්පයුත්තඤ්ච චිත්තවිප්පයුත්තඤ්ච ධම්මං පච්චයා චිත්තවිප්පයුත්තො ධම්මො උප්පජ්ජති හෙතුපච්චයා – චිත්තසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (2)

චිත්තසම්පයුත්තඤ්ච චිත්තවිප්පයුත්තඤ්ච ධම්මං පච්චයා චිත්තසම්පයුත්තො ච චිත්තවිප්පයුත්තො ච ධම්මා උප්පජ්ජන්ති හෙතුපච්චයා – චිත්තසම්පයුත්තං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චිත්තසම්පයුත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (3)

ආරම්මණපච්චයො

156. චිත්තසම්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති ආරම්මණපච්චයා… එකං (පටිච්චසදිසං). (1)

චිත්තවිප්පයුත්තං ධම්මං පච්චයා චිත්තසම්පයුත්තො ධම්මො උප්පජ්ජති ආරම්මණපච්චයා – චක්ඛායතනං පච්චයා චක්ඛුවිඤ්ඤාණසහගතා ඛන්ධා…පෙ… කායායතනං පච්චයා කායවිඤ්ඤාණසහගතා ඛන්ධා…පෙ… වත්ථුං පච්චයා චිත්තසම්පයුත්තකා ඛන්ධා; පටිසන්ධික්ඛණෙ…පෙ…. (1)

චිත්තසම්පයුත්තඤ්ච චිත්තවිප්පයුත්තඤ්ච ධම්මං පච්චයා චිත්තසම්පයුත්තො ධම්මො උප්පජ්ජති ආරම්මණපච්චයා – චක්ඛුවිඤ්ඤාණසහගතං එකං ඛන්ධඤ්ච චක්ඛායතනඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… කායවිඤ්ඤාණසහගතං එකං ඛන්ධඤ්ච කායායතනඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… චිත්තසම්පයුත්තං එකං ඛන්ධඤ්ච වත්ථුඤ්ච පච්චයා ද්වෙ ඛන්ධා, ද්වෙ ඛන්ධෙ ච…පෙ… පටිසන්ධික්ඛණෙ…පෙ… (සංඛිත්තං). (1)