1. විභඞ්ගවාරො

නහෙතුපච්චයො

149. චිත්තසම්පයුත්තං ධම්මං පටිච්ච චිත්තසම්පයුත්තො ධම්මො උප්පජ්ජති නහෙතුපච්චයා – අහෙතුකං චිත්තසම්පයුත්තං එකං ඛන්ධං පටිච්ච ද්වෙ ඛන්ධා, ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

(එවං නවපි පඤ්හා කාතබ්බා. අහෙතුකන්ති සබ්බත්ථ නියාමෙතබ්බං, එකංයෙව මොහං මූලපදෙ.)

නආරම්මණපච්චයො

150. චිත්තසම්පයුත්තං ධම්මං පටිච්ච චිත්තවිප්පයුත්තො ධම්මො උප්පජ්ජති නආරම්මණපච්චයා – චිත්තසම්පයුත්තෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

චිත්තවිප්පයුත්තං ධම්මං පටිච්ච චිත්තවිප්පයුත්තො ධම්මො උප්පජ්ජති නආරම්මණපච්චයා – එකං මහාභූතං…පෙ… (යාව අසඤ්ඤසත්තා). (1)

චිත්තසම්පයුත්තඤ්ච චිත්තවිප්පයුත්තඤ්ච ධම්මං පටිච්ච චිත්තවිප්පයුත්තො ධම්මො උප්පජ්ජති නආරම්මණපච්චයා – චිත්තසම්පයුත්තෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ එකං (සංඛිත්තං). (1)