1. විභඞ්ගවාරො

හෙතුපච්චයො

119. චෙතසිකො ධම්මො චෙතසිකස්ස ධම්මස්ස හෙතුපච්චයෙන පච්චයො – චෙතසිකා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

චෙතසිකො ධම්මො අචෙතසිකස්ස ධම්මස්ස හෙතුපච්චයෙන පච්චයො – චෙතසිකා හෙතූ චිත්තස්ස චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (2)

චෙතසිකො ධම්මො චෙතසිකස්ස ච අචෙතසිකස්ස ච ධම්මස්ස හෙතුපච්චයෙන පච්චයො – චෙතසිකා හෙතූ සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

ආරම්මණපච්චයො

120. චෙතසිකො ධම්මො චෙතසිකස්ස ධම්මස්ස ආරම්මණපච්චයෙන පච්චයො – චෙතසිකෙ ඛන්ධෙ ආරබ්භ චෙතසිකා ඛන්ධා උප්පජන්ති. (මූලං පුච්ඡිතබ්බං) චෙතසිකෙ ඛන්ධෙ ආරබ්භ චිත්තං උප්පජ්ජති. (මූලං පුච්ඡිතබ්බං) චෙතසිකෙ ඛන්ධෙ ආරබ්භ චෙතසිකා ඛන්ධා ච චිත්තඤ්ච උප්පජ්ජන්ති. (3)

121. අචෙතසිකො ධම්මො අචෙතසිකස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා…පෙ… ඵලං පච්චවෙක්ඛන්ති, නිබ්බානං පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො; චක්ඛුං…පෙ… වත්ථුං අචෙතසිකෙ ඛන්ධෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන අචෙතසිකචිත්තසමඞ්ගිස්ස චිත්තං ජානාති, ආකාසානඤ්චායතනං…පෙ… ආකිඤ්චඤ්ඤායතනං…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… අචෙතසිකා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා…පෙ… නිබ්බානං පච්චවෙක්ඛන්ති (පඨමගමනසදිසං); චක්ඛුං…පෙ… වත්ථුං අචෙතසිකෙ ඛන්ධෙ අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන අචෙතසිකචිත්තසමඞ්ගිස්ස චිත්තං ජානාති, ආකාසානඤ්චායතනං…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණසහගතානං ඛන්ධානං…පෙ… ඵොට්ඨබ්බායතනං කායවිඤ්ඤාණසහගතානං ඛන්ධානං…පෙ… අචෙතසිකා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

අචෙතසිකො ධම්මො චෙතසිකස්ස ච අචෙතසිකස්ස ච ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා…පෙ… නිබ්බානං පච්චවෙක්ඛන්ති (පඨමගමනසදිසං); චක්ඛුං…පෙ… වත්ථුං අචෙතසිකෙ ඛන්ධෙ අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. දිබ්බෙන චක්ඛුනා රූපං පස්සති…පෙ… රූපායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං ආරම්මණපච්චයෙන පච්චයො…පෙ… ඵොට්ඨබ්බායතනං කායවිඤ්ඤාණස්ස සම්පයුත්තකානඤ්ච ඛන්ධානං…පෙ… අචෙතසිකා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (3)

122. චෙතසිකො ච අචෙතසිකො ච ධම්මා චෙතසිකස්ස ධම්මස්ස ආරම්මණපච්චයෙන පච්චයො – චෙතසිකෙ ඛන්ධෙ ච චිත්තඤ්ච ආරබ්භ චෙතසිකා ඛන්ධා උප්පජ්ජන්ති. (මූලං පුච්ඡිතබ්බං) චෙතසිකෙ ඛන්ධෙ ච චිත්තඤ්ච ආරබ්භ චිත්තං උප්පජ්ජති. (මූලං පුච්ඡිතබ්බං) චෙතසිකෙ ඛන්ධෙ ච චිත්තඤ්ච ආරබ්භ චෙතසිකා ඛන්ධා ච චිත්තඤ්ච උප්පජ්ජන්ති. (3)

අධිපතිපච්චයො

123. චෙතසිකො ධම්මො චෙතසිකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – චෙතසිකෙ ඛන්ධෙ ගරුං කත්වා චෙතසිකා ඛන්ධා උප්පජ්ජන්ති. සහජාතාධිපති – චෙතසිකාධිපති සම්පයුත්තකානං ඛන්ධානං අධිපතිපච්චයෙන පච්චයො. (මූලං පුච්ඡිතබ්බං) ආරම්මණාධිපති – චෙතසිකෙ ඛන්ධෙ ගරුං කත්වා චිත්තං උප්පජ්ජති. සහජාතාධිපති – චෙතසිකාධිපති චිත්තස්ස චිත්තසමුට්ඨානානඤ්ච රූපානං අධිපතිපච්චයෙන පච්චයො. (මූලං පුච්ඡිතබ්බං ) ආරම්මණාධිපති – චෙතසිකෙ ඛන්ධෙ ගරුං කත්වා චෙතසිකා ඛන්ධා ච චිත්තඤ්ච උප්පජ්ජන්ති. සහජාතාධිපති – චෙතසිකාධිපති සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

124. අචෙතසිකො ධම්මො අචෙතසිකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා වුට්ඨහිත්වා…පෙ… නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස. මග්ගස්ස, ඵලස්ස අධිපතිපච්චයෙන පච්චයො; චක්ඛුං …පෙ… වත්ථුං අචෙතසිකෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා චිත්තං උප්පජ්ජති. සහජාතාධිපති – අචෙතසිකාධිපති චිත්තසමුට්ඨානානං රූපානං අධිපතිපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා වුට්ඨහිත්වා…පෙ… නිබ්බානං ගරුං කත්වා…පෙ… (පඨමගමනසදිසං); චක්ඛුං…පෙ… වත්ථුං අචෙතසිකෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – අචෙතසිකාධිපති සම්පයුත්තකානං ඛන්ධානං අධිපතිපච්චයෙන පච්චයො. (2)

අචෙතසිකො ධම්මො චෙතසිකස්ස ච අචෙතසිකස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා වුට්ඨහිත්වා…පෙ… නිබ්බානං…පෙ… (පඨමගමනං) අචෙතසිකෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා චෙතසිකා ඛන්ධා ච චිත්තඤ්ච උප්පජ්ජන්ති. සහජාතාධිපති – අචෙතසිකාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

චෙතසිකො ච අචෙතසිකො ච ධම්මා චෙතසිකස්ස ධම්මස්ස අධිපතිපච්චයෙන පච්චයො – ආරම්මණාධිපති… තීණි (ආරම්මණාධිපතියෙව).

අනන්තරපච්චයාදි

125. චෙතසිකො ධම්මො චෙතසිකස්ස ධම්මස්ස අනන්තරපච්චයෙන පච්චයො – පුරිමා පුරිමා චෙතසිකා ඛන්ධා පච්ඡිමානං පච්ඡිමානං චෙතසිකානං ඛන්ධානං අනන්තරපච්චයෙන පච්චයො. (මූලං පුච්ඡිතබ්බං) පුරිමා පුරිමා චෙතසිකා ඛන්ධා පච්ඡිමස්ස පච්ඡිමස්ස චිත්තස්ස අනන්තරපච්චයෙන පච්චයො. (මූලං පුච්ඡිතබ්බං) පුරිමා පුරිමා චෙතසිකා ඛන්ධා පච්ඡිමානං පච්ඡිමානං චෙතසිකානං ඛන්ධානං චිත්තස්ස ච අනන්තරපච්චයෙන පච්චයො. (3)

126. අචෙතසිකො ධම්මො අචෙතසිකස්ස ධම්මස්ස අනන්තරපච්චයෙන පච්චයො – පුරිමං පුරිමං චිත්තං පච්ඡිමස්ස පච්ඡිමස්ස චිත්තස්ස අනන්තරපච්චයෙන පච්චයො; අනුලොමං ගොත්‍රභුස්ස…පෙ… ඵලසමාපත්තියා අනන්තරපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස අනන්තරපච්චයෙන පච්චයො (එවං තීණි කාතබ්බානි, පඨමගමනසදිසං. පූරිත්වා කාතබ්බං, නින්නානාකරණං).

චෙතසිකො ච අචෙතසිකො ච ධම්මා චෙතසිකස්ස ධම්මස්ස අනන්තරපච්චයෙන පච්චයො… තීණි (ආවජ්ජනාපි වුට්ඨානම්පි නත්ථි).

සමනන්තරපච්චයෙන පච්චයො… නව, සහජාතපච්චයෙන පච්චයො… නව (පටිච්චවාරසදිසං), අඤ්ඤමඤ්ඤපච්චයෙන පච්චයො… නව (පටිච්චවාරසදිසං), නිස්සයපච්චයෙන පච්චයො… නව (පච්චයවාරසදිසං).

උපනිස්සයපච්චයො

127. චෙතසිකො ධම්මො චෙතසිකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – චෙතසිකා ඛන්ධා චෙතසිකානං ඛන්ධානං උපනිස්සයපච්චයෙන පච්චයො. (මූලං පුච්ඡිතබ්බං, තීණි උපනිස්සයා) චෙතසිකා ඛන්ධා චිත්තස්ස උපනිස්සයපච්චයෙන පච්චයො. (මූලං පුච්ඡිතබ්බං, තීණි උපනිස්සයා) චෙතසිකා ඛන්ධා චෙතසිකානං ඛන්ධානං චිත්තස්ස ච උපනිස්සයපච්චයෙන පච්චයො. (3)

128. අචෙතසිකො ධම්මො අචෙතසිකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – උතුං… භොජනං… සෙනාසනං චිත්තං උපනිස්සාය දානං දෙති…පෙ… සඞ්ඝං භින්දති; උතුං… භොජනං… සෙනාසනං චිත්තං සද්ධාය…පෙ… පඤ්ඤාය… රාගස්ස…පෙ… පත්ථනාය කායිකස්ස සුඛස්ස, කායිකස්ස දුක්ඛස්ස, මග්ගස්ස, ඵලසමාපත්තියා උපනිස්සයපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො පකතූපනිස්සයො…පෙ…. පකතූපනිස්සයො – උතුං… භොජනං… සෙනාසනං චිත්තං උපනිස්සාය දානං දෙති…පෙ… (තීණි, පඨමගමනසදිසං නින්නානාකරණං).

චෙතසිකො ච අචෙතසිකො ච ධම්මා චෙතසිකස්ස ධම්මස්ස උපනිස්සයපච්චයෙන පච්චයො… තීණි.

පුරෙජාතපච්චයො

129. අචෙතසිකො ධම්මො අචෙතසිකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු චිත්තස්ස පුරෙජාතපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණසහගතානං ඛන්ධානං…පෙ… ඵොට්ඨබ්බායතනං කායවිඤ්ඤාණසහගතානං ඛන්ධානං…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණසහගතානං ඛන්ධානං…පෙ… කායායතනං…පෙ… වත්ථු චෙතසිකානං ඛන්ධානං පුරෙජාතපච්චයෙන පච්චයො. (2)

අචෙතසිකො ධම්මො චෙතසිකස්ස ච අචෙතසිකස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… විපස්සති අස්සාදෙති අභිනන්දති, තං ආරබ්භ චිත්තඤ්ච සම්පයුත්තකා ච ඛන්ධා උප්පජ්ජන්ති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. රූපායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… ඵොට්ඨබ්බායතනං…පෙ…. වත්ථුපුරෙජාතං – චක්ඛායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… කායායතනං…පෙ… වත්ථු චිත්තස්ස සම්පයුත්තකානඤ්ච ඛන්ධානං පුරෙජාතපච්චයෙන පච්චයො. (3)

පච්ඡාජාතාසෙවනපච්චයා

130. චෙතසිකො ධම්මො අචෙතසිකස්ස ධම්මස්ස පච්ඡාජාතපච්චයෙන පච්චයො (සංඛිත්තං).

අචෙතසිකො ධම්මො අචෙතසිකස්ස ධම්මස්ස පච්ඡාජාතපච්චයෙන පච්චයො (සංඛිත්තං).

චෙතසිකො ච අචෙතසිකො ච ධම්මා අචෙතසිකස්ස ධම්මස්ස පච්ඡාජාතපච්චයෙන පච්චයො (සංඛිත්තං).

චෙතසිකො ධම්මො චෙතසිකස්ස ධම්මස්ස ආසෙවනපච්චයෙන පච්චයො (සංඛිත්තං).

කම්මපච්චයො

131. චෙතසිකො ධම්මො චෙතසිකස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චෙතසිකා චෙතනා සම්පයුත්තකානං ඛන්ධානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චෙතසිකා චෙතනා විපාකානං ඛන්ධානං කම්මපච්චයෙන පච්චයො. (1)

චෙතසිකො ධම්මො අචෙතසිකස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චෙතසිකා චෙතනා චිත්තස්ස චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චෙතසිකා චෙතනා විපාකස්ස චිත්තස්ස කටත්තා ච රූපානං කම්මපච්චයෙන පච්චයො. (2)

චෙතසිකො ධම්මො චෙතසිකස්ස ච අචෙතසිකස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – චෙතසිකා චෙතනා සම්පයුත්තකානං ඛන්ධානං චිත්තස්ස ච චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – චෙතසිකා චෙතනා විපාකානං ඛන්ධානං චිත්තස්ස කටත්තා ච රූපානං කම්මපච්චයෙන පච්චයො. (3)

විපාකපච්චයාදි

132. චෙතසිකො ධම්මො චෙතසිකස්ස ධම්මස්ස විපාකපච්චයෙන පච්චයො… නව… ආහාරපච්චයෙන පච්චයො… නව… ඉන්ද්‍රියපච්චයෙන පච්චයො… නව… ඣානපච්චයෙන පච්චයො… තීණි… මග්ගපච්චයෙන පච්චයො… තීණි… සම්පයුත්තපච්චයෙන පච්චයො… පඤ්ච.

විප්පයුත්තපච්චයො

133. චෙතසිකො ධම්මො අචෙතසිකස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං). (1)

අචෙතසිකො ධම්මො අචෙතසිකස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතං – චිත්තං චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ චිත්තං කටත්තාරූපානං විප්පයුත්තපච්චයෙන පච්චයො; චිත්තං වත්ථුස්ස විප්පයුත්තපච්චයෙන පච්චයො; වත්ථු චිත්තස්ස විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස විප්පයුත්තපච්චයෙන පච්චයො…පෙ… කායායතනං කායවිඤ්ඤාණස්ස…පෙ… වත්ථු චිත්තස්ස විප්පයුත්තපච්චයෙන පච්චයො. පච්ඡාජාතං – චිත්තං පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අචෙතසිකො ධම්මො චෙතසිකස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු චෙතසිකානං ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණසහගතානං ඛන්ධානං…පෙ… කායායතනං කායවිඤ්ඤාණසහගතානං ඛන්ධානං…පෙ… වත්ථු චෙතසිකානං ඛන්ධානං විප්පයුත්තපච්චයෙන පච්චයො. (2)

අචෙතසිකො ධම්මො චෙතසිකස්ස ච අචෙතසිකස්ස ච ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු චෙතසිකානං ඛන්ධානං චිත්තස්ස ච විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස සම්පයුත්තකානඤ්ච ඛන්ධානං…පෙ… කායායතනං කායවිඤ්ඤාණස්ස සම්පයුත්තකානඤ්ච ඛන්ධානං…පෙ… වත්ථු චිත්තස්ස සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. (3)

චෙතසිකො ච අචෙතසිකො ච ධම්මා අචෙතසිකස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං (සංඛිත්තං).

අත්ථිපච්චයො

134. චෙතසිකො ධම්මො චෙතසිකස්ස ධම්මස්ස අත්ථිපච්චයෙන පච්චයො… එකං (පටිච්චවාරසදිසං).

චෙතසිකො ධම්මො අචෙතසිකස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං (සංඛිත්තං). (2)

චෙතසිකො ධම්මො චෙතසිකස්ස ච අචෙතසිකස්ස ච ධම්මස්ස අත්ථිපච්චයෙන පච්චයො… එකං (පටිච්චවාරසදිසං). (3)

135. අචෙතසිකො ධම්මො අචෙතසිකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (සංඛිත්තං). (1)

අචෙතසිකො ධම්මො චෙතසිකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – චිත්තං චෙතසිකානං ඛන්ධානං අත්ථිපච්චයෙන පච්චයො; පටිසන්ධික්ඛණෙ චිත්තං…පෙ… පටිසන්ධික්ඛණෙ වත්ථු චෙතසිකානං ඛන්ධානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අනිච්චතො…පෙ… (පුරෙජාතසදිසං නින්නානාකරණං). (2)

අචෙතසිකො ධම්මො චෙතසිකස්ස ච අචෙතසිකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – චිත්තං සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිසන්ධික්ඛණෙ චිත්තං…පෙ… පටිසන්ධික්ඛණෙ වත්ථු චෙතසිකානං ඛන්ධානං චිත්තස්ස ච අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අනිච්චතො…පෙ… (පුරෙජාතසදිසං නින්නානං). (3)

136. චෙතසිකො ච අචෙතසිකො ච ධම්මා චෙතසිකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – චක්ඛුවිඤ්ඤාණසහගතො එකො ඛන්ධො ච චක්ඛායතනඤ්ච ද්වින්නං ඛන්ධානං…පෙ… කායවිඤ්ඤාණසහගතො…පෙ… චෙතසිකො එකො ඛන්ධො ච වත්ථු ච ද්වින්නං ඛන්ධානං අත්ථිපච්චයෙන පච්චයො; ද්වෙ ඛන්ධා ච…පෙ…. සහජාතො – චෙතසිකො එකො ඛන්ධො ච චිත්තඤ්ච ද්වින්නං ඛන්ධානං අත්ථිපච්චයෙන පච්චයො; ද්වෙ ඛන්ධා ච…පෙ… (පටිසන්ධික්ඛණෙ) ද්වෙපි කාතබ්බා. (1)

චෙතසිකො ච අචෙතසිකො ච ධම්මා අචෙතසිකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතා – චක්ඛුවිඤ්ඤාණසහගතා ඛන්ධා ච චක්ඛායතනඤ්ච චක්ඛුවිඤ්ඤාණස්ස…පෙ… කායවිඤ්ඤාණස්ස…පෙ… චෙතසිකා ඛන්ධා ච චිත්තඤ්ච චිත්තසමුට්ඨානානං රූපානං අත්ථිපච්චයෙන පච්චයො; චෙතසිකා ඛන්ධා ච චිත්තඤ්ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. සහජාතා – චෙතසිකා ඛන්ධා ච වත්ථු ච චිත්තස්ස අත්ථිපච්චයෙන පච්චයො (පටිසන්ධික්ඛණෙ තීණිපි කාතබ්බා). පච්ඡාජාතා – චෙතසිකා ඛන්ධා ච චිත්තඤ්ච පුරෙජාතස්ස ඉමස්ස කායස්ස අත්ථිපච්චයෙන පච්චයො. පච්ඡාජාතා – චෙතසිකා ඛන්ධා ච චිත්තඤ්ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – චෙතසිකා ඛන්ධා ච චිත්තඤ්ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

චෙතසිකො ච අචෙතසිකො ච ධම්මා චෙතසිකස්ස ච අචෙතසිකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – චක්ඛුවිඤ්ඤාණසහගතො එකො ඛන්ධො ච චක්ඛායතනඤ්ච ද්වින්නං ඛන්ධානං චක්ඛුවිඤ්ඤාණස්ස ච අත්ථිපච්චයෙන පච්චයො…පෙ… කායවිඤ්ඤාණසහගතො එකො ඛන්ධො ච කායායතනඤ්ච ද්වින්නං ඛන්ධානං කායවිඤ්ඤාණස්ස ච අත්ථිපච්චයෙන පච්චයො; ද්වෙ ඛන්ධා ච…පෙ…. සහජාතො – චෙතසිකො එකො ඛන්ධො ච වත්ථු ච ද්වින්නං ඛන්ධානං චිත්තස්ස ච අත්ථිපච්චයෙන පච්චයො; ද්වෙ ඛන්ධා ච…පෙ… (පටිසන්ධියා ද්වෙ කාතබ්බා). (3)