1. විභඞ්ගවාරො

හෙතුපච්චයො

136. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස හෙතුපච්චයෙන පච්චයො – අලොභො අදොසස්ස අමොහස්ස හෙතුපච්චයෙන පච්චයො (යථා පටිච්චවාරසදිසං). (1)

හෙතු චෙව සහෙතුකො ච ධම්මො සහෙතුකස්ස චෙව න ච හෙතුස්ස ධම්මස්ස හෙතුපච්චයෙන පච්චයො – හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (2)

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස හෙතුපච්චයෙන පච්චයො – අලොභො අදොසස්ස අමොහස්ස සම්පයුත්තකානඤ්ච ඛන්ධානං හෙතුපච්චයෙන පච්චයො (විත්ථාරෙතබ්බං). (3)

ආරම්මණපච්චයො

137. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස ආරම්මණපච්චයෙන පච්චයො – හෙතුං ආරබ්භ හෙතූ උප්පජ්ජන්ති. (1)

හෙතු චෙව සහෙතුකො ච ධම්මො සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො – හෙතුං ආරබ්භ සහෙතුකා චෙව න ච හෙතූ ඛන්ධා උප්පජ්ජන්ති. (2)

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස ආරම්මණපච්චයෙන පච්චයො – හෙතුං ආරබ්භ හෙතූ ච සම්පයුත්තකා ච ඛන්ධා උප්පජ්ජන්ති. (3)

සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති. ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති. පහීනෙ කිලෙසෙ…පෙ… වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. සහෙතුකෙ චෙව න ච හෙතූ ඛන්ධෙ අනිච්චතො…පෙ… දොමනස්සං උප්පජ්ජති. චෙතොපරියඤාණෙන සහෙතුකා චෙව න ච හෙතුචිත්තසමඞ්ගිස්ස චිත්තං ජානාති; ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… සහෙතුකා චෙව න ච හෙතූ ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො. (1)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච ධම්මස්ස ආරම්මණපච්චයෙන පච්චයො – දානං දත්වා… (යථා පඨමගමනං එවං නින්නානං). (2)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස ආරම්මණපච්චයෙන පච්චයො – දානං දත්වා… (යථා පඨමගමනං එවං නින්නානං). (3)

138. හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ හෙතූ උප්පජ්ජන්ති. (1)

හෙතු චෙව සහෙතුකො ච සහෙතුකො චෙව න ච හෙතු ච ධම්මා සහෙතුකස්ස චෙව න ච හෙතුස්ස ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ සහෙතුකා චෙව න ච හෙතූ ඛන්ධා උප්පජ්ජන්ති. (2)

හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ හෙතූ ච සම්පයුත්තකා ච ඛන්ධා උප්පජ්ජන්ති. (3)

අධිපතිපච්චයො

139. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා හෙතූ උප්පජ්ජන්ති. සහජාතාධිපති – හෙතු චෙව සහෙතුකාධිපති සම්පයුත්තකානං හෙතූනං අධිපතිපච්චයෙන පච්චයො. (1)

හෙතු චෙව සහෙතුකො ච ධම්මො සහෙතුකස්ස චෙව න ච හෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා සහෙතුකා චෙව න ච හෙතූ ඛන්ධා උප්පජ්ජන්ති. සහජාතාධිපති – හෙතු චෙව සහෙතුකාධිපති සම්පයුත්තකානං ඛන්ධානං අධිපතිපච්චයෙන පච්චයො. (2)

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා හෙතූ ච සම්පයුත්තකා ච ඛන්ධා උප්පජ්ජන්ති. සහජාතාධිපති – හෙතු චෙව සහෙතුකාධිපති සම්පයුත්තකානං ඛන්ධානං හෙතූනඤ්ච අධිපතිපච්චයෙන පච්චයො. (3)

140. සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති, පුබ්බෙ සුචිණ්ණානි…පෙ… ඣානා වුට්ඨහිත්වා ඣානං ගරුං කත්වා පච්චවෙක්ඛති, අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං ගරුං කත්වා පච්චවෙක්ඛන්ති, සහෙතුකෙ චෙව න ච හෙතූ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – සහෙතුකො චෙව න ච හෙතු අධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා… (පඨමගමනංයෙව). සහජාතාධිපති – සහෙතුකො චෙව න ච හෙතු අධිපති සම්පයුත්තකානං හෙතූනං අධිපතිපච්චයෙන පච්චයො. (2)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා… (පඨමගමනංයෙව). සහජාතාධිපති – සහෙතුකො චෙව න ච හෙතු අධිපති සම්පයුත්තකානං ඛන්ධානං හෙතූනඤ්ච අධිපතිපච්චයෙන පච්චයො. (3)

141. හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච ධම්මස්ස අධිපතිපච්චයෙන පච්චයො. ආරම්මණාධිපති – හෙතූ ච සම්පයුත්තකෙ ච ඛන්ධෙ ගරුං කත්වා හෙතූ උප්පජ්ජන්ති. (1)

හෙතු චෙව සහෙතුකො ච සහෙතුකො චෙව න ච හෙතු ච ධම්මා සහෙතුකස්ස චෙව න ච හෙතුස්ස ධම්මස්ස අධිපතිපච්චයෙන පච්චයො. ආරම්මණාධිපති – හෙතුඤ්ච සම්පයුත්තකෙ ච ඛන්ධෙ ගරුං කත්වා සහෙතුකා චෙව න ච හෙතූ ඛන්ධා උප්පජ්ජන්ති. (2)

හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අධිපතිපච්චයෙන පච්චයො. ආරම්මණාධිපති – හෙතුඤ්ච සම්පයුත්තකෙ ච ඛන්ධෙ ගරුං කත්වා හෙතූ ච සම්පයුත්තකා ච ඛන්ධා උප්පජ්ජන්ති. (3)

අනන්තරපච්චයො

142. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං හෙතූනං අනන්තරපච්චයෙන පච්චයො. (1)

හෙතු චෙව සහෙතුකො ච ධම්මො සහෙතුකස්ස චෙව න ච හෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං සහෙතුකානඤ්චෙව න ච හෙතූනං ඛන්ධානං අනන්තරපච්චයෙන පච්චයො. (2)

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං හෙතූනං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

143. සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා සහෙතුකා චෙව න ච හෙතූ ඛන්ධා පච්ඡිමානං පච්ඡිමානං සහෙතුකානඤ්චෙව න ච හෙතූනං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස… අනුලොමං වොදානස්ස…පෙ… නිරොධා වුට්ඨහන්තස්ස, නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (1)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච ධම්මස්ස අනන්තරපච්චයෙන පච්චයො – පුරිමා පුරිමා සහෙතුකා චෙව න ච හෙතූ ඛන්ධා පච්ඡිමානං පච්ඡිමානං හෙතූනං අනන්තරපච්චයෙන පච්චයො; අනුලොමං ගොත්‍රභුස්ස… (සංඛිත්තං). (2)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අනන්තරපච්චයෙන පච්චයො – පුරිමා පුරිමා සහෙතුකා චෙව න ච හෙතූ ඛන්ධා පච්ඡිමානං පච්ඡිමානං හෙතූනං සම්පයුත්තකානඤ්ච ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස…පෙ…. (3)

(සහෙතුකො චෙව න ච හෙතුමූලකං තීණිපි එකසදිසා.)

144. හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං හෙතූනං අනන්තරපච්චයෙන පච්චයො. (1)

හෙතු චෙව සහෙතුකො ච සහෙතුකො චෙව න ච හෙතු ච ධම්මා සහෙතුකස්ස චෙව න ච හෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං සහෙතුකානඤ්චෙව න ච හෙතූනං ඛන්ධානං අනන්තරපච්චයෙන පච්චයො.(2)

හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං හෙතූනං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

සහජාතපච්චයාදි

145. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො (තීණිපි පච්චයා පටිච්චවාරෙ හෙතුසදිසා).

උපනිස්සයපච්චයො

146. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ හෙතූනං උපනිස්සයපච්චයෙන පච්චයො. (මූලං කාතබ්බං) හෙතූ සහෙතුකානඤ්චෙව න ච හෙතූනං ඛන්ධානං උපනිස්සයපච්චයෙන පච්චයො. (මූලං කාතබ්බං) හෙතූ හෙතූනං සම්පයුත්තකානඤ්ච ඛන්ධානං උපනිස්සයපච්චයෙන පච්චයො (ඉමෙසං ද්වින්නම්පි පඤ්හානං මූලානි පුච්ඡිතබ්බානි).

සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති, සීලං…පෙ… පත්ථනං උපනිස්සාය දානං දෙති…පෙ… සඞ්ඝං භින්දති; සද්ධා…පෙ… පත්ථනා සද්ධාය…පෙ… පත්ථනාය මග්ගස්ස ඵලසමාපත්තියා උපනිස්සයපච්චයෙන පච්චයො. (1)

(සහෙතුකො චෙව න ච හෙතුමූලකෙ ඉමිනාකාරෙන විත්ථාරෙතබ්බා අවසෙසා ද්වෙ පඤ්හා.)

හෙතු චෙව සහෙතුකො ච සහෙතුකො චෙව න ච හෙතු ච ධම්මා හෙතුස්ස චෙව සහෙතුකස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ ච සම්පයුත්තකා ච ඛන්ධා හෙතූනං උපනිස්සයපච්චයෙන පච්චයො. (ද්වෙ මූලානි පුච්ඡිතබ්බානි) හෙතූ ච සම්පයුත්තකා ච ඛන්ධා සහෙතුකානඤ්චෙව න ච හෙතූනං ඛන්ධානං උපනිස්සයපච්චයෙන පච්චයො. (මූලං පුච්ඡිතබ්බං) හෙතූ ච සම්පයුත්තකා ච ඛන්ධා හෙතූනං සම්පයුත්තකානඤ්ච ඛන්ධානං උපනිස්සයපච්චයෙන පච්චයො. (1)

ආසෙවනපච්චයො

147. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස ආසෙවනපච්චයෙන පච්චයො (අනන්තරසදිසං).

කම්මපච්චයො

148. සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙව න ච හෙතූ චෙතනා සම්පයුත්තකානං ඛන්ධානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – සහෙතුකා චෙව න ච හෙතූ චෙතනා විපාකානං සහෙතුකානඤ්චෙව න ච හෙතූනං ඛන්ධානං කම්මපච්චයෙන පච්චයො. (1)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙව න ච හෙතූ චෙතනා සම්පයුත්තකානං හෙතූනං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – සහෙතුකා චෙව න ච හෙතූ චෙතනා විපාකානං හෙතූනං කම්මපච්චයෙන පච්චයො. (2)

සහෙතුකො චෙව න ච හෙතු ධම්මො හෙතුස්ස චෙව සහෙතුකස්ස ච සහෙතුකස්ස චෙව න ච හෙතුස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙව න ච හෙතූ චෙතනා සම්පයුත්තකානං ඛන්ධානං හෙතූනඤ්ච කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – සහෙතුකා චෙව න ච හෙතූ චෙතනා විපාකානං ඛන්ධානං හෙතූනඤ්ච කම්මපච්චයෙන පච්චයො. (3)

විපාකපච්චයො

149. හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස විපාකපච්චයෙන පච්චයො – විපාකො අලොභො අදොසස්ස අමොහස්ස ච විපාකපච්චයෙන පච්චයො (චක්කං); පටිසන්ධික්ඛණෙ අලොභො (යථා හෙතුපච්චයා එවං විත්ථාරෙතබ්බං, නවපි විපාකන්ති නියාමෙතබ්බං).

ආහාරපච්චයාදි

150. සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස ආහාරපච්චයෙන පච්චයො… තීණි.

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස ඉන්ද්‍රියපච්චයෙන පච්චයො (ඉන්ද්‍රියන්ති නියාමෙතබ්බං, නවපි පරිපුණ්ණං).

සහෙතුකො චෙව න ච හෙතු ධම්මො සහෙතුකස්ස චෙව න ච හෙතුස්ස ධම්මස්ස ඣානපච්චයෙන පච්චයො… තීණි.

හෙතු චෙව සහෙතුකො ච ධම්මො හෙතුස්ස චෙව සහෙතුකස්ස ච ධම්මස්ස මග්ගපච්චයෙන පච්චයො … සම්පයුත්තපච්චයෙන පච්චයො… අත්ථිපච්චයෙන පච්චයො… නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.