1. විභඞ්ගවාරො

නඅධිපතිපච්චයාදි

131. හෙතුඤ්චෙව සහෙතුකඤ්ච ධම්මං පටිච්ච හෙතු චෙව සහෙතුකො ච ධම්මො උප්පජ්ජති නඅධිපතිපච්චයා – අලොභං පටිච්ච අදොසො අමොහො (චක්කං); පටිසන්ධික්ඛණෙ…පෙ… (පරිපුණ්ණං නව), නපුරෙජාතෙ නව, නපච්ඡාජාතෙ නව, නආසෙවනෙ නව.

නකම්මපච්චයාදි

132. හෙතුඤ්චෙව සහෙතුකඤ්ච ධම්මං පටිච්ච සහෙතුකො චෙව න ච හෙතු ධම්මො උප්පජ්ජති නකම්මපච්චයා – හෙතුං පටිච්ච සම්පයුත්තකා චෙතනා. (1)

සහෙතුකඤ්චෙව න ච හෙතුං ධම්මං පටිච්ච සහෙතුකො චෙව න ච හෙතු ධම්මො උප්පජ්ජති නකම්මපච්චයා – සහෙතුකෙ චෙව න ච හෙතූ ඛන්ධෙ පටිච්ච සම්පයුත්තකා චෙතනා; පටිසන්ධික්ඛණෙ…පෙ….

හෙතුඤ්චෙව සහෙතුකඤ්ච සහෙතුකඤ්චෙව න ච හෙතුඤ්ච ධම්මං පටිච්ච සහෙතුකො චෙව න ච හෙතු ධම්මො උප්පජ්ජති නකම්මපච්චයා – හෙතුඤ්ච සම්පයුත්තකෙ ච ඛන්ධෙ පටිච්ච සම්පයුත්තකා චෙතනා… නවිපාකපච්චයා… නවිප්පයුත්තපච්චයා.