1. විභඞ්ගවාරො

හෙතුපච්චයො

96. සහෙතුකො ධම්මො සහෙතුකස්ස ධම්මස්ස හෙතුපච්චයෙන පච්චයො – සහෙතුකා හෙතූ සම්පයුත්තකානං ඛන්ධානං හෙතුපච්චයෙන පච්චයො; පටිසන්ධික්ඛණෙ…පෙ…. (1)

සහෙතුකො ධම්මො අහෙතුකස්ස ධම්මස්ස හෙතුපච්චයෙන පච්චයො – සහෙතුකා හෙතූ චිත්තසමුට්ඨානානං රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස හෙතුපච්චයෙන පච්චයො – සහෙතුකා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (3)

97. අහෙතුකො ධම්මො අහෙතුකස්ස ධම්මස්ස හෙතුපච්චයෙන පච්චයො – විචිකිච්ඡාසහගතො උද්ධච්චසහගතො මොහො චිත්තසමුට්ඨානානං රූපානං හෙතුපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස හෙතුපච්චයෙන පච්චයො – විචිකිච්ඡාසහගතො උද්ධච්චසහගතො මොහො සම්පයුත්තකානං ඛන්ධානං හෙතුපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස හෙතුපච්චයෙන පච්චයො – විචිකිච්ඡාසහගතො උද්ධච්චසහගතො මොහො සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. (3)

ආරම්මණපච්චයො

98. සහෙතුකො ධම්මො සහෙතුකස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, ඣානා වුට්ඨහිත්වා ඣානං පච්චවෙක්ඛති. අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති. පහීනෙ කිලෙසෙ…පෙ… වික්ඛම්භිතෙ කිලෙසෙ…පෙ… පුබ්බෙ…පෙ… සහෙතුකෙ ඛන්ධෙ අනිච්චතො…පෙ… දොමනස්සං උප්පජ්ජති; කුසලාකුසලෙ නිරුද්ධෙ සහෙතුකො විපාකො තදාරම්මණතා උප්පජ්ජති; චෙතොපරියඤාණෙන සහෙතුකචිත්තසමඞ්ගිස්ස චිත්තං ජානන්ති. ආකාසානඤ්චායතනං විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… සහෙතුකා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආරම්මණපච්චයෙන පච්චයො; සහෙතුකෙ ඛන්ධෙ ආරබ්භ සහෙතුකා ඛන්ධා උප්පජ්ජන්ති. (1)

සහෙතුකො ධම්මො අහෙතුකස්ස ධම්මස්ස ආරම්මණපච්චයෙන පච්චයො – සහෙතුකෙ ඛන්ධෙ අනිච්චතො …පෙ… දොමනස්සං උප්පජ්ජති, කුසලාකුසලෙ නිරුද්ධෙ අහෙතුකො විපාකො තදාරම්මණතා උප්පජ්ජති, සහෙතුකෙ ඛන්ධෙ ආරබ්භ අහෙතුකා ඛන්ධා ච මොහො ච උප්පජ්ජන්ති. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස ආරම්මණපච්චයෙන පච්චයො – සහෙතුකෙ ඛන්ධෙ ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති. (3)

99. අහෙතුකො ධම්මො අහෙතුකස්ස ධම්මස්ස ආරම්මණපච්චයෙන පච්චයො – නිබ්බානං ආවජ්ජනාය ආරම්මණපච්චයෙන පච්චයො; චක්ඛුං…පෙ… වත්ථුං… අහෙතුකෙ ඛන්ධෙ ච මොහඤ්ච අනිච්චතො…පෙ… දොමනස්සං උප්පජ්ජති; කුසලාකුසලෙ නිරුද්ධෙ අහෙතුකො විපාකො තදාරම්මණතා උප්පජ්ජති; රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… අහෙතුකෙ ඛන්ධෙ ච මොහඤ්ච ආරබ්භ අහෙතුකා ඛන්ධා ච මොහො ච උප්පජ්ජන්ති. (1)

අහෙතුකො ධම්මො සහෙතුකස්ස ධම්මස්ස ආරම්මණපච්චයෙන පච්චයො – අරියා නිබ්බානං පච්චවෙක්ඛන්ති; නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස ආරම්මණපච්චයෙන පච්චයො. අරියා අහෙතුකෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ…පෙ… පුබ්බෙ…පෙ… චක්ඛුං…පෙ… වත්ථුං…පෙ… අහෙතුකෙ ඛන්ධෙ ච මොහඤ්ච අනිච්චතො…පෙ… දොමනස්සං උප්පජ්ජති; කුසලාකුසලෙ නිරුද්ධෙ සහෙතුකො විපාකො තදාරම්මණතා උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන අහෙතුකචිත්තසමඞ්ගිස්ස චිත්තං ජානන්ති; අහෙතුකා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස ආරම්මණපච්චයෙන පච්චයො; අහෙතුකෙ ඛන්ධෙ ච මොහඤ්ච ආරබ්භ සහෙතුකා ඛන්ධා උප්පජ්ජන්ති. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස ආරම්මණපච්චයෙන පච්චයො – චක්ඛුං ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති; සොතං …පෙ… වත්ථුං… අහෙතුකෙ ඛන්ධෙ ච මොහඤ්ච ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති. (3)

100. සහෙතුකො ච අහෙතුකො ච ධම්මා සහෙතුකස්ස ධම්මස්ස ආරම්මණපච්චයෙන පච්චයො – විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච ආරබ්භ සහෙතුකා ඛන්ධා උප්පජ්ජන්ති. (1)

සහෙතුකො ච අහෙතුකො ච ධම්මා අහෙතුකස්ස ධම්මස්ස ආරම්මණපච්චයෙන පච්චයො – විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච ආරබ්භ අහෙතුකා ඛන්ධා ච මොහො ච උප්පජ්ජන්ති. (2)

සහෙතුකො ච අහෙතුකො ච ධම්මා සහෙතුකස්ස ච අහෙතුකස්ස ච ධම්මස්ස ආරම්මණපච්චයෙන පච්චයො – විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති. (3)

අධිපතිපච්චයො

101. සහෙතුකො ධම්මො සහෙතුකස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති, ඣානා…පෙ… අරියා මග්ගා වුට්ඨහිත්වා මග්ගං ගරුං කත්වා…පෙ… ඵලං…පෙ… සහෙතුකෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – සහෙතුකාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

සහෙතුකො ධම්මො අහෙතුකස්ස ධම්මස්ස අධිපතිපච්චයෙන පච්චයො. සහජාතාධිපති – සහෙතුකාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස අධිපතිපච්චයෙන පච්චයො. සහජාතාධිපති – සහෙතුකාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

අහෙතුකො ධම්මො සහෙතුකස්ස ධම්මස්ස අධිපතිපච්චයෙන පච්චයො. ආරම්මණාධිපති – අරියා නිබ්බානං ගරුං කත්වා පච්චවෙක්ඛන්ති; නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො; චක්ඛුං…පෙ… වත්ථුං… අහෙතුකෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා රාගො උප්පජ්ජති, දිට්ඨි උප්පජ්ජති. (1)

අනන්තරපච්චයො

102. සහෙතුකො ධම්මො සහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා සහෙතුකා ඛන්ධා පච්ඡිමානං පච්ඡිමානං සහෙතුකානං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස… මග්ගො ඵලස්ස… ඵලං ඵලස්ස… අනුලොමං ඵලසමාපත්තියා… නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (1)

සහෙතුකො ධම්මො අහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා උද්ධච්චසහගතා ඛන්ධා පච්ඡිමස්ස පච්ඡිමස්ස විචිකිච්ඡාසහගතස්ස උද්ධච්චසහගතස්ස මොහස්ස අනන්තරපච්චයෙන පච්චයො; සහෙතුකං චුතිචිත්තං අහෙතුකස්ස උපපත්තිචිත්තස්ස අනන්තරපච්චයෙන පච්චයො; සහෙතුකං භවඞ්ගං ආවජ්ජනාය අනන්තරපච්චයෙන පච්චයො; සහෙතුකං භවඞ්ගං අහෙතුකස්ස භවඞ්ගස්ස අනන්තරපච්චයෙන පච්චයො; සහෙතුකා ඛන්ධා අහෙතුකස්ස වුට්ඨානස්ස අනන්තරපච්චයෙන පච්චයො. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා උද්ධච්චසහගතා ඛන්ධා පච්ඡිමානං පච්ඡිමානං විචිකිච්ඡාසහගතානං උද්ධච්චසහගතානං ඛන්ධානං මොහස්ස ච අනන්තරපච්චයෙන පච්චයො. (3)

103. අහෙතුකො ධම්මො අහෙතුකස්ස ධම්මස්ස අනන්තරපච්චයෙන පච්චයො – පුරිමො පුරිමො විචිකිච්ඡාසහගතො උද්ධච්චසහගතො මොහො පච්ඡිමස්ස පච්ඡිමස්ස විචිකිච්ඡාසහගතස්ස උද්ධච්චසහගතස්ස මොහස්ස අනන්තරපච්චයෙන පච්චයො; පුරිමා පුරිමා අහෙතුකා ඛන්ධා පච්ඡිමානං පච්ඡිමානං අහෙතුකානං ඛන්ධානං අනන්තරපච්චයෙන පච්චයො; ආවජ්ජනා පඤ්චන්නං විඤ්ඤාණානං අනන්තරපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස අනන්තරපච්චයෙන පච්චයො – පුරිමො පුරිමො විචිකිච්ඡාසහගතො උද්ධච්චසහගතො මොහො පච්ඡිමානං පච්ඡිමානං විචිකිච්ඡාසහගතානං උද්ධච්චසහගතානං ඛන්ධානං අනන්තරපච්චයෙන පච්චයො; අහෙතුකං චුතිචිත්තං සහෙතුකස්ස උපපත්තිචිත්තස්ස අනන්තරපච්චයෙන පච්චයො; අහෙතුකං භවඞ්ගං සහෙතුකස්ස භවඞ්ගස්ස අනන්තරපච්චයෙන පච්චයො; ආවජ්ජනා සහෙතුකානං ඛන්ධානං අනන්තරපච්චයෙන පච්චයො; අහෙතුකා ඛන්ධා සහෙතුකස්ස වුට්ඨානස්ස අනන්තරපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස අනන්තරපච්චයෙන පච්චයො – පුරිමො පුරිමො විචිකිච්ඡාසහගතො උද්ධච්චසහගතො මොහො පච්ඡිමානං පච්ඡිමානං විචිකිච්ඡාසහගතානං උද්ධච්චසහගතානං ඛන්ධානං මොහස්ස ච අනන්තරපච්චයෙන පච්චයො; ආවජ්ජනා විචිකිච්ඡාසහගතානං උද්ධච්චසහගතානං ඛන්ධානං මොහස්ස ච අනන්තරපච්චයෙන පච්චයො. (3)

104. සහෙතුකො ච අහෙතුකො ච ධම්මා සහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා උද්ධච්චසහගතා ඛන්ධා ච මොහො ච පච්ඡිමානං පච්ඡිමානං විචිකිච්ඡාසහගතානං උද්ධච්චසහගතානං ඛන්ධානං අනන්තරපච්චයෙන පච්චයො. (1)

සහෙතුකො ච අහෙතුකො ච ධම්මා අහෙතුකස්ස ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා උද්ධච්චසහගතා ඛන්ධා ච මොහො ච පච්ඡිමස්ස පච්ඡිමස්ස විචිකිච්ඡාසහගතස්ස උද්ධච්චසහගතස්ස මොහස්ස අනන්තරපච්චයෙන පච්චයො; විචිකිච්ඡාසහගතා උද්ධච්චසහගතා ඛන්ධා ච මොහො ච අහෙතුකස්ස වුට්ඨානස්ස අනන්තරපච්චයෙන පච්චයො. (2)

සහෙතුකො ච අහෙතුකො ච ධම්මා සහෙතුකස්ස ච අහෙතුකස්ස ච ධම්මස්ස අනන්තරපච්චයෙන පච්චයො – පුරිමා පුරිමා විචිකිච්ඡාසහගතා උද්ධච්චසහගතා ඛන්ධා ච මොහො ච පච්ඡිමානං පච්ඡිමානං විචිකිච්ඡාසහගතානං උද්ධච්චසහගතානං ඛන්ධානං මොහස්ස ච අනන්තරපච්චයෙන පච්චයො. (3)

සහජාතපච්චයාදි

105. සහෙතුකො ධම්මො සහෙතුකස්ස ධම්මස්ස සහජාතපච්චයෙන පච්චයො (පටිච්චවාරෙ සහජාතසදිසං, ඉහ ඝටනා නත්ථි)… අඤ්ඤමඤ්ඤපච්චයෙන පච්චයො (පටිච්චවාරසදිසං)… නිස්සයපච්චයෙන පච්චයො (පටිච්චවාරෙ නිස්සයපච්චයසදිසං, ඉහ ඝටනා නත්ථි).

උපනිස්සයපච්චයො

106. සහෙතුකො ධම්මො සහෙතුකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – සහෙතුකා ඛන්ධා සහෙතුකානං ඛන්ධානං උපනිස්සයපච්චයෙන පච්චයො. (1)

සහෙතුකො ධම්මො අහෙතුකස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – සහෙතුකා ඛන්ධා අහෙතුකානං ඛන්ධානං මොහස්ස ච උපනිස්සයපච්චයෙන පච්චයො. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – සහෙතුකා ඛන්ධා විචිකිච්ඡාසහගතානං උද්ධච්චසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

107. අහෙතුකො ධම්මො අහෙතුකස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – කායිකං සුඛං කායිකස්ස සුඛස්ස, කායිකස්ස දුක්ඛස්ස, මොහස්ස ච උපනිස්සයපච්චයෙන පච්චයො; කායිකං දුක්ඛං… උතු… භොජනං… සෙනාසනං කායිකස්ස සුඛස්ස, කායිකස්ස දුක්ඛස්ස, මොහස්ස ච උපනිස්සයපච්චයෙන පච්චයො; මොහො කායිකස්ස සුඛස්ස, කායිකස්ස දුක්ඛස්ස, මොහස්ස ච උපනිස්සයපච්චයෙන පච්චයො; කායිකං සුඛං… කායිකං දුක්ඛං… උතු… භොජනං, සෙනාසනං, මොහො ච කායිකස්ස සුඛස්ස, කායිකස්ස දුක්ඛස්ස, මොහස්ස ච උපනිස්සයපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – කායිකං සුඛං උපනිස්සාය දානං දෙති…පෙ… සඞ්ඝං භින්දති; කායිකං දුක්ඛං… උතුං… භොජනං… සෙනාසනං… මොහං උපනිස්සාය දානං දෙති…පෙ… සඞ්ඝං භින්දති; කායිකං සුඛං…පෙ… මොහො ච සද්ධාය…පෙ… පඤ්ඤාය රාගස්ස…පෙ… පත්ථනාය මග්ගස්ස ඵලසමාපත්තියා උපනිස්සයපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – කායිකං සුඛං මොහො ච විචිකිච්ඡාසහගතානං උද්ධච්චසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

108. සහෙතුකො ච අහෙතුකො ච ධම්මා සහෙතුකස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – විචිකිච්ඡාසහගතා උද්ධච්චසහගතා ඛන්ධා ච මොහො ච සහෙතුකානං ඛන්ධානං උපනිස්සයපච්චයෙන පච්චයො. (1)

සහෙතුකො ච අහෙතුකො ච ධම්මා අහෙතුකස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – විචිකිච්ඡාසහගතා උද්ධච්චසහගතා ඛන්ධා ච මොහො ච අහෙතුකානං ඛන්ධානං මොහස්ස ච උපනිස්සයපච්චයෙන පච්චයො. (2)

සහෙතුකො ච අහෙතුකො ච ධම්මා සහෙතුකස්ස ච අහෙතුකස්ස ච ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – විචිකිච්ඡාසහගතා උද්ධච්චසහගතා ඛන්ධා ච මොහො ච විචිකිච්ඡාසහගතානං උද්ධච්චසහගතානං ඛන්ධානං මොහස්ස ච උපනිස්සයපච්චයෙන පච්චයො. (3)

පුරෙජාතපච්චයො

109. අහෙතුකො ධම්මො අහෙතුකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති, කුසලාකුසලෙ නිරුද්ධෙ අහෙතුකො විපාකො තදාරම්මණතා උප්පජ්ජති; රූපායතනං චක්ඛුවිඤ්ඤාණස්ස …පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස… පුරෙජාතං වත්ථු අහෙතුකානං ඛන්ධානං මොහස්ස ච පුරෙජාතපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; කුසලාකුසලෙ නිරුද්ධෙ සහෙතුකො විපාකො තදාරම්මණතා උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. වත්ථුපුරෙජාතං – වත්ථු සහෙතුකානං ඛන්ධානං පුරෙජාතපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති. වත්ථුපුරෙජාතං – වත්ථු විචිකිච්ඡාසහගතානං උද්ධච්චසහගතානං ඛන්ධානං මොහස්ස ච පුරෙජාතපච්චයෙන පච්චයො. (3)

පච්ඡාජාතපච්චයාදි

110. සහෙතුකො ධම්මො අහෙතුකස්ස ධම්මස්ස පච්ඡාජාතපච්චයෙන පච්චයො – පච්ඡාජාතා සහෙතුකා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

අහෙතුකො ධම්මො අහෙතුකස්ස ධම්මස්ස පච්ඡාජාතපච්චයෙන පච්චයො – පච්ඡාජාතා අහෙතුකා ඛන්ධා ච මොහො ච පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

සහෙතුකො ච අහෙතුකො ච ධම්මා අහෙතුකස්ස ධම්මස්ස පච්ඡාජාතපච්චයෙන පච්චයො – පච්ඡාජාතා විචිකිච්ඡාසහගතා උද්ධච්චසහගතා ඛන්ධා ච මොහො ච පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

සහෙතුකො ධම්මො සහෙතුකස්ස ධම්මස්ස ආසෙවනපච්චයෙන පච්චයො (අනන්තරසදිසං. ආවජ්ජනම්පි භවඞ්ගම්පි නත්ථි, ආසෙවනපච්චයෙ වජ්ජෙතබ්බා නවපි ).

කම්මපච්චයො

111. සහෙතුකො ධම්මො සහෙතුකස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙතනා සම්පයුත්තකානං ඛන්ධානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – සහෙතුකා චෙතනා විපාකානං සහෙතුකානං ඛන්ධානං කම්මපච්චයෙන පච්චයො. (1)

සහෙතුකො ධම්මො අහෙතුකස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙතනා චිත්තසමුට්ඨානානං රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – සහෙතුකා චෙතනා විපාකානං අහෙතුකානං ඛන්ධානං කටත්තා ච රූපානං කම්මපච්චයෙන පච්චයො. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – සහෙතුකා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. නානාක්ඛණිකා – සහෙතුකා චෙතනා විපාකානං සහෙතුකානං ඛන්ධානං කටත්තා ච රූපානං කම්මපච්චයෙන පච්චයො. (3)

අහෙතුකො ධම්මො අහෙතුකස්ස ධම්මස්ස කම්මපච්චයෙන පච්චයො – අහෙතුකා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. (1)

විපාකපච්චයො

112. සහෙතුකො ධම්මො සහෙතුකස්ස ධම්මස්ස විපාකපච්චයෙන පච්චයො – විපාකො සහෙතුකො එකො ඛන්ධො තිණ්ණන්නං ඛන්ධානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (1)

සහෙතුකො ධම්මො අහෙතුකස්ස ධම්මස්ස විපාකපච්චයෙන පච්චයො – විපාකා සහෙතුකා ඛන්ධා චිත්තසමුට්ඨානානං රූපානං විපාකපච්චයෙන පච්චයො; පටිසන්ධික්ඛණෙ…පෙ…. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස විපාකපච්චයෙන පච්චයො – විපාකො සහෙතුකො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (3)

අහෙතුකො ධම්මො අහෙතුකස්ස ධම්මස්ස විපාකපච්චයෙන පච්චයො – විපාකො අහෙතුකො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස විපාකපච්චයෙන පච්චයො. (1)

ආහාරපච්චයො

113. සහෙතුකො ධම්මො සහෙතුකස්ස ධම්මස්ස ආහාරපච්චයෙන පච්චයො… තීණි.

අහෙතුකො ධම්මො අහෙතුකස්ස ධම්මස්ස ආහාරපච්චයෙන පච්චයො – අහෙතුකා ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං…පෙ… පටිසන්ධික්ඛණෙ…පෙ… කබළීකාරො ආහාරො ඉමස්ස කායස්ස ආහාරපච්චයෙන පච්චයො. (1)

ඉන්ද්‍රියපච්චයාදි

114. සහෙතුකො ධම්මො සහෙතුකස්ස ධම්මස්ස ඉන්ද්‍රියපච්චයෙන පච්චයො… තීණි.

අහෙතුකො ධම්මො අහෙතුකස්ස ධම්මස්ස ඉන්ද්‍රියපච්චයෙන පච්චයො – අහෙතුකා ඉන්ද්‍රියා සම්පයුත්තකානං ඛන්ධානං චිත්තසමුට්ඨානානඤ්ච රූපානං…පෙ… පටිසන්ධික්ඛණෙ…පෙ… චක්ඛුන්ද්‍රියං චක්ඛුවිඤ්ඤාණස්ස…පෙ… කායින්ද්‍රියං කායවිඤ්ඤාණස්ස ඉන්ද්‍රියපච්චයෙන පච්චයො; රූපජීවිතින්ද්‍රියං කටත්තාරූපානං ඉන්ද්‍රියපච්චයෙන පච්චයො. (1)

සහෙතුකො ධම්මො සහෙතුකස්ස ධම්මස්ස ඣානපච්චයෙන පච්චයො… තීණි.

අහෙතුකො ධම්මො අහෙතුකස්ස ධම්මස්ස ඣානපච්චයෙන පච්චයො – අහෙතුකානි ඣානඞ්ගානි සම්පයුත්තකානං ඛන්ධානං චිත්තසමුට්ඨානානඤ්ච රූපානං…පෙ… පටිසන්ධික්ඛණෙ…පෙ…. (1)

සහෙතුකො ධම්මො සහෙතුකස්ස ධම්මස්ස මග්ගපච්චයෙන පච්චයො… තීණි.

සහෙතුකො ධම්මො සහෙතුකස්ස ධම්මස්ස සම්පයුත්තපච්චයෙන පච්චයො (පටිච්චවාරෙ සම්පයුත්තසදිසා ඡ පඤ්හා).

විප්පයුත්තපච්චයො

115. සහෙතුකො ධම්මො අහෙතුකස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – සහෙතුකා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ සහෙතුකා ඛන්ධා කටත්තාරූපානං විප්පයුත්තපච්චයෙන පච්චයො. පච්ඡාජාතා – සහෙතුකා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අහෙතුකො ධම්මො අහෙතුකස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතා – අහෙතුකා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ අහෙතුකා ඛන්ධා කටත්තාරූපානං විප්පයුත්තපච්චයෙන පච්චයො; ඛන්ධා වත්ථුස්ස විප්පයුත්තපච්චයෙන පච්චයො; වත්ථු ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස… වත්ථු අහෙතුකානං ඛන්ධානං මොහස්ස ච විප්පයුත්තපච්චයෙන පච්චයො. පච්ඡාජාතා – අහෙතුකා ඛන්ධා ච මොහො ච පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු සහෙතුකානං ඛන්ධානං විප්පයුත්තපච්චයෙන පච්චයො. පුරෙජාතං – වත්ථු සහෙතුකානං ඛන්ධානං විප්පයුත්තපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස විප්පයුත්තපච්චයෙන පච්චයො. පුරෙජාතං – වත්ථු විචිකිච්ඡාසහගතානං උද්ධච්චසහගතානං ඛන්ධානං මොහස්ස ච විප්පයුත්තපච්චයෙන පච්චයො. (3)

සහෙතුකො ච අහෙතුකො ච ධම්මා අහෙතුකස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – විචිකිච්ඡාසහගතා උද්ධච්චසහගතා ඛන්ධා ච මොහො ච චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතා – විචිකිච්ඡාසහගතා උද්ධච්චසහගතා ඛන්ධා ච මොහො ච පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයො

116. සහෙතුකො ධම්මො සහෙතුකස්ස ධම්මස්ස අත්ථිපච්චයෙන පච්චයො – සහෙතුකො එකො ඛන්ධො තිණ්ණන්නං ඛන්ධානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (1)

සහෙතුකො ධම්මො අහෙතුකස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – සහෙතුකා ඛන්ධා චිත්තසමුට්ඨානානං රූපානං අත්ථිපච්චයෙන පච්චයො; විචිකිච්ඡාසහගතා උද්ධච්චසහගතා ඛන්ධා මොහස්ස ච චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිසන්ධික්ඛණෙ…පෙ…. පච්ඡාජාතා – සහෙතුකා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

සහෙතුකො ධම්මො සහෙතුකස්ස ච අහෙතුකස්ස ච ධම්මස්ස අත්ථිපච්චයෙන පච්චයො – සහෙතුකො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො; විචිකිච්ඡාසහගතො උද්ධච්චසහගතො එකො ඛන්ධො තිණ්ණන්නං ඛන්ධානං මොහස්ස ච චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ සහෙතුකො…පෙ…. (3)

117. අහෙතුකො ධම්මො අහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – අහෙතුකො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… විචිකිච්ඡාසහගතො උද්ධච්චසහගතො මොහො චිත්තසමුට්ඨානානං රූපානං අත්ථිපච්චයෙන පච්චයො; පටිසන්ධික්ඛණෙ…පෙ… (යාව අසඤ්ඤසත්තා කාතබ්බං). පුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති, කුසලාකුසලෙ නිරුද්ධෙ අහෙතුකො විපාකො තදාරම්මණතා උප්පජ්ජති; රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ… චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස අත්ථිපච්චයෙන පච්චයො; වත්ථු අහෙතුකානං ඛන්ධානං මොහස්ස ච අත්ථිපච්චයෙන පච්චයො. පච්ඡාජාතා – අහෙතුකා ඛන්ධා ච මොහො ච පුරෙජාතස්ස ඉමස්ස කායස්ස අත්ථිපච්චයෙන පච්චයො; කබළීකාරො ආහාරො ඉමස්ස කායස්ස අත්ථිපච්චයෙන පච්චයො; රූපජීවිතින්ද්‍රියං කටත්තාරූපානං අත්ථිපච්චයෙන පච්චයො. (1)

අහෙතුකො ධම්මො සහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – විචිකිච්ඡාසහගතො උද්ධච්චසහගතො මොහො සම්පයුත්තකානං ඛන්ධානං අත්ථිපච්චයෙන පච්චයො; පටිසන්ධික්ඛණෙ වත්ථු සහෙතුකානං ඛන්ධානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; කුසලාකුසලෙ නිරුද්ධෙ සහෙතුකො විපාකො තදාරම්මණතා උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, වත්ථු සහෙතුකානං ඛන්ධානං අත්ථිපච්චයෙන පච්චයො. (2)

අහෙතුකො ධම්මො සහෙතුකස්ස ච අහෙතුකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – විචිකිච්ඡාසහගතො උද්ධච්චසහගතො මොහො සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං ආරබ්භ විචිකිච්ඡාසහගතා උද්ධච්චසහගතා ඛන්ධා ච මොහො ච උප්පජ්ජන්ති, වත්ථු විචිකිච්ඡාසහගතානං උද්ධච්චසහගතානං ඛන්ධානං මොහස්ස ච අත්ථිපච්චයෙන පච්චයො. (3)

118. සහෙතුකො ච අහෙතුකො ච ධම්මා සහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – විචිකිච්ඡාසහගතො උද්ධච්චසහගතො එකො ඛන්ධො ච මොහො ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ… පටිසන්ධික්ඛණෙ සහෙතුකො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. සහජාතො – සහෙතුකො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. (1)

සහෙතුකො ච අහෙතුකො ච ධම්මා අහෙතුකස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතා – සහෙතුකා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො; විචිකිච්ඡාසහගතා උද්ධච්චසහගතා ඛන්ධා ච මොහො ච චිත්තසමුට්ඨානානං රූපානං අත්ථිපච්චයෙන පච්චයො; පටිසන්ධික්ඛණෙ සහෙතුකා ඛන්ධා ච මහාභූතා ච කටත්තාරූපානං අත්ථිපච්චයෙන පච්චයො. සහජාතා – විචිකිච්ඡාසහගතා උද්ධච්චසහගතා ඛන්ධා ච වත්ථු ච මොහස්ස අත්ථිපච්චයෙන පච්චයො. පච්ඡාජාතා – විචිකිච්ඡාසහගතා උද්ධච්චසහගතා ඛන්ධා ච මොහො ච පුරෙජාතස්ස ඉමස්ස කායස්ස අත්ථිපච්චයෙන පච්චයො. පච්ඡාජාතා – සහෙතුකා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – සහෙතුකා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

සහෙතුකො ච අහෙතුකො ච ධම්මා සහෙතුකස්ස ච අහෙතුකස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – විචිකිච්ඡාසහගතො උද්ධච්චසහගතො එකො ඛන්ධො ච මොහො ච තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ…. සහජාතො – විචිකිච්ඡාසහගතො උද්ධච්චසහගතො එකො ඛන්ධො ච වත්ථු ච තිණ්ණන්නං ඛන්ධානං මොහස්ස ච අත්ථිපච්චයෙන පච්චයො…පෙ… ද්වෙ ඛන්ධා ච…පෙ…. (3)