1. විභඞ්ගවාරො

නහෙතුපච්චයො

82. සහෙතුකං ධම්මං පච්චයා අහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (1)

අහෙතුකං ධම්මං පච්චයා අහෙතුකො ධම්මො උප්පජ්ජති නහෙතුපච්චයා – අහෙතුකං එකං ඛන්ධං…පෙ… පටිසන්ධික්ඛණෙ…පෙ… (යාව අසඤ්ඤසත්තා), චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා ඛන්ධා මොහො ච. (1)

සහෙතුකඤ්ච අහෙතුකඤ්ච ධම්මං පච්චයා අහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො (සංඛිත්තං). (1)