1. විභඞ්ගවාරො

හෙතුපච්චයො

72. සහෙතුකං ධම්මං පච්චයා සහෙතුකො ධම්මො උප්පජ්ජති හෙතුපච්චයා (සහෙතුකමූලකං පටිච්චවාරසදිසං).

අහෙතුකං ධම්මං පච්චයා අහෙතුකො ධම්මො…පෙ… (පටිච්චවාරසදිසංයෙව). (1)

අහෙතුකං ධම්මං පච්චයා සහෙතුකො ධම්මො උප්පජ්ජති හෙතුපච්චයා – වත්ථුං පච්චයා සහෙතුකා ඛන්ධා, විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා; පටිසන්ධික්ඛණෙ වත්ථුං පච්චයා සහෙතුකා ඛන්ධා. (2)

අහෙතුකං ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති හෙතුපච්චයා – වත්ථුං පච්චයා සහෙතුකා ඛන්ධා, මහාභූතෙ පච්චයා චිත්තසමුට්ඨානං රූපං, විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං; පටිසන්ධික්ඛණෙ වත්ථුං…පෙ…. (3)

73. සහෙතුකඤ්ච අහෙතුකඤ්ච ධම්මං පච්චයා සහෙතුකො ධම්මො උප්පජ්ජති හෙතුපච්චයා – සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සහෙතුකඤ්ච අහෙතුකඤ්ච ධම්මං පච්චයා අහෙතුකො ධම්මො උප්පජ්ජති හෙතුපච්චයා – සහෙතුකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ…. (2)

සහෙතුකඤ්ච අහෙතුකඤ්ච ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති හෙතුපච්චයා – සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පච්චයා කටත්තාරූපං. (3)

ආරම්මණපච්චයො

74. සහෙතුකං ධම්මං පච්චයා සහෙතුකො ධම්මො උප්පජ්ජති ආරම්මණපච්චයා – සහෙතුකං එකං ඛන්ධං පච්චයා තයො ඛන්ධා…පෙ… පටිසන්ධික්ඛණෙ…පෙ…. (1)

සහෙතුකං ධම්මං පච්චයා අහෙතුකො ධම්මො උප්පජ්ජති ආරම්මණපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පච්චයා විචිකිච්ඡාසහගතො උද්ධච්චසහගතො මොහො. (2)

සහෙතුකං ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති ආරම්මණපච්චයා – විචිකිච්ඡාසහගතං උද්ධච්චසහගතං එකං ඛන්ධං පච්චයා තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

75. අහෙතුකං ධම්මං පච්චයා අහෙතුකො ධම්මො උප්පජ්ජති ආරම්මණපච්චයා – අහෙතුකං එකං ඛන්ධං…පෙ… ද්වෙ ඛන්ධෙ…පෙ… පටිසන්ධික්ඛණෙ වත්ථුං පච්චයා ඛන්ධා, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා ඛන්ධා. (1)

අහෙතුකං ධම්මං පච්චයා සහෙතුකො ධම්මො උප්පජ්ජති ආරම්මණපච්චයා – වත්ථුං පච්චයා සහෙතුකා ඛන්ධා, විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා; පටිසන්ධික්ඛණෙ…පෙ…. (2)

අහෙතුකං ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති ආරම්මණපච්චයා – වත්ථුං පච්චයා විචිකිච්ඡාසහගතා උද්ධච්චසහගතා ඛන්ධා මොහො ච. (3)

76. සහෙතුකඤ්ච අහෙතුකඤ්ච ධම්මං පච්චයා සහෙතුකො ධම්මො උප්පජ්ජති ආරම්මණපච්චයා – සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සහෙතුකඤ්ච අහෙතුකඤ්ච ධම්මං පච්චයා අහෙතුකො ධම්මො උප්පජ්ජති ආරම්මණපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (2)

සහෙතුකඤ්ච අහෙතුකඤ්ච ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති ආරම්මණපච්චයා – විචිකිච්ඡාසහගතං උද්ධච්චසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

අධිපතිපච්චයො

77. සහෙතුකං ධම්මං පච්චයා සහෙතුකො ධම්මො උප්පජ්ජති අධිපතිපච්චයා (අධිපතියා නව පඤ්හා පවත්තෙයෙව).

අනන්තරපච්චයාදි

78. සහෙතුකං ධම්මං පච්චයා සහෙතුකො ධම්මො උප්පජ්ජති අනන්තරපච්චයා… සමනන්තරපච්චයා… සහජාතපච්චයා… තීණි (පටිච්චවාරසදිසා).

අහෙතුකං ධම්මං පච්චයා අහෙතුකො ධම්මො උප්පජ්ජති සහජාතපච්චයා – අහෙතුකං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… (යාව අසඤ්ඤසත්තා), චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා ඛන්ධා. (1)

අහෙතුකං ධම්මං පච්චයා සහෙතුකො ධම්මො උප්පජ්ජති සහජාතපච්චයා – වත්ථුං පච්චයා සහෙතුකා ඛන්ධා, විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා; පටිසන්ධික්ඛණෙ…පෙ…. (2)

අහෙතුකං ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති සහජාතපච්චයා – වත්ථුං පච්චයා සහෙතුකා ඛන්ධා, මහාභූතෙ පච්චයා චිත්තසමුට්ඨානං රූපං, විචිකිච්ඡාසහගතං උද්ධච්චසහගතං මොහං පච්චයා සම්පයුත්තකා ඛන්ධා චිත්තසමුට්ඨානඤ්ච රූපං; පටිසන්ධික්ඛණෙ වත්ථුං…පෙ…. (3)

79. සහෙතුකඤ්ච අහෙතුකඤ්ච ධම්මං පච්චයා සහෙතුකො ධම්මො උප්පජ්ජති සහජාතපච්චයා – සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සහෙතුකඤ්ච අහෙතුකඤ්ච ධම්මං පච්චයා අහෙතුකො ධම්මො උප්පජ්ජති සහජාතපච්චයා – සහෙතුකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පච්චයා චිත්තසමුට්ඨානං රූපං; පටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (2)

සහෙතුකඤ්ච අහෙතුකඤ්ච ධම්මං පච්චයා සහෙතුකො ච අහෙතුකො ච ධම්මා උප්පජ්ජන්ති සහජාතපච්චයා – සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, විචිකිච්ඡාසහගතං උද්ධච්චසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… විචිකිච්ඡාසහගතං උද්ධච්චසහගතං එකං ඛන්ධඤ්ච වත්ථුඤ්ච පච්චයා තයො ඛන්ධා මොහො ච…පෙ… පටිසන්ධික්ඛණෙ සහෙතුකං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පච්චයා කටත්තාරූපං. (3)

අඤ්ඤමඤ්ඤපච්චයාදි

80. සහෙතුකං ධම්මං පච්චයා සහෙතුකො ධම්මො උප්පජ්ජති අඤ්ඤමඤ්ඤපච්චයා…පෙ… අවිගතපච්චයා.