1. විභඞ්ගවාරො

නහෙතුපච්චයො

62. සහෙතුකං ධම්මං පටිච්ච අහෙතුකො ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

අහෙතුකං ධම්මං පටිච්ච අහෙතුකො ධම්මො උප්පජ්ජති නහෙතුපච්චයා – අහෙතුකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1) (සබ්බං යාව අසඤ්ඤසත්තා තාව කාතබ්බං.)

නආරම්මණපච්චයාදි

63. සහෙතුකං ධම්මං පටිච්ච අහෙතුකො ධම්මො උප්පජ්ජති නආරම්මණපච්චයා – සහෙතුකෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

අහෙතුකං ධම්මං පටිච්ච අහෙතුකො ධම්මො උප්පජ්ජති නආරම්මණපච්චයා – අහෙතුකෙ ඛන්ධෙ පටිච්ච චිත්තසමුට්ඨානං රූපං, විචිකිච්ඡාසහගතං උද්ධච්චසහගතං මොහං පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… ඛන්ධෙ පටිච්ච වත්ථු; එකං මහාභූතං…පෙ… අසඤ්ඤසත්තානං එකං…පෙ…. (1)

සහෙතුකඤ්ච අහෙතුකඤ්ච ධම්මං පටිච්ච අහෙතුකො ධම්මො උප්පජ්ජති නආරම්මණපච්චයා – සහෙතුකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං, විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

සහෙතුකං ධම්මං පටිච්ච සහෙතුකො ධම්මො උප්පජ්ජති නඅධිපතිපච්චයා… (අනුලොමසහජාතසදිසා) නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා… නපුරෙජාතපච්චයා – අරූපෙ සහෙතුකං එකං ඛන්ධං…පෙ… පටිසන්ධික්ඛණෙ…පෙ…. (1)

64. සහෙතුකං ධම්මං පටිච්ච අහෙතුකො ධම්මො උප්පජ්ජති නපුරෙජාතපච්චයා – අරූපෙ විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො, සහෙතුකෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (2)

සහෙතුකං ධම්මං පටිච්ච සහෙතුකො ච අහෙතුකො ච ධම්මා උප්පජ්ජන්ති නපුරෙජාතපච්චයා – අරූපෙ විචිකිච්ඡාසහගතං උද්ධච්චසහගතං එකං ඛන්ධං පටිච්ච තයො ඛන්ධා මොහො ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

අහෙතුකං ධම්මං පටිච්ච අහෙතුකො ධම්මො උප්පජ්ජති නපුරෙජාතපච්චයා – අරූපෙ අහෙතුකං එකං ඛන්ධං…පෙ… ද්වෙ ඛන්ධෙ…පෙ… අහෙතුකෙ ඛන්ධෙ පටිච්ච චිත්තසමුට්ඨානං රූපං, විචිකිච්ඡාසහගතං උද්ධච්චසහගතං මොහං පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා තාව විත්ථාරො). (1)

අහෙතුකං ධම්මං පටිච්ච සහෙතුකො ධම්මො උප්පජ්ජති නපුරෙජාතපච්චයා – අරූපෙ විචිකිච්ඡාසහගතං උද්ධච්චසහගතං මොහං පටිච්ච සම්පයුත්තකා ඛන්ධා; පටිසන්ධික්ඛණෙ වත්ථුං පටිච්ච සහෙතුකා ඛන්ධා. (2)

අහෙතුකං ධම්මං පටිච්ච සහෙතුකො ච අහෙතුකො ච ධම්මා උප්පජ්ජන්ති නපුරෙජාතපච්චයා – පටිසන්ධික්ඛණෙ වත්ථුං පටිච්ච සහෙතුකා ඛන්ධා, මහාභූතෙ පටිච්ච කටත්තාරූපං. (3)

65. සහෙතුකඤ්ච අහෙතුකඤ්ච ධම්මං පටිච්ච සහෙතුකො ධම්මො උප්පජ්ජති නපුරෙජාතපච්චයා – අරූපෙ විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ සහෙතුකං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

සහෙතුකඤ්ච අහෙතුකඤ්ච ධම්මං පටිච්ච අහෙතුකො ධම්මො උප්පජ්ජති නපුරෙජාතපච්චයා – සහෙතුකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං, විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (2)

සහෙතුකඤ්ච අහෙතුකඤ්ච ධම්මං පටිච්ච සහෙතුකො ච අහෙතුකො ච ධම්මා උප්පජ්ජන්ති නපුරෙජාතපච්චයා – පටිසන්ධික්ඛණෙ සහෙතුකං එකං ඛන්ධඤ්ච වත්ථුඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ… සහෙතුකෙ ඛන්ධෙ ච මහාභූතෙ ච පටිච්ච කටත්තාරූපං. (3)

නපච්ඡාජාතපච්චයාදි

66. සහෙතුකං ධම්මං පටිච්ච සහෙතුකො ධම්මො උප්පජ්ජති නපච්ඡාජාතපච්චයා… නආසෙවනපච්චයා… නකම්මපච්චයා – සහෙතුකෙ ඛන්ධෙ පටිච්ච සහෙතුකා චෙතනා. (1)

අහෙතුකං ධම්මං පටිච්ච අහෙතුකො ධම්මො උප්පජ්ජති නකම්මපච්චයා – අහෙතුකෙ ඛන්ධෙ පටිච්ච අහෙතුකා චෙතනා… බාහිරං… ආහාරසමුට්ඨානං… උතුසමුට්ඨානං…පෙ…. (1)

අහෙතුකං ධම්මං පටිච්ච සහෙතුකො ධම්මො උප්පජ්ජති නකම්මපච්චයා – විචිකිච්ඡාසහගතං උද්ධච්චසහගතං මොහං පටිච්ච සම්පයුත්තකා චෙතනා. (2)

සහෙතුකඤ්ච අහෙතුකඤ්ච ධම්මං පටිච්ච සහෙතුකො ධම්මො උප්පජ්ජති නකම්මපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ ච මොහඤ්ච පටිච්ච සම්පයුත්තකා චෙතනා… නවිපාකපච්චයා (පටිසන්ධි නත්ථි).

නආහාරපච්චයාදි

67. අහෙතුකං ධම්මං පටිච්ච අහෙතුකො ධම්මො උප්පජ්ජති නආහාරපච්චයා… නඉන්ද්‍රියපච්චයා… නඣානපච්චයා… නමග්ගපච්චයා… නසම්පයුත්තපච්චයා.

නවිප්පයුත්තපච්චයාදි

68. සහෙතුකං ධම්මං පටිච්ච සහෙතුකො ධම්මො උප්පජ්ජති නවිප්පයුත්තපච්චයා – අරූපෙ සහෙතුකං එකං ඛන්ධං…පෙ…. (1)

සහෙතුකං ධම්මං පටිච්ච අහෙතුකො ධම්මො උප්පජ්ජති නවිප්පයුත්තපච්චයා – අරූපෙ විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (2)

සහෙතුකං ධම්මං පටිච්ච සහෙතුකො ච අහෙතුකො ච ධම්මා උප්පජ්ජන්ති නවිප්පයුත්තපච්චයා – අරූපෙ විචිකිච්ඡාසහගතං උද්ධච්චසහගතං එකං ඛන්ධං පටිච්ච තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

අහෙතුකං ධම්මං පටිච්ච අහෙතුකො ධම්මො උප්පජ්ජති නවිප්පයුත්තපච්චයා – අරූපෙ අහෙතුකං එකං ඛන්ධං පටිච්ච තයො ඛන්ධා, ද්වෙ ඛන්ධෙ…පෙ…. (1)

අහෙතුකං ධම්මං පටිච්ච සහෙතුකො ධම්මො උප්පජ්ජති නවිප්පයුත්තපච්චයා – අරූපෙ විචිකිච්ඡාසහගතං උද්ධච්චසහගතං මොහං පටිච්ච සම්පයුත්තකා ඛන්ධා. (2)

සහෙතුකඤ්ච අහෙතුකඤ්ච ධම්මං පටිච්ච සහෙතුකො ධම්මො උප්පජ්ජති නවිප්පයුත්තපච්චයා – අරූපෙ විචිකිච්ඡාසහගතං උද්ධච්චසහගතං එකං ඛන්ධඤ්ච මොහඤ්ච පටිච්ච තයො ඛන්ධා…පෙ… ද්වෙ ඛන්ධෙ…පෙ… නොනත්ථිපච්චයා… නොවිගතපච්චයා. (1)