1. විභඞ්ගවාරො

හෙතුපච්චයො

17. හෙතු ධම්මො හෙතුස්ස ධම්මස්ස හෙතුපච්චයෙන පච්චයො – අලොභො අදොසස්ස අමොහස්ස හෙතුපච්චයෙන පච්චයො (චක්කං). ලොභො මොහස්ස හෙතුපච්චයෙන පච්චයො, දොසො මොහස්ස හෙතුපච්චයෙන පච්චයො; පටිසන්ධික්ඛණෙ…පෙ…. (1)

හෙතු ධම්මො නහෙතුස්ස ධම්මස්ස හෙතුපච්චයෙන පච්චයො – හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො; පටිසන්ධික්ඛණෙ…පෙ…. (2)

හෙතු ධම්මො හෙතුස්ස ච නහෙතුස්ස ච ධම්මස්ස හෙතුපච්චයෙන පච්චයො – අලොභො අදොසස්ස අමොහස්ස සම්පයුත්තකානඤ්ච ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො (චක්කං). ලොභො මොහස්ස…පෙ… පටිසන්ධික්ඛණෙ…පෙ…. (3)

ආරම්මණපච්චයො

18. හෙතු ධම්මො හෙතුස්ස ධම්මස්ස ආරම්මණපච්චයෙන පච්චයො – හෙතුං ආරබ්භ හෙතූ උප්පජ්ජන්ති. (1)

හෙතු ධම්මො නහෙතුස්ස ධම්මස්ස ආරම්මණපච්චයෙන පච්චයො – හෙතුං ආරබ්භ නහෙතූ ඛන්ධා උප්පජ්ජන්ති. (2)

හෙතු ධම්මො හෙතුස්ස ච නහෙතුස්ස ච ධම්මස්ස ආරම්මණපච්චයෙන පච්චයො – හෙතුං ආරබ්භ හෙතූ ච සම්පයුත්තකා ච ඛන්ධා උප්පජ්ජන්ති. (3)

19. නහෙතු ධම්මො නහෙතුස්ස ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති. ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං…පෙ… නිබ්බානං…පෙ… නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො. අරියා නහෙතූ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති, චක්ඛුං…පෙ… වත්ථුං, නහෙතූ ඛන්ධෙ අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන නහෙතුචිත්තසමඞ්ගිස්ස චිත්තං ජානාති. ආකාසානඤ්චායතනං [ආකාසානඤ්චායතනකිරියං (ස්‍යා.) එවමුපරිපි තීසු ඨානෙසු] විඤ්ඤාණඤ්චායතනස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස…පෙ… රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස …පෙ… නහෙතූ ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

නහෙතු ධම්මො හෙතුස්ස ධම්මස්ස ආරම්මණපච්චයෙන පච්චයො – දානං දත්වා (පඨමගමනංයෙව, ආවජ්ජනා නත්ථි. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්සාති ඉදං නත්ථි). (2)

නහෙතු ධම්මො හෙතුස්ස ච නහෙතුස්ස ච ධම්මස්ස ආරම්මණපච්චයෙන පච්චයො – දානං දත්වා සීලං…පෙ… උපොසථකම්මං කත්වා තං පච්චවෙක්ඛති, තං ආරබ්භ හෙතූ ච සම්පයුත්තකා ච ඛන්ධා උප්පජ්ජන්ති (තත්ථ තත්ථ ඨිතෙන ඉමං කාතබ්බං දුතියගමනසදිසං). (3)

20. හෙතු ච නහෙතු ච ධම්මා හෙතුස්ස ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ හෙතූ උප්පජ්ජන්ති. (1)

හෙතු ච නහෙතු ච ධම්මා නහෙතුස්ස ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ නහෙතූ ඛන්ධා උප්පජ්ජන්ති. (2)

හෙතු ච නහෙතු ච ධම්මා හෙතුස්ස ච නහෙතුස්ස ච ධම්මස්ස ආරම්මණපච්චයෙන පච්චයො – හෙතුඤ්ච සම්පයුත්තකෙ ච ඛන්ධෙ ආරබ්භ හෙතූ ච සම්පයුත්තකා ච ඛන්ධා උප්පජ්ජන්ති. (3)

අධිපතිපච්චයො

21. හෙතු ධම්මො හෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා හෙතූ උප්පජ්ජන්ති. සහජාතාධිපති – හෙතු අධිපති සම්පයුත්තකානං හෙතූනං අධිපතිපච්චයෙන පච්චයො. (1)

හෙතු ධම්මො නහෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා නහෙතූ ඛන්ධා උප්පජ්ජන්ති. සහජාතාධිපති – හෙතු අධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (2)

හෙතු ධම්මො හෙතුස්ස ච නහෙතුස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – හෙතුං ගරුං කත්වා හෙතූ ච සම්පයුත්තකා ච ඛන්ධා උප්පජ්ජන්ති. සහජාතාධිපති – හෙතු අධිපති සම්පයුත්තකානං ඛන්ධානං හෙතූනඤ්ච චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

22. නහෙතු ධම්මො නහෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා (විත්ථාරෙතබ්බං යාව. නහෙතූ ඛන්ධා). සහජාතාධිපති – නහෙතු අධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

නහෙතු ධම්මො හෙතුස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා (සංඛිත්තං. යාව වත්ථු නහෙතූ ච ඛන්ධා තාව කාතබ්බං). සහජාතාධිපති නහෙතු අධිපති සම්පයුත්තකානං හෙතූනං අධිපතිපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං…පෙ… උපොසථකම්මං කත්වා තං ගරුං කත්වා පච්චවෙක්ඛති, තං ගරුං කත්වා නහෙතූ ඛන්ධා ච හෙතූ ච උප්පජ්ජන්ති, පුබ්බෙ සුචිණ්ණානි (යාව වත්ථු නහෙතූ ඛන්ධා, ච තාව කාතබ්බං). සහජාතාධිපති – නහෙතු අධිපති සම්පයුත්තකානං ඛන්ධානං හෙතූනඤ්ච චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

23. හෙතු ච නහෙතු ච ධම්මා හෙතුස්ස ධම්මස්ස අධිපතිපච්චයෙන පච්චයො. ආරම්මණාධිපති – හෙතුඤ්ච සම්පයුත්තකෙ ච ඛන්ධෙ ගරුං කත්වා හෙතූ උප්පජ්ජන්ති. (1)

හෙතු ච නහෙතු ච ධම්මා නහෙතුස්ස ධම්මස්ස අධිපතිපච්චයෙන පච්චයො. ආරම්මණාධිපති – හෙතුඤ්ච සම්පයුත්තකෙ ච ඛන්ධෙ ගරුං කත්වා නහෙතූ ඛන්ධා උප්පජ්ජන්ති. (2)

හෙතු ච නහෙතු ච ධම්මා හෙතුස්ස ච නහෙතුස්ස ච ධම්මස්ස අධිපතිපච්චයෙන පච්චයො. ආරම්මණාධිපති – හෙතුඤ්ච සම්පයුත්තකෙ ච ඛන්ධෙ ගරුං කත්වා හෙතූ ච සම්පයුත්තකා ච ඛන්ධා උප්පජ්ජන්ති. (3)

අනන්තරපච්චයො

24. හෙතු ධම්මො හෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං හෙතූනං අනන්තරපච්චයෙන පච්චයො. (1)

හෙතු ධම්මො නහෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං නහෙතූනං ඛන්ධානං අනන්තරපච්චයෙන පච්චයො. (2)

හෙතු ධම්මො හෙතුස්ස ච නහෙතුස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ පච්ඡිමානං පච්ඡිමානං හෙතූනං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

25. නහෙතු ධම්මො නහෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා නහෙතූ ඛන්ධා පච්ඡිමානං පච්ඡිමානං නහෙතූනං ඛන්ධානං අනන්තරපච්චයෙන පච්චයො; අනුලොමං ගොත්‍රභුස්ස (සංඛිත්තං) නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (1)

නහෙතු ධම්මො හෙතුස්ස ධම්මස්ස අනන්තරපච්චයෙන පච්චයො…පෙ…. (2)

නහෙතු ධම්මො හෙතුස්ස ච නහෙතුස්ස ච ධම්මස්ස අනන්තරපච්චයෙන පච්චයො (නහෙතුමූලකං තීණිපි එකසදිසං). (3)

26. හෙතූ ච නහෙතූ ච ධම්මා හෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං හෙතූනං අනන්තරපච්චයෙන පච්චයො. (1)

හෙතූ ච නහෙතූ ච ධම්මා නහෙතුස්ස ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං නහෙතූනං ඛන්ධානං අනන්තරපච්චයෙන පච්චයො. (2)

හෙතූ ච නහෙතූ ච ධම්මා හෙතුස්ස ච නහෙතුස්ස ච ධම්මස්ස අනන්තරපච්චයෙන පච්චයො – පුරිමා පුරිමා හෙතූ ච සම්පයුත්තකා ච ඛන්ධා පච්ඡිමානං පච්ඡිමානං හෙතූනං සම්පයුත්තකානඤ්ච ඛන්ධානං අනන්තරපච්චයෙන පච්චයො. (3)

සමනන්තරපච්චයාදි

27. හෙතු ධම්මො හෙතුස්ස ධම්මස්ස සමනන්තරපච්චයෙන පච්චයො (අනන්තරසදිසං.)… සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො (ඉමෙ ද්වෙපි පටිච්චසදිසා. නිස්සයපච්චයො පච්චයවාරෙ නිස්සයපච්චයසදිසො.)

උපනිස්සයපච්චයො

28. හෙතු ධම්මො හෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ හෙතූනං උපනිස්සයපච්චයෙන පච්චයො. (1)

හෙතු ධම්මො නහෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ නහෙතූනං ඛන්ධානං උපනිස්සයපච්චයෙන පච්චයො. (2)

හෙතු ධම්මො හෙතුස්ස ච නහෙතුස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ හෙතූනං සම්පයුත්තකානඤ්ච ඛන්ධානං උපනිස්සයපච්චයෙන පච්චයො. (3)

29. නහෙතු ධම්මො නහෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ… පකතූපනිස්සයො – සද්ධං උපනිස්සාය දානං දෙති…පෙ… සමාපත්තිං උප්පාදෙති…පෙ… දිට්ඨිං ගණ්හාති; සීලං…පෙ… සෙනාසනං උපනිස්සාය දානං දෙති…පෙ… සඞ්ඝං භින්දති; සද්ධා…පෙ… සෙනාසනං සද්ධාය…පෙ… ඵලසමාපත්තියා උපනිස්සයපච්චයෙන පච්චයො. (1)

නහෙතු ධම්මො හෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ… පකතූපනිස්සයො – සද්ධං…පෙ… සෙනාසනං උපනිස්සාය දානං දෙති…පෙ… සඞ්ඝං භින්දති; සද්ධා…පෙ… සෙනාසනං සද්ධාය…පෙ… පත්ථනාය මග්ගස්ස ඵලසමාපත්තියා උපනිස්සයපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ… පකතූපනිස්සයො (දුතියඋපනිස්සයසදිසං). (3)

30. හෙතූ ච නහෙතූ ච ධම්මා හෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ ච සම්පයුත්තකා ච ඛන්ධා හෙතූනං උපනිස්සයපච්චයෙන පච්චයො. (1)

හෙතූ ච නහෙතූ ච ධම්මා නහෙතුස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – හෙතූ ච සම්පයුත්තකා ච ඛන්ධා නහෙතූනං ඛන්ධානං උපනිස්සයපච්චයෙන පච්චයො. (2)

හෙතූ ච නහෙතූ ච ධම්මා හෙතුස්ස ච නහෙතුස්ස ච ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො …පෙ…. පකතූපනිස්සයො – හෙතූ ච සම්පයුත්තකා ච ඛන්ධා හෙතූනඤ්ච සම්පයුත්තකානඤ්ච ඛන්ධානං උපනිස්සයපච්චයෙන පච්චයො. (3)

පුරෙජාතපච්චයො

31. නහෙතු ධම්මො නහෙතුස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස…පෙ…. වත්ථුපුරෙජාතං – චක්ඛායතනං…පෙ… කායායතනං…පෙ… වත්ථු නහෙතූනං ඛන්ධානං පුරෙජාතපච්චයෙන පච්චයො. (1)

නහෙතු ධම්මො හෙතුස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. වත්ථුපුරෙජාතං – වත්ථු හෙතූනං පුරෙජාතපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති. වත්ථුපුරෙජාතං – වත්ථු හෙතූනං සම්පයුත්තකානඤ්ච ඛන්ධානං පුරෙජාතපච්චයෙන පච්චයො. (3)

පච්ඡාජාතපච්චයාදි

32. හෙතු ධම්මො නහෙතුස්ස ධම්මස්ස පච්ඡාජාතපච්චයෙන පච්චයො – පච්ඡාජාතා හෙතූ පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

නහෙතු ධම්මො නහෙතුස්ස ධම්මස්ස පච්ඡාජාතපච්චයෙන පච්චයො – පච්ඡාජාතා නහෙතූ ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

හෙතූ ච නහෙතූ ච ධම්මා නහෙතුස්ස ධම්මස්ස පච්ඡාජාතපච්චයෙන පච්චයො – පච්ඡාජාතා හෙතූ ච සම්පයුත්තකා ච ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

හෙතු ධම්මො හෙතුස්ස ධම්මස්ස ආසෙවනපච්චයෙන පච්චයො (අනන්තරසදිසං).

කම්මපච්චයො

33. නහෙතු ධම්මො නහෙතුස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නහෙතු චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නහෙතු චෙතනා විපාකානං ඛන්ධානං කටත්තා ච රූපානං කම්මපච්චයෙන පච්චයො. (1)

නහෙතු ධම්මො හෙතුස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නහෙතු චෙතනා සම්පයුත්තකානං හෙතූනං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නහෙතු චෙතනා විපාකානං හෙතූනං කම්මපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – නහෙතු චෙතනා සම්පයුත්තකානං ඛන්ධානං හෙතූනං චිත්තසමුට්ඨානානඤ්ච රූපානං කම්මපච්චයෙන පච්චයො; පටිසන්ධික්ඛණෙ…පෙ…. නානාක්ඛණිකා – නහෙතු චෙතනා විපාකානං ඛන්ධානං හෙතූනං කටත්තා ච රූපානං කම්මපච්චයෙන පච්චයො. (3)

විපාකපච්චයො

34. හෙතු ධම්මො හෙතුස්ස ධම්මස්ස විපාකපච්චයෙන පච්චයො – විපාකො අලොභො අදොසස්ස අමොහස්ස විපාකපච්චයෙන පච්චයො (පටිච්චවාරසදිසං. විපාකවිභඞ්ගෙ නව පඤ්හා).

ආහාරපච්චයො

35. නහෙතු ධම්මො නහෙතුස්ස ධම්මස්ස ආහාරපච්චයෙන පච්චයො – නහෙතූ ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ… කබළීකාරො ආහාරො ඉමස්ස කායස්ස ආහාරපච්චයෙන පච්චයො. (1)

නහෙතු ධම්මො හෙතුස්ස ධම්මස්ස ආහාරපච්චයෙන පච්චයො – නහෙතූ ආහාරා සම්පයුත්තකානං හෙතූනං ආහාරපච්චයෙන පච්චයො; පටිසන්ධික්ඛණෙ…පෙ…. (2)

නහෙතු ධම්මො හෙතුස්ස ච නහෙතුස්ස ච ධම්මස්ස ආහාරපච්චයෙන පච්චයො – නහෙතූ ආහාරා සම්පයුත්තකානං ඛන්ධානං හෙතූනං චිත්තසමුට්ඨානානඤ්ච රූපානං ආහාරපච්චයෙන පච්චයො; පටිසන්ධික්ඛණෙ…පෙ…. (3)

ඉන්ද්‍රියපච්චයො

36. හෙතු ධම්මො හෙතුස්ස ධම්මස්ස ඉන්ද්‍රියපච්චයෙන පච්චයො…පෙ… (හෙතුමූලකෙ තීණි).

නහෙතු ධම්මො නහෙතුස්ස ධම්මස්ස ඉන්ද්‍රියපච්චයෙන පච්චයො – නහෙතූ ඉන්ද්‍රියා සම්පයුත්තකානං ඛන්ධානං චිත්තසමුට්ඨානානඤ්ච රූපානං ඉන්ද්‍රියපච්චයෙන පච්චයො; පටිසන්ධික්ඛණෙ…පෙ… චක්ඛුන්ද්‍රියං චක්ඛුවිඤ්ඤාණස්ස…පෙ… කායින්ද්‍රියං කායවිඤ්ඤාණස්ස…පෙ… රූපජීවිතින්ද්‍රියං කටත්තාරූපානං ඉන්ද්‍රියපච්චයෙන පච්චයො (එවං ඉන්ද්‍රියපච්චයා විත්ථාරෙතබ්බා. නව).

ඣානපච්චයාදි

37. නහෙතු ධම්මො නහෙතුස්ස ධම්මස්ස ඣානපච්චයෙන පච්චයො… තීණි.

හෙතු ධම්මො හෙතුස්ස ධම්මස්ස මග්ගපච්චයෙන පච්චයො… සම්පයුත්තපච්චයෙන පච්චයො. (ඉමෙසු ද්වීසු නව.)

විප්පයුත්තපච්චයො

38. හෙතු ධම්මො නහෙතුස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – හෙතූ චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ හෙතූ කටත්තාරූපානං විප්පයුත්තපච්චයෙන පච්චයො. හෙතූ වත්ථුස්ස විප්පයුත්තපච්චයෙන පච්චයො. පච්ඡාජාතා – හෙතූ පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

නහෙතු ධම්මො නහෙතුස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතා – නහෙතූ ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ නහෙතූ ඛන්ධා කටත්තාරූපානං විප්පයුත්තපච්චයෙන පච්චයො. ඛන්ධා වත්ථුස්ස…පෙ… වත්ථු ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස, වත්ථු නහෙතූනං ඛන්ධානං විප්පයුත්තපච්චයෙන පච්චයො. පච්ඡාජාතා – නහෙතූ ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

නහෙතු ධම්මො හෙතුස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු හෙතූනං විප්පයුත්තපච්චයෙන පච්චයො. පුරෙජාතං – වත්ථු හෙතූනං විප්පයුත්තපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු හෙතූනං සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. පුරෙජාතං – වත්ථු හෙතූනං සම්පයුත්තකානඤ්ච ඛන්ධානං විප්පයුත්තපච්චයෙන පච්චයො. (3)

හෙතූ ච නහෙතූ ච ධම්මා නහෙතුස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – හෙතූ ච සම්පයුත්තකා ච ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො; පටිසන්ධික්ඛණෙ හෙතූ ච සම්පයුත්තකා ච ඛන්ධා කටත්තාරූපානං විප්පයුත්තපච්චයෙන පච්චයො. පච්ඡාජාතා – හෙතූ ච සම්පයුත්තකා ච ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයාදි

39. හෙතු ධම්මො හෙතුස්ස ධම්මස්ස අත්ථිපච්චයෙන පච්චයො – අලොභො අදොසස්ස අමොහස්ස අත්ථිපච්චයෙන පච්චයො (චක්කං). ලොභො මොහස්ස අත්ථිපච්චයෙන පච්චයො (චක්කං); පටිසන්ධික්ඛණෙ…පෙ…. (1)

හෙතු ධම්මො නහෙතුස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිසන්ධික්ඛණෙ…පෙ…. පච්ඡාජාතා – හෙතූ පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

හෙතු ධම්මො හෙතුස්ස ච නහෙතුස්ස ච ධම්මස්ස අත්ථිපච්චයෙන පච්චයො – අලොභො අදොසස්ස අමොහස්ස සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො (චක්කං). ලොභො මොහස්ස සම්පයුත්තකානං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො (චක්කං); පටිසන්ධික්ඛණෙ…පෙ…. (3)

40. නහෙතු ධම්මො නහෙතුස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – නහෙතු එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ නහෙතු එකො ඛන්ධො තිණ්ණන්නං ඛන්ධානං කටත්තා ච රූපානං…පෙ… ඛන්ධා වත්ථුස්ස අත්ථිපච්චයෙන පච්චයො; වත්ථු ඛන්ධානං අත්ථිපච්චයෙන පච්චයො; එකං මහාභූතං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ…. පුරෙජාතං – චක්ඛුං…පෙ… වත්ථුං…පෙ… දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස, චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස, වත්ථු නහෙතූනං ඛන්ධානං අත්ථිපච්චයෙන පච්චයො. පච්ඡාජාතා – නහෙතූ ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. කබළීකාරො ආහාරො ඉමස්ස කායස්ස අත්ථිපච්චයෙන පච්චයො. රූපජීවිතින්ද්‍රියං කටත්තාරූපානං අත්ථිපච්චයෙන පච්චයො. (1)

නහෙතු ධම්මො හෙතුස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතා – නහෙතූ ඛන්ධා සම්පයුත්තකානං හෙතූනං අත්ථිපච්චයෙන පච්චයො. පටිසන්ධික්ඛණෙ…පෙ… වත්ථු හෙතූනං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති; වත්ථු හෙතූනං අත්ථිපච්චයෙන පච්චයො. (2)

නහෙතු ධම්මො හෙතුස්ස ච නහෙතුස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – නහෙතු එකො ඛන්ධො තිණ්ණන්නං ඛන්ධානං හෙතූනං චිත්තසමුට්ඨානානඤ්ච රූපානං අත්ථිපච්චයෙන පච්චයො; පටිසන්ධික්ඛණෙ…පෙ… වත්ථු හෙතූනං සම්පයුත්තකානඤ්ච ඛන්ධානං අත්ථිපච්චයෙන පච්චයො. පුරෙජාතං – චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති; දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති; වත්ථු හෙතූනං සම්පයුත්තකානඤ්ච ඛන්ධානං අත්ථිපච්චයෙන පච්චයො. (3)

41. හෙතු ච නහෙතු ච ධම්මා හෙතුස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – අලොභො ච සම්පයුත්තකා ච ඛන්ධා අදොසස්ස අමොහස්ස අත්ථිපච්චයෙන පච්චයො (චක්කං). ලොභො ච සම්පයුත්තකා ච ඛන්ධා මොහස්ස අත්ථිපච්චයෙන පච්චයො (චක්කං); පටිසන්ධික්ඛණෙ…පෙ… අලොභො ච වත්ථු ච අදොසස්ස අමොහස්ස අත්ථිපච්චයෙන පච්චයො (චක්කං). (1)

හෙතු ච නහෙතු ච ධම්මා නහෙතුස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතො – නහෙතු එකො ඛන්ධො ච හෙතූ ච තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… පටිසන්ධික්ඛණෙ හෙතූ ච වත්ථු ච නහෙතූනං ඛන්ධානං අත්ථිපච්චයෙන පච්චයො. සහජාතා – හෙතූ ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – හෙතූ ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – හෙතූ ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (2)

හෙතු ච නහෙතු ච ධම්මා හෙතුස්ස ච නහෙතුස්ස ච ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – නහෙතු එකො ඛන්ධො ච අලොභො ච තිණ්ණන්නං ඛන්ධානං අදොසස්ස අමොහස්ස චිත්තසමුට්ඨානානඤ්ච රූපානං අත්ථිපච්චයෙන පච්චයො (චක්කං). නහෙතු එකො ඛන්ධො ච ලොභො ච තිණ්ණන්නං ඛන්ධානං මොහස්ස චිත්තසමුට්ඨානානඤ්ච රූපානං අත්ථිපච්චයෙන පච්චයො (චක්කං); පටිසන්ධික්ඛණෙ නහෙතු එකො ඛන්ධො ච අලොභො ච (චක්කං). පටිසන්ධික්ඛණෙ…පෙ… අලොභො ච වත්ථු ච අදොසස්ස අමොහස්ස සම්පයුත්තකානඤ්ච ඛන්ධානං අත්ථිපච්චයෙන පච්චයො, ලොභො ච වත්ථු ච මොහස්ස සම්පයුත්තකානඤ්ච ඛන්ධානං අත්ථිපච්චයෙන පච්චයො….

නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො. (3)