1-4. පච්චයානුලොමාදි

169. නහෙතුං සහෙතුකං ධම්මං පච්චයා නහෙතු සහෙතුකො ධම්මො උප්පජ්ජති හෙතුපච්චයා… තීණි.

නහෙතුං අහෙතුකං ධම්මං පච්චයා නහෙතු අහෙතුකො ධම්මො උප්පජ්ජති හෙතුපච්චයා – එකං මහාභූතං පච්චයා තයො මහාභූතා, මහාභූතෙ පච්චයා චිත්තසමුට්ඨානං රූපං, කටත්තාරූපං, උපාදාරූපං. (1)

නහෙතුං අහෙතුකං ධම්මං පච්චයා නහෙතු සහෙතුකො ධම්මො උප්පජ්ජති හෙතුපච්චයා – වත්ථුං පච්චයා නහෙතූ සහෙතුකා ඛන්ධා; පටිසන්ධික්ඛණෙ…පෙ… (2)

නහෙතුං අහෙතුකං ධම්මං පච්චයා නහෙතු සහෙතුකො ච නහෙතු අහෙතුකො ච ධම්මා උප්පජ්ජන්ති හෙතුපච්චයා – වත්ථුං පච්චයා නහෙතූ සහෙතුකා ඛන්ධා, මහාභූතෙ පච්චයා චිත්තසමුට්ඨානං රූපං; පටිසන්ධික්ඛණෙ…පෙ…(3)

නහෙතුං සහෙතුකඤ්ච නහෙතුං අහෙතුකඤ්ච ධම්මං පච්චයා නහෙතු සහෙතුකො ධම්මො උප්පජ්ජති හෙතුපච්චයා (ඝටනා තීණි, පවත්තිපටිසන්ධි පරිපුණ්ණං. සංඛිත්තං).

170. හෙතුයා නව, ආරම්මණෙ චත්තාරි…පෙ… අඤ්ඤමඤ්ඤෙ ඡ…පෙ… පුරෙජාතෙ ආසෙවනෙ චත්තාරි…පෙ… අවිගතෙ නව (එවං ගණෙතබ්බං).

අනුලොමං.

171. නහෙතුයා එකං, නආරම්මණෙ තීණි…පෙ… නොවිගතෙ තීණි.

පච්චනීයං.