1. විභඞ්ගවාරො

නහෙතුපච්චයො

164. නහෙතුං අහෙතුකං ධම්මං පටිච්ච නහෙතු අහෙතුකො ධම්මො උප්පජ්ජති නහෙතුපච්චයා – නහෙතුං අහෙතුකං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ (යාව අසඤ්ඤසත්තා මොහො නත්ථි). (1)

නආරම්මණපච්චයො

165. නහෙතුං සහෙතුකං ධම්මං පටිච්ච නහෙතු අහෙතුකො ධම්මො උප්පජ්ජති නආරම්මණපච්චයා – නහෙතූ සහෙතුකෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ…. (1)

නහෙතුං අහෙතුකං ධම්මං පටිච්ච නහෙතු අහෙතුකො ධම්මො උප්පජ්ජති නආරම්මණපච්චයා – නහෙතූ අහෙතුකෙ ඛන්ධෙ පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (යාව අසඤ්ඤසත්තා). (1)

නහෙතුං සහෙතුකඤ්ච නහෙතුං අහෙතුකඤ්ච ධම්මං පටිච්ච නහෙතු අහෙතුකො ධම්මො උප්පජ්ජති නආරම්මණපච්චයා – නහෙතූ සහෙතුකෙ ඛන්ධෙ ච මහාභූතෙ ච පටිච්ච චිත්තසමුට්ඨානං රූපං; පටිසන්ධික්ඛණෙ…පෙ… (සංඛිත්තං).