1. විභඞ්ගවාරො

හෙතුපච්චයො

63. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – දස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා ද්වෙ ඛන්ධා. (1)

භාවනාය පහාතබ්බහෙතුකං ධම්මං සංසට්ඨො භාවනාය පහාතබ්බහෙතුකො ධම්මො උප්පජ්ජති හෙතුපච්චයා – භාවනාය පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා ද්වෙ ඛන්ධා. (1)

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො නෙවදස්සනෙන නභාවනාය පහාතබ්බහෙතුකො ධම්මො උප්පජ්ජති හෙතුපච්චයා – නෙවදස්සනෙන නභාවනාය පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… පටිසන්ධික්ඛණෙ…පෙ…. (1)

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං මොහං සංසට්ඨා සම්පයුත්තකා ඛන්ධා. (2)

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො භාවනාය පහාතබ්බහෙතුකො ධම්මො උප්පජ්ජති හෙතුපච්චයා – උද්ධච්චසහගතං මොහං සංසට්ඨා සම්පයුත්තකා ඛන්ධා. (3)

64. දස්සනෙන පහාතබ්බහෙතුකඤ්ච නෙවදස්සනෙන නභාවනාය පහාතබ්බහෙතුකඤ්ච ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති හෙතුපච්චයා – විචිකිච්ඡාසහගතං එකං ඛන්ධඤ්ච මොහඤ්ච සංසට්ඨා තයො ඛන්ධා…පෙ… ද්වෙ ඛන්ධා. (1)

භාවනාය පහාතබ්බහෙතුකඤ්ච නෙවදස්සනෙන නභාවනාය පහාතබ්බහෙතුකඤ්ච ධම්මං භාවනාය පහාතබ්බහෙතුකො ධම්මො උප්පජ්ජති හෙතුපච්චයා – උද්ධච්චසහගතං එකං ඛන්ධඤ්ච මොහඤ්ච සංසට්ඨා තයො ඛන්ධා…පෙ… ද්වෙ ඛන්ධා. (1)

ආරම්මණපච්චයො

65. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා – දස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධා. (1)

දස්සනෙන පහාතබ්බහෙතුකං ධම්මං සංසට්ඨො නෙවදස්සනෙන නභාවනාය පහාතබ්බහෙතුකො ධම්මො උප්පජ්ජති ආරම්මණපච්චයා – විචිකිච්ඡාසහගතෙ ඛන්ධෙ සංසට්ඨො විචිකිච්ඡාසහගතො මොහො. (2)

දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ච නෙවදස්සනෙන නභාවනාය පහාතබ්බහෙතුකො ච ධම්මා උප්පජ්ජන්ති ආරම්මණපච්චයා – විචිකිච්ඡාසහගතං එකං ඛන්ධං සංසට්ඨා තයො ඛන්ධා මොහො ච…පෙ… ද්වෙ ඛන්ධෙ…පෙ…. (3)

භාවනාය පහාතබ්බහෙතුකං ධම්මං සංසට්ඨො… තීණි.

66. නෙවදස්සනෙන නභාවනාය පහාතබ්බහෙතුකං ධම්මං සංසට්ඨො නෙවදස්සනෙන නභාවනාය පහාතබ්බහෙතුකො ධම්මො උප්පජ්ජති ආරම්මණපච්චයා – නෙවදස්සනෙන නභාවනාය පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා ද්වෙ ඛන්ධා. පටිසන්ධික්ඛණෙ…පෙ…. (1)

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා – විචිකිච්ඡාසහගතං මොහං සංසට්ඨා සම්පයුත්තකා ඛන්ධා. (2)

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො භාවනාය පහාතබ්බහෙතුකො ධම්මො උප්පජ්ජති ආරම්මණපච්චයා – උද්ධච්චසහගතං මොහං සංසට්ඨා සම්පයුත්තකා ඛන්ධා. (3)

දස්සනෙන පහාතබ්බහෙතුකඤ්ච නෙවදස්සනෙන නභාවනාය පහාතබ්බහෙතුකඤ්ච ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති ආරම්මණපච්චයා – විචිකිච්ඡාසහගතං එකං ඛන්ධඤ්ච මොහඤ්ච සංසට්ඨා තයො ඛන්ධා…පෙ… ද්වෙ ඛන්ධෙ ච මොහඤ්ච සංසට්ඨා ද්වෙ ඛන්ධා. (1)

භාවනාය පහාතබ්බහෙතුකඤ්ච නෙවදස්සනෙන නභාවනාය පහාතබ්බහෙතුකඤ්ච ධම්මං සංසට්ඨො භාවනාය පහාතබ්බහෙතුකො ධම්මො උප්පජ්ජති ආරම්මණපච්චයා – උද්ධච්චසහගතං එකං ඛන්ධඤ්ච මොහඤ්ච සංසට්ඨා තයො ඛන්ධා…පෙ… ද්වෙ ඛන්ධා. (1)

අධිපතිපච්චයාදි

67. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති අධිපතිපච්චයා – දස්සනෙන පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධා. (1)

භාවනාය පහාතබ්බහෙතුකං ධම්මං සංසට්ඨො… එකං.

නෙවදස්සනෙන නභාවනාය පහාතබ්බහෙතුකං ධම්මං සංසට්ඨො නෙවදස්සනෙන නභාවනාය පහාතබ්බහෙතුකො ධම්මො උප්පජ්ජති අධිපතිපච්චයා – නෙවදස්සනෙන නභාවනාය පහාතබ්බහෙතුකං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධා; අනන්තරපච්චයා… සමනන්තරපච්චයා.

සහජාතපච්චයාදි

68. දස්සනෙන පහාතබ්බහෙතුකං ධම්මං සංසට්ඨො දස්සනෙන පහාතබ්බහෙතුකො ධම්මො උප්පජ්ජති සහජාතපච්චයා… අඤ්ඤමඤ්ඤපච්චයා… නිස්සයපච්චයා… උපනිස්සයපච්චයා… පුරෙජාතපච්චයා… ආසෙවනපච්චයා… කම්මපච්චයා… විපාකපච්චයා… ආහාරපච්චයා… ඉන්ද්‍රියපච්චයා … ඣානපච්චයා… මග්ගපච්චයා… සම්පයුත්තපච්චයා… විප්පයුත්තපච්චයා… අත්ථිපච්චයා… නත්ථිපච්චයා… විගතපච්චයා… අවිගතපච්චයා….