1. විභඞ්ගවාරො

හෙතුපච්චයො

60. දස්සනෙන පහාතබ්බං ධම්මං සංසට්ඨො දස්සනෙන පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා ද්වෙ ඛන්ධා. (1)

භාවනාය පහාතබ්බං ධම්මං සංසට්ඨො භාවනාය පහාතබ්බො ධම්මො උප්පජ්ජති හෙතුපච්චයා – භාවනාය පහාතබ්බං එකං ඛන්ධං සංසට්ඨා…පෙ…. (1)

නෙවදස්සනෙන නභාවනාය පහාතබ්බං ධම්මං සංසට්ඨො නෙවදස්සනෙන නභාවනාය පහාතබ්බො ධම්මො උප්පජ්ජති හෙතුපච්චයා – නෙවදස්සනෙන නභාවනාය පහාතබ්බං එකං ඛන්ධං සංසට්ඨා තයො ඛන්ධා…පෙ… පටිසන්ධික්ඛණෙ නෙවදස්සනෙන නභාවනාය පහාතබ්බං එකං ඛන්ධං සංසට්ඨා…පෙ…. (1)

ආරම්මණපච්චයො

61. දස්සනෙන පහාතබ්බං ධම්මං සංසට්ඨො දස්සනෙන පහාතබ්බො ධම්මො උප්පජ්ජති ආරම්මණපච්චයා (සබ්බානි පදානි විත්ථාරෙතබ්බානි තීණි, තීණි).

1. පච්චයානුලොමං

2. සඞ්ඛ්‍යාවාරො

62. හෙතුයා තීණි, ආරම්මණෙ තීණි, අධිපතියා තීණි, අනන්තරෙ තීණි, සමනන්තරෙ තීණි, සහජාතෙ තීණි, අඤ්ඤමඤ්ඤෙ තීණි, නිස්සයෙ තීණි, උපනිස්සයෙ තීණි, පුරෙජාතෙ තීණි, ආසෙවනෙ තීණි, කම්මෙ තීණි, විපාකෙ එකං, ආහාරෙ තීණි, ඉන්ද්‍රියෙ තීණි, ඣානෙ තීණි, මග්ගෙ තීණි, සම්පයුත්තෙ තීණි, විප්පයුත්තෙ තීණි, අත්ථියා තීණි, නත්ථියා තීණි, විගතෙ තීණි, අවිගතෙ තීණි.

අනුලොමං.