1. විභඞ්ගවාරො

හෙතුපච්චයො

36. දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති හෙතුපච්චයා… තීණි.

භාවනාය පහාතබ්බං ධම්මං පච්චයා භාවනාය… තීණි.

37. නෙවදස්සනෙන නභාවනාය පහාතබ්බං ධම්මං පච්චයා නෙවදස්සනෙන නභාවනාය පහාතබ්බො ධම්මො උප්පජ්ජති හෙතුපච්චයා – නෙවදස්සනෙන නභාවනාය පහාතබ්බං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ නෙවදස්සනෙන නභාවනාය පහාතබ්බං එකං ඛන්ධං පච්චයා තයො ඛන්ධා කටත්තා ච රූපං…පෙ… ද්වෙ ඛන්ධෙ පච්චයා ද්වෙ ඛන්ධා…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා. එකං මහාභූතං පච්චයා තයො මහාභූතා…පෙ… මහාභූතෙ පච්චයා චිත්තසමුට්ඨානං රූපං කටත්තාරූපං උපාදාරූපං. වත්ථුං පච්චයා නෙවදස්සනෙන නභාවනාය පහාතබ්බා ඛන්ධා. (1)

නෙවදස්සනෙන නභාවනාය පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති හෙතුපච්චයා – වත්ථුං පච්චයා දස්සනෙන පහාතබ්බා ඛන්ධා. (2)

නෙවදස්සනෙන නභාවනාය පහාතබ්බං ධම්මං පච්චයා භාවනාය පහාතබ්බො ධම්මො උප්පජ්ජති හෙතුපච්චයා – වත්ථුං පච්චයා භාවනාය පහාතබ්බා ඛන්ධා. (3)

නෙවදස්සනෙන නභාවනාය පහාතබ්බං ධම්මං පච්චයා දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා උප්පජ්ජන්ති හෙතුපච්චයා – වත්ථුං පච්චයා දස්සනෙන පහාතබ්බා ඛන්ධා; මහාභූතෙ පච්චයා චිත්තසමුට්ඨානං රූපං. (4)

නෙවදස්සනෙන නභාවනාය පහාතබ්බං ධම්මං පච්චයා භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා උප්පජ්ජන්ති හෙතුපච්චයා – වත්ථුං පච්චයා භාවනාය පහාතබ්බා ඛන්ධා; මහාභූතෙ පච්චයා චිත්තසමුට්ඨානං රූපං. (5)

38. දස්සනෙන පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා දස්සනෙන පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච පච්චයා ද්වෙ ඛන්ධා. (1)

දස්සනෙන පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා නෙවදස්සනෙන නභාවනාය පහාතබ්බො ධම්මො උප්පජ්ජති හෙතුපච්චයා – දස්සනෙන පහාතබ්බෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (2)

දස්සනෙන පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා දස්සනෙන පහාතබ්බො ච නෙවදස්සනෙන නභාවනාය පහාතබ්බො ච ධම්මා උප්පජ්ජන්ති හෙතුපච්චයා – දස්සනෙන පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච පච්චයා ද්වෙ ඛන්ධා, දස්සනෙන පහාතබ්බෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (3)

39. භාවනාය පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා භාවනාය පහාතබ්බො ධම්මො උප්පජ්ජති හෙතුපච්චයා – භාවනාය පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච…පෙ…. (1)

භාවනාය පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා නෙවදස්සනෙන නභාවනාය පහාතබ්බො ධම්මො උප්පජ්ජති හෙතුපච්චයා – භාවනාය පහාතබ්බෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (2)

භාවනාය පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා භාවනාය පහාතබ්බො ච නෙවදස්සනෙන නභාවනාය පහාතබ්බො ච ධම්මා උප්පජ්ජන්ති හෙතුපච්චයා – භාවනාය පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච…පෙ… භාවනාය පහාතබ්බෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. (3)

ආරම්මණපච්චයො

40. දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති ආරම්මණපච්චයා – දස්සනෙන පහාතබ්බං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ…. (1)

භාවනාය පහාතබ්බං ධම්මං පච්චයා භාවනාය පහාතබ්බො ධම්මො උප්පජ්ජති ආරම්මණපච්චයා – භාවනාය පහාතබ්බං එකං ඛන්ධං පච්චයා තයො ඛන්ධා…පෙ…. (1)

නෙවදස්සනෙන නභාවනාය පහාතබ්බං ධම්මං පච්චයා නෙවදස්සනෙන නභාවනාය පහාතබ්බො ධම්මො උප්පජ්ජති ආරම්මණපච්චයා – නෙවදස්සනෙන නභාවනාය පහාතබ්බං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ…. පටිසන්ධික්ඛණෙ නෙවදස්සනෙන නභාවනාය පහාතබ්බං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… වත්ථුං පච්චයා ඛන්ධා, චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා නෙවදස්සනෙන නභාවනාය පහාතබ්බා ඛන්ධා. (1)

නෙවදස්සනෙන නභාවනාය පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති ආරම්මණපච්චයා – වත්ථුං පච්චයා දස්සනෙන පහාතබ්බා ඛන්ධා. (2)

නෙවදස්සනෙන නභාවනාය පහාතබ්බං ධම්මං පච්චයා භාවනාය පහාතබ්බො ධම්මො උප්පජ්ජති ආරම්මණපච්චයා – වත්ථුං පච්චයා භාවනාය පහාතබ්බා ඛන්ධා. (3)

41. දස්සනෙන පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා දස්සනෙන පහාතබ්බො ධම්මො උප්පජ්ජති ආරම්මණපච්චයා – දස්සනෙන පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච පච්චයා…පෙ…. (1)

භාවනාය පහාතබ්බඤ්ච නෙවදස්සනෙන නභාවනාය පහාතබ්බඤ්ච ධම්මං පච්චයා භාවනාය පහාතබ්බො ධම්මො උප්පජ්ජති ආරම්මණපච්චයා – භාවනාය පහාතබ්බං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ ච වත්ථුඤ්ච පච්චයා ද්වෙ ඛන්ධා. (1)

අධිපතිපච්චයාදි

42. දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති අධිපතිපච්චයා… (පරිපුණ්ණං, පටිසන්ධි නත්ථි) අනන්තරපච්චයා… සමනන්තරපච්චයා (ආරම්මණසදිසං).

සහජාතපච්චයො

දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති සහජාතපච්චයා – දස්සනෙන පහාතබ්බං එකං ඛන්ධං… තීණි.

භාවනාය පහාතබ්බං ධම්මං පච්චයා… තීණි.

43. නෙවදස්සනෙන නභාවනාය පහාතබ්බං ධම්මං පච්චයා නෙවදස්සනෙන නභාවනාය පහාතබ්බො ධම්මො උප්පජ්ජති සහජාතපච්චයා – නෙවදස්සනෙන නභාවනාය පහාතබ්බං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ පච්චයා ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා; එකං මහාභූතං පච්චයා තයො මහාභූතා…පෙ… මහාභූතෙ පච්චයා…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා නෙවදස්සනෙන නභාවනාය පහාතබ්බා ඛන්ධා.

නෙවදස්සනෙන නභාවනාය පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති සහජාතපච්චයා (අවසෙසා හෙතුපච්චයසදිසා).

අඤ්ඤමඤ්ඤපච්චයාදි

44. දස්සනෙන පහාතබ්බං ධම්මං පච්චයා දස්සනෙන පහාතබ්බො ධම්මො උප්පජ්ජති අඤ්ඤමඤ්ඤපච්චයා… නිස්සයපච්චයා… උපනිස්සයපච්චයා… පුරෙජාතපච්චයා (පටිසන්ධි නත්ථි)… ආසෙවනපච්චයා… (පටිසන්ධි නත්ථි, විපාකඤ්ච) කම්මපච්චයා… විපාකපච්චයා… ආහාරපච්චයා… ඉන්ද්‍රියපච්චයා… ඣානපච්චයා… මග්ගපච්චයා… සම්පයුත්තපච්චයා… විප්පයුත්තපච්චයා… අත්ථිපච්චයා… නත්ථිපච්චයා… විගතපච්චයා… අවිගතපච්චයා.