1. පච්චයානුලොමං

හෙතුපච්චයො

59. සවිතක්කසවිචාරං ධම්මං සංසට්ඨො සවිතක්කසවිචාරො ධම්මො උප්පජ්ජති හෙතුපච්චයා – සවිතක්කසවිචාරං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සවිතක්කසවිචාරං ධම්මං සංසට්ඨො අවිතක්කවිචාරමත්තො ධම්මො…පෙ… සවිතක්කසවිචාරෙ ඛන්ධෙ සංසට්ඨො විතක්කො. පටිසන්ධික්ඛණෙ…පෙ…. (2)

සවිතක්කසවිචාරං ධම්මං සංසට්ඨො සවිතක්කසවිචාරො ච අවිතක්කවිචාරමත්තො ච ධම්මා…පෙ… සවිතක්කසවිචාරං එකං ඛන්ධං සංසට්ඨා තයො ඛන්ධා විතක්කො ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

60. අවිතක්කවිචාරමත්තං ධම්මං සංසට්ඨො අවිතක්කවිචාරමත්තො ධම්මො උප්පජ්ජති හෙතුපච්චයා – අවිතක්කවිචාරමත්තං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

අවිතක්කවිචාරමත්තං ධම්මං සංසට්ඨො සවිතක්කසවිචාරො ධම්මො…පෙ… විතක්කං සංසට්ඨා සවිතක්කසවිචාරා ඛන්ධා. පටිසන්ධික්ඛණෙ…පෙ…. (2)

අවිතක්කවිචාරමත්තං ධම්මං සංසට්ඨො අවිතක්කඅවිචාරො ධම්මො…පෙ… අවිතක්කවිචාරමත්තෙ ඛන්ධෙ සංසට්ඨො විචාරො. පටිසන්ධික්ඛණෙ අවිතක්කවිචාරමත්තෙ ඛන්ධෙ සංසට්ඨො විචාරො. (3)

අවිතක්කවිචාරමත්තං ධම්මං සංසට්ඨො අවිතක්කවිචාරමත්තො ච අවිතක්කඅවිචාරො ච ධම්මා …පෙ… අවිතක්කවිචාරමත්තං එකං ඛන්ධං සංසට්ඨා තයො ඛන්ධා විචාරො ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (4)

61. අවිතක්කඅවිචාරං ධම්මං සංසට්ඨො අවිතක්කඅවිචාරො ධම්මො උප්පජ්ජති හෙතුපච්චයා – අවිතක්කඅවිචාරං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ සංසට්ඨා…පෙ… පටිසන්ධික්ඛණෙ…පෙ…. (1)

අවිතක්කඅවිචාරං ධම්මං සංසට්ඨො අවිතක්කවිචාරමත්තො ධම්මො…පෙ… විචාරං සංසට්ඨා අවිතක්කවිචාරමත්තා ඛන්ධා. පටිසන්ධික්ඛණෙ විචාරං සංසට්ඨා…පෙ…. (2)

අවිතක්කවිචාරමත්තඤ්ච අවිතක්කඅවිචාරඤ්ච ධම්මං සංසට්ඨො අවිතක්කවිචාරමත්තො ධම්මො…පෙ… අවිතක්කවිචාරමත්තං එකං ඛන්ධඤ්ච විචාරඤ්ච සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

සවිතක්කසවිචාරඤ්ච අවිතක්කවිචාරමත්තඤ්ච ධම්මං සංසට්ඨො සවිතක්කසවිචාරො ධම්මො උප්පජ්ජති හෙතුපච්චයා – සවිතක්කසවිචාරං එකං ඛන්ධඤ්ච විතක්කඤ්ච සංසට්ඨා තයො ඛන්ධා…පෙ… ද්වෙ ඛන්ධෙ ච විතක්කඤ්ච…පෙ… පටිසන්ධික්ඛණෙ…පෙ…. (1)

(හෙතුපච්චයං අනුමජ්ජන්තෙන සබ්බෙ පච්චයා විත්ථාරෙතබ්බා).

සුද්ධං

62. හෙතුයා එකාදස, ආරම්මණෙ අධිපතියා අනන්තරෙ සමනන්තරෙ සහජාතෙ අඤ්ඤමඤ්ඤෙ නිස්සයෙ උපනිස්සයෙ පුරෙජාතෙ ආසෙවනෙ කම්මෙ විපාකෙ ආහාරෙ ඉන්ද්‍රියෙ ඣානෙ මග්ගෙ සම්පයුත්තෙ විප්පයුත්තෙ අත්ථියා නත්ථියා විගතෙ අවිගතෙ සබ්බත්ථ එකාදස.

අනුලොමං.