1. පච්චයානුලොමං

හෙතුපච්චයො

47. සවිතක්කසවිචාරං ධම්මං පච්චයා සවිතක්කසවිචාරො ධම්මො උප්පජ්ජති හෙතුපච්චයා – සවිතක්කසවිචාරං එකං ඛන්ධං පච්චයා තයො ඛන්ධා…පෙ… ද්වෙ ඛන්ධා… සත්ත.

අවිතක්කවිචාරමත්තං ධම්මං පච්චයා… පඤ්ච (පටිච්චවාරසදිසා).

අවිතක්කඅවිචාරං ධම්මං පච්චයා අවිතක්කඅවිචාරො ධම්මො උප්පජ්ජති හෙතුපච්චයා – අවිතක්කඅවිචාරං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ පච්චයා…පෙ… විචාරං පච්චයා චිත්තසමුට්ඨානං රූපං. පටිසන්ධික්ඛණෙ…පෙ… වත්ථුං පච්චයා අවිතක්කඅවිචාරා ඛන්ධා, වත්ථුං පච්චයා විචාරො. (1)

අවිතක්කඅවිචාරං ධම්මං පච්චයා සවිතක්කසවිචාරො ධම්මො උප්පජ්ජති…පෙ… වත්ථුං පච්චයා සවිතක්කසවිචාරා ඛන්ධා. පටිසන්ධික්ඛණෙ…පෙ…. (2)

අවිතක්කඅවිචාරං ධම්මං පච්චයා අවිතක්කවිචාරමත්තො ධම්මො…පෙ… විචාරං පච්චයා අවිතක්කවිචාරමත්තා ඛන්ධා, වත්ථුං පච්චයා අවිතක්කවිචාරමත්තා ඛන්ධා, වත්ථුං පච්චයා විතක්කො. පටිසන්ධික්ඛණෙ…පෙ…. (3)

අවිතක්කඅවිචාරං ධම්මං පච්චයා සවිතක්කසවිචාරො ච අවිතක්කඅවිචාරො ච ධම්මා උප්පජ්ජන්ති…පෙ… වත්ථුං පච්චයා සවිතක්කසවිචාරා ඛන්ධා, මහාභූතෙ පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (4)

අවිතක්කඅවිචාරං ධම්මං පච්චයා අවිතක්කවිචාරමත්තො ච අවිතක්කඅවිචාරො ච ධම්මා…පෙ… විචාරං පච්චයා අවිතක්කවිචාරමත්තා ඛන්ධා චිත්තසමුට්ඨානඤ්ච රූපං, වත්ථුං පච්චයා අවිතක්කවිචාරමත්තා ඛන්ධා, මහාභූතෙ පච්චයා චිත්තසමුට්ඨානං රූපං, වත්ථුං පච්චයා විතක්කො, මහාභූතෙ පච්චයා චිත්තසමුට්ඨානං රූපං, වත්ථුං පච්චයා අවිතක්කවිචාරමත්තා ඛන්ධා ච විචාරො ච. පටිසන්ධික්ඛණෙ…පෙ…. (5)

අවිතක්කඅවිචාරං ධම්මං පච්චයා සවිතක්කසවිචාරො ච අවිතක්කවිචාරමත්තො ච ධම්මා…පෙ… වත්ථුං පච්චයා සවිතක්කසවිචාරා ඛන්ධා ච විතක්කො ච. පටිසන්ධික්ඛණෙ…පෙ…. (6)

අවිතක්කඅවිචාරං ධම්මං පච්චයා සවිතක්කසවිචාරො ච අවිතක්කවිචාරමත්තො ච අවිතක්කඅවිචාරො ච ධම්මා…පෙ… වත්ථුං පච්චයා සවිතක්කසවිචාරා ඛන්ධා ච විතක්කො ච, මහාභූතෙ පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (7)

48. සවිතක්කසවිචාරඤ්ච අවිතක්කඅවිචාරඤ්ච ධම්මං පච්චයා සවිතක්කසවිචාරො ධම්මො…පෙ… සවිතක්කසවිචාරං එකං ඛන්ධඤ්ච වත්ථුඤ්ච පච්චයා තයො ඛන්ධා …පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… සවිතක්කසවිචාරඤ්ච අවිතක්කඅවිචාරඤ්ච ධම්මං පච්චයා අවිතක්කවිචාරමත්තො ධම්මො…පෙ… (පඨමඋදාහරණෙ පවත්තෙ පටිසන්ධික්ඛණෙ සත්ත පඤ්හා කාතබ්බා).

අවිතක්කවිචාරමත්තඤ්ච අවිතක්කඅවිචාරඤ්ච ධම්මං පච්චයා සවිතක්කසවිචාරො ධම්මො …පෙ… විතක්කඤ්ච වත්ථුඤ්ච පච්චයා සවිතක්කසවිචාරා ඛන්ධා. පටිසන්ධික්ඛණෙ…පෙ…. (1)

අවිතක්කවිචාරමත්තඤ්ච අවිතක්කඅවිචාරඤ්ච ධම්මං පච්චයා අවිතක්කවිචාරමත්තො ධම්මො…පෙ… අවිතක්කවිචාරමත්තං එකං ඛන්ධඤ්ච විචාරඤ්ච පච්චයා තයො ඛන්ධා…පෙ… අවිතක්කවිචාරමත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… පටිසන්ධික්ඛණෙ අවිතක්කවිචාරමත්තං එකං ඛන්ධඤ්ච විචාරඤ්ච පච්චයා තයො ඛන්ධා…පෙ… පටිසන්ධික්ඛණෙ අවිතක්කවිචාරමත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ…. (2)

අවිතක්කවිචාරමත්තඤ්ච අවිතක්කඅවිචාරඤ්ච ධම්මං පච්චයා අවිතක්කඅවිචාරො ධම්මො උප්පජ්ජති…පෙ… අවිතක්කවිචාරමත්තෙ ඛන්ධෙ ච විචාරඤ්ච පච්චයා චිත්තසමුට්ඨානං රූපං, අවිතක්කවිචාරමත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, විතක්කඤ්ච මහාභූතෙ ච පච්චයා චිත්තසමුට්ඨානං රූපං, අවිතක්කවිචාරමත්තෙ ඛන්ධෙ ච වත්ථුඤ්ච පච්චයා විචාරො (එවං පටිසන්ධික්ඛණෙ චත්තාරො). (3)

අවිතක්කවිචාරමත්තඤ්ච අවිතක්කඅවිචාරඤ්ච ධම්මං පච්චයා සවිතක්කසවිචාරො ච අවිතක්කඅවිචාරො ච ධම්මා උප්පජ්ජන්ති…පෙ… විතක්කඤ්ච වත්ථුඤ්ච පච්චයා සවිතක්කසවිචාරා ඛන්ධා, විතක්කඤ්ච මහාභූතෙ ච පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (4)

අවිතක්කවිචාරමත්තඤ්ච අවිතක්කඅවිචාරඤ්ච ධම්මං පච්චයා අවිතක්කවිචාරමත්තො ච අවිතක්කඅවිචාරො ච ධම්මා උප්පජ්ජන්ති…පෙ… අවිතක්කවිචාරමත්තං එකං ඛන්ධඤ්ච විචාරඤ්ච පච්චයා තයො ඛන්ධා චිත්තසමුට්ඨානඤ්ච රූපං…පෙ… අවිතක්කවිචාරමත්තං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… අවිතක්කවිචාරමත්තෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං, අවිතක්කවිචාරමත්තං එකං ඛන්ධඤ්ච වත්ථුඤ්ච පච්චයා තයො ඛන්ධා විචාරො ච…පෙ… පටිසන්ධික්ඛණෙ තයො ඛන්ධා…පෙ…. (5)

(අවසෙසෙසු ද්වීසු ඝටනෙසු පවත්ති පටිසන්ධි විත්ථාරෙතබ්බා.)

හෙතුපච්චයො.

(හෙතුපච්චයං අනුමජ්ජන්තෙන පච්චයවාරො විත්ථාරෙතබ්බො. යථා පටිච්චගණනා එවං ගණෙතබ්බා. අධිපතියා සත්තතිංස, පුරෙජාතෙ ච ආසෙවනෙ ච එකවීස, අයං එත්ථ විසෙසො.)