1. විභඞ්ගවාරො

නහෙතුපච්චයො

4. අජ්ඣත්තාරම්මණං ධම්මං පටිච්ච අජ්ඣත්තාරම්මණො ධම්මො උප්පජ්ජති නහෙතුපච්චයා – අහෙතුකං අජ්ඣත්තාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ අජ්ඣත්තාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

බහිද්ධාරම්මණං ධම්මං පටිච්ච බහිද්ධාරම්මණො ධම්මො උප්පජ්ජති නහෙතුපච්චයා – අහෙතුකං බහිද්ධාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නඅධිපතිපච්චයාදි

5. අජ්ඣත්තාරම්මණං ධම්මං පටිච්ච අජ්ඣත්තාරම්මණො ධම්මො උප්පජ්ජති නඅධිපතිපච්චයා … (අනුලොමසහජාතසදිසං, නින්නානාකරණං) නපුරෙජාතපච්චයා – අරූපෙ අජ්ඣත්තාරම්මණං එකං ඛන්ධං පටිච්ච…පෙ… පටිසන්ධික්ඛණෙ…පෙ…. (1)

6. බහිද්ධාරම්මණං ධම්මං පටිච්ච බහිද්ධාරම්මණො ධම්මො උප්පජ්ජති නපුරෙජාතපච්චයා – අරූපෙ බහිද්ධාරම්මණං එකං ඛන්ධං පටිච්ච තයො ඛන්ධා…පෙ…. පටිසන්ධික්ඛණෙ…පෙ… නපච්ඡාජාතපච්චයා… නආසෙවනපච්චයා… (සහජාතසදිසං) නකම්මපච්චයා – අජ්ඣත්තාරම්මණෙ ඛන්ධෙ පටිච්ච අජ්ඣත්තාරම්මණා චෙතනා.

බහිද්ධාරම්මණං ධම්මං පටිච්ච බහිද්ධාරම්මණො ධම්මො උප්පජ්ජති නකම්මපච්චයා – බහිද්ධාරම්මණෙ ඛන්ධෙ පටිච්ච බහිද්ධාරම්මණා චෙතනා.

නවිපාකපච්චයාදි

7. අජ්ඣත්තාරම්මණං ධම්මං පටිච්ච අජ්ඣත්තාරම්මණො ධම්මො උප්පජ්ජති නවිපාකපච්චයා (පටිසන්ධි නත්ථි)… නඣානපච්චයා…පෙ… පඤ්චවිඤ්ඤාණසහගතං අජ්ඣත්තාරම්මණං එකං…පෙ…. (1)

බහිද්ධාරම්මණං ධම්මං පටිච්ච බහිද්ධාරම්මණො ධම්මො උප්පජ්ජති නඣානපච්චයා – පඤ්චවිඤ්ඤාණසහගතං බහිද්ධාරම්මණං එකං ඛන්ධං පටිච්ච තයො ඛන්ධා…පෙ… නමග්ගපච්චයා (නහෙතුසදිසො. මොහො නත්ථි)… නවිප්පයුත්තපච්චයා – අරූපෙ අජ්ඣත්තාරම්මණං එකං ඛන්ධං පටිච්ච තයො ඛන්ධා…පෙ…. (1)

බහිද්ධාරම්මණං ධම්මං පටිච්ච බහිද්ධාරම්මණො ධම්මො උප්පජ්ජති නවිප්පයුත්තපච්චයා – අරූපෙ බහිද්ධාරම්මණං එකං ඛන්ධං පටිච්ච තයො ඛන්ධා…පෙ…. (1)