1. විභඞ්ගවාරො

හෙතුපච්චයො

27. අජ්ඣත්තො ධම්මො අජ්ඣත්තස්ස ධම්මස්ස හෙතුපච්චයෙන පච්චයො – අජ්ඣත්තා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. පටිසන්ධික්ඛණෙ…පෙ…. (1)

බහිද්ධා ධම්මො බහිද්ධා ධම්මස්ස හෙතුපච්චයෙන පච්චයො – බහිද්ධා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. පටිසන්ධික්ඛණෙ…පෙ…. (1)

ආරම්මණපච්චයො

28. අජ්ඣත්තො ධම්මො අජ්ඣත්තස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි…පෙ… ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. අජ්ඣත්තං චක්ඛුං…පෙ… කායං… රූපෙ…පෙ… ඵොට්ඨබ්බෙ… වත්ථුං… අජ්ඣත්තෙ ඛන්ධෙ අනිච්චතො දුක්ඛතො අනත්තතො විපස්සති, අස්සාදෙති අභිනන්දති, තං ආරබ්භ රාගො උප්පජ්ජති…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතුධාතුයා සද්දං සුණාති, ආකාසානඤ්චායතනං විඤ්ඤාණඤ්චායතනස්ස ආරම්මණපච්චයෙන පච්චයො. ආකිඤ්චඤ්ඤායතනං නෙවසඤ්ඤානාසඤ්ඤායතනස්ස ආරම්මණපච්චයෙන පච්චයො. රූපායතනං…පෙ… ඵොට්ඨබ්බායතනං කායවිඤ්ඤාණස්ස ආරම්මණපච්චයෙන පච්චයො. අජ්ඣත්තා ඛන්ධා ඉද්ධිවිධඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

අජ්ඣත්තො ධම්මො බහිද්ධා ධම්මස්ස ආරම්මණපච්චයෙන පච්චයො – පරො අජ්ඣත්තං චක්ඛුං…පෙ… වත්ථුං… අජ්ඣත්තෙ ඛන්ධෙ අනිච්චතො දුක්ඛතො අනත්තතො විපස්සති, අස්සාදෙති අභිනන්දති, තං ආරබ්භ රාගො උප්පජ්ජති…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන අජ්ඣත්තචිත්තසමඞ්ගිස්ස චිත්තං ජානාති. අජ්ඣත්තං රූපායතනං බහිද්ධා චක්ඛුවිඤ්ඤාණස්ස…පෙ… අජ්ඣත්තං ඵොට්ඨබ්බායතනං බහිද්ධා කායවිඤ්ඤාණස්ස ආරම්මණපච්චයෙන පච්චයො. අජ්ඣත්තා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

29. බහිද්ධා ධම්මො බහිද්ධා ධම්මස්ස ආරම්මණපච්චයෙන පච්චයො – පරො දානං දත්වා සීලං සමාදියිත්වා උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති… නිබ්බානං පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො. අරියා පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ…පෙ… පරො බහිද්ධා චක්ඛුං…පෙ… වත්ථුං… බහිද්ධා ඛන්ධෙ අනිච්චතො…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන බහිද්ධා චිත්තසමඞ්ගිස්ස…පෙ… ආකාසානඤ්චායතනං විඤ්ඤාණඤ්චායතනස්ස ආරම්මණපච්චයෙන පච්චයො. ආකිඤ්චඤ්ඤායතනං නෙවසඤ්ඤානාසඤ්ඤායතනස්ස ආරම්මණපච්චයෙන පච්චයො. බහිද්ධා රූපායතනං බහිද්ධා චක්ඛුවිඤ්ඤාණස්ස…පෙ… බහිද්ධා ඵොට්ඨබ්බායතනං බහිද්ධා කායවිඤ්ඤාණස්ස…පෙ… බහිද්ධා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

බහිද්ධා ධම්මො අජ්ඣත්තස්ස ධම්මස්ස ආරම්මණපච්චයෙන පච්චයො – අරියා නිබ්බානං පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, ආවජ්ජනාය ආරම්මණපච්චයෙන පච්චයො. බහිද්ධා චක්ඛුං…පෙ… වත්ථුං… බහිද්ධා ඛන්ධෙ අනිච්චතො…පෙ… දොමනස්සං උප්පජ්ජති. දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. චෙතොපරියඤාණෙන බහිද්ධා චිත්තසමඞ්ගිස්ස චිත්තං ජානාති. බහිද්ධා රූපායතනං අජ්ඣත්තං චක්ඛුවිඤ්ඤාණස්ස…පෙ… බහිද්ධා ඵොට්ඨබ්බායතනං අජ්ඣත්තං කායවිඤ්ඤාණස්ස…පෙ… බහිද්ධා ඛන්ධා ඉද්ධිවිධඤාණස්ස, චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

අධිපතිපච්චයො

30. අජ්ඣත්තො ධම්මො අජ්ඣත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා, තං ගරුං කත්වා පච්චවෙක්ඛති, පුබ්බෙ සුචිණ්ණානි ගරුං කත්වා…පෙ… ඣානා වුට්ඨහිත්වා ඣානං ගරුං කත්වා…පෙ… අරියා මග්ගා වුට්ඨහිත්වා මග්ගං ගරුං කත්වා…පෙ… ඵලං ගරුං කත්වා පච්චවෙක්ඛන්ති. අජ්ඣත්තං චක්ඛුං…පෙ… වත්ථුං… අජ්ඣත්තෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – අජ්ඣත්තාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

අජ්ඣත්තො ධම්මො බහිද්ධා ධම්මස්ස අධිපතිපච්චයෙන පච්චයො. ආරම්මණාධිපති – පරො අජ්ඣත්තං චක්ඛුං…පෙ… වත්ථුං… අජ්ඣත්තෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. (2)

31. බහිද්ධා ධම්මො බහිද්ධා ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – පරො දානං දත්වා සීලං සමාදියිත්වා උපොසථකම්මං කත්වා, තං ගරුං කත්වා පච්චවෙක්ඛති, පුබ්බෙ සුචිණ්ණානි ගරුං කත්වා…පෙ… ඣානා වුට්ඨහිත්වා…පෙ… අරියා මග්ගා වුට්ඨහිත්වා මග්ගං ගරුං කත්වා…පෙ… ඵලං ගරුං කත්වා…පෙ… නිබ්බානං ගරුං කත්වා පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස අධිපතිපච්චයෙන පච්චයො. බහිද්ධා චක්ඛුං…පෙ… වත්ථුං… බහිද්ධා ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – බහිද්ධාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

බහිද්ධා ධම්මො අජ්ඣත්තස්ස ධම්මස්ස අධිපතිපච්චයෙන පච්චයො. ආරම්මණාධිපති – අරියා නිබ්බානං ගරුං කත්වා පච්චවෙක්ඛන්ති. නිබ්බානං ගොත්‍රභුස්ස, වොදානස්ස, මග්ගස්ස, ඵලස්ස, අධිපතිපච්චයෙන පච්චයො. බහිද්ධා චක්ඛුං…පෙ… වත්ථුං… බහිද්ධා ඛන්ධෙ ගරුං කත්වා අස්සාදෙති, අභිනන්දති, තං ගරුං කත්වා රාගො…පෙ… දිට්ඨි උප්පජ්ජති. (2)

අනන්තරපච්චයො

32. අජ්ඣත්තො ධම්මො අජ්ඣත්තස්ස ධම්මස්ස අනන්තරපච්චයෙන පච්චයො – පුරිමා පුරිමා අජ්ඣත්තා ඛන්ධා පච්ඡිමානං පච්ඡිමානං අජ්ඣත්තානං ඛන්ධානං අනන්තරපච්චයෙන පච්චයො. අනුලොමං ගොත්‍රභුස්ස, අනුලොමං වොදානස්ස, ගොත්‍රභු මග්ගස්ස, වොදානං මග්ගස්ස, මග්ගො ඵලස්ස, ඵලං ඵලස්ස, අනුලොමං ඵලසමාපත්තියා, නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (1)

බහිද්ධා ධම්මො බහිද්ධා ධම්මස්ස අනන්තරපච්චයෙන පච්චයො (පුරිමා පුරිමා බහිද්ධාති නානාකරණං, තංයෙව ගමනං). (1)

සමනන්තරපච්චයාදි

33. අජ්ඣත්තො ධම්මො අජ්ඣත්තස්ස ධම්මස්ස සමනන්තරපච්චයෙන පච්චයො…පෙ… (අනන්තරසදිසං)… සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො.

උපනිස්සයපච්චයො

34. අජ්ඣත්තො ධම්මො අජ්ඣත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අජ්ඣත්තං සද්ධං උපනිස්සාය දානං දෙති, සීලං සමාදියති, උපොසථකම්මං…පෙ… ඣානං…පෙ… විපස්සනං…පෙ… මග්ගං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. අජ්ඣත්තං සීලං…පෙ… පඤ්ඤං… රාගං…පෙ… පත්ථනං… කායිකං සුඛං… කායිකං දුක්ඛං… උතුං… භොජනං… සෙනාසනං උපනිස්සාය දානං දෙති…පෙ… සමාපත්තිං උප්පාදෙති, පාණං හනති…පෙ… සඞ්ඝං භින්දති. අජ්ඣත්තා සද්ධා…පෙ… පඤ්ඤා, රාගො…පෙ… පත්ථනා, කායිකං සුඛං… කායිකං දුක්ඛං… සෙනාසනං අජ්ඣත්තාය සද්ධාය…පෙ… පඤ්ඤාය, රාගස්ස…පෙ… පත්ථනාය, කායිකස්ස සුඛස්ස, කායිකස්ස දුක්ඛස්ස, මග්ගස්ස ඵලසමාපත්තියා උපනිස්සයපච්චයෙන පච්චයො. (1)

අජ්ඣත්තො ධම්මො බහිද්ධා ධම්මස්ස උපනිස්සයපච්චයෙන පච්චයො – ආරම්මණූපනිස්සයො, පකතූපනිස්සයො…පෙ…. පකතූපනිස්සයො – පරො අජ්ඣත්තං සද්ධං උපනිස්සාය දානං දෙති…පෙ… මානං ජප්පෙති, දිට්ඨිං ගණ්හාති. පරො අජ්ඣත්තං සීලං…පෙ… සෙනාසනං උපනිස්සාය දානං දෙති, පාණං හනති…පෙ… සඞ්ඝං භින්දති. අජ්ඣත්තා සද්ධා…පෙ… සෙනාසනං බහිද්ධා සද්ධාය…පෙ… මග්ගස්ස ඵලසමාපත්තියා උපනිස්සයපච්චයෙන පච්චයො. (2)

35. බහිද්ධා ධම්මො බහිද්ධා ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරො බහිද්ධා සද්ධං…පෙ… පත්ථනං, කායිකං සුඛං…පෙ… සෙනාසනං උපනිස්සාය දානං දෙති…පෙ… සඞ්ඝං භින්දති බහිද්ධා සද්ධා…පෙ… සෙනාසනං බහිද්ධා සද්ධාය…පෙ… ඵලසමාපත්තියා උපනිස්සයපච්චයෙන පච්චයො. (1)

බහිද්ධා ධම්මො අජ්ඣත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, පකතූපනිස්සයො…පෙ…. පකතූපනිස්සයො – බහිද්ධා සද්ධං…පෙ… සෙනාසනං උපනිස්සාය දානං දෙති…පෙ… සඞ්ඝං භින්දති. බහිද්ධා සද්ධා…පෙ… සෙනාසනං අජ්ඣත්තාය සද්ධාය…පෙ… ඵලසමාපත්තියා උපනිස්සයපච්චයෙන පච්චයො. (2)

පුරෙජාතපච්චයො

36. අජ්ඣත්තො ධම්මො අජ්ඣත්තස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – අජ්ඣත්තං චක්ඛුං…පෙ… වත්ථුං අනිච්චතො දුක්ඛතො අනත්තතො විපස්සති…පෙ… දොමනස්සං උප්පජ්ජති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස…පෙ… වත්ථු අජ්ඣත්තානං ඛන්ධානං පුරෙජාතපච්චයෙන පච්චයො. (1)

අජ්ඣත්තො ධම්මො බහිද්ධා ධම්මස්ස පුරෙජාතපච්චයෙන පච්චයො. ආරම්මණපුරෙජාතං – පරො අජ්ඣත්තං චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. අජ්ඣත්තං රූපායතනං බහිද්ධා චක්ඛුවිඤ්ඤාණස්ස…පෙ… අජ්ඣත්තං ඵොට්ඨබ්බායතනං බහිද්ධා කායවිඤ්ඤාණස්ස පුරෙජාතපච්චයෙන පච්චයො. (2)

37. බහිද්ධා ධම්මො බහිද්ධා ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – පරො බහිද්ධා චක්ඛුං…පෙ… වත්ථුං අනිච්චතො…පෙ… දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. බහිද්ධා රූපායතනං බහිද්ධා චක්ඛුවිඤ්ඤාණස්ස…පෙ… බහිද්ධා ඵොට්ඨබ්බායතනං බහිද්ධා කායවිඤ්ඤාණස්ස…පෙ…. වත්ථුපුරෙජාතං – බහිද්ධා චක්ඛායතනං…පෙ… කායායතනං…පෙ… වත්ථු බහිද්ධා ඛන්ධානං පුරෙජාතපච්චයෙන පච්චයො. (1)

බහිද්ධා ධම්මො අජ්ඣත්තස්ස ධම්මස්ස පුරෙජාතපච්චයෙන පච්චයො. ආරම්මණපුරෙජාතං – බහිද්ධා චක්ඛුං…පෙ… වත්ථුං අනිච්චතො…පෙ… දොමනස්සං උප්පජ්ජති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. බහිද්ධා රූපායතනං අජ්ඣත්තස්ස චක්ඛුවිඤ්ඤාණස්ස…පෙ… බහිද්ධා ඵොට්ඨබ්බායතනං අජ්ඣත්තස්ස කායවිඤ්ඤාණස්ස පුරෙජාතපච්චයෙන පච්චයො. (2)

38. අජ්ඣත්තො ච බහිද්ධා ච ධම්මා අජ්ඣත්තස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. බහිද්ධා රූපායතනඤ්ච අජ්ඣත්තං චක්ඛායතනඤ්ච අජ්ඣත්තස්ස චක්ඛුවිඤ්ඤාණස්ස පුරෙජාතපච්චයෙන පච්චයො…පෙ… බහිද්ධා ඵොට්ඨබ්බායතනඤ්ච අජ්ඣත්තං කායායතනඤ්ච අජ්ඣත්තස්ස කායවිඤ්ඤාණස්ස…පෙ… බහිද්ධා රූපායතනඤ්ච අජ්ඣත්තං වත්ථු ච…පෙ… බහිද්ධා ඵොට්ඨබ්බායතනඤ්ච අජ්ඣත්තං වත්ථු ච අජ්ඣත්තානං ඛන්ධානං පුරෙජාතපච්චයෙන පච්චයො. (1)

අජ්ඣත්තො ච බහිද්ධා ච ධම්මා බහිද්ධා ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. අජ්ඣත්තං රූපායතනඤ්ච බහිද්ධා චක්ඛායතනඤ්ච බහිද්ධා චක්ඛුවිඤ්ඤාණස්ස පුරෙජාතපච්චයෙන පච්චයො…පෙ… අජ්ඣත්තං ඵොට්ඨබ්බායතනඤ්ච බහිද්ධා කායායතනඤ්ච බහිද්ධා කායවිඤ්ඤාණස්ස පුරෙජාතපච්චයෙන පච්චයො. අජ්ඣත්තං රූපායතනඤ්ච බහිද්ධා වත්ථු ච…පෙ… අජ්ඣත්තං ඵොට්ඨබ්බායතනඤ්ච බහිද්ධා වත්ථු ච බහිද්ධා ඛන්ධානං පුරෙජාතපච්චයෙන පච්චයො. (2)

පච්ඡාජාතපච්චයො

39. අජ්ඣත්තො ධම්මො අජ්ඣත්තස්ස ධම්මස්ස පච්ඡාජාතපච්චයෙන පච්චයො – පච්ඡාජාතා අජ්ඣත්තා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

බහිද්ධා ධම්මො බහිද්ධා ධම්මස්ස පච්ඡාජාතපච්චයෙන පච්චයො – පච්ඡාජාතා බහිද්ධා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

ආසෙවනපච්චයො

40. අජ්ඣත්තො ධම්මො අජ්ඣත්තස්ස ධම්මස්ස ආසෙවනපච්චයෙන පච්චයො – පුරිමා පුරිමා අජ්ඣත්තා ඛන්ධා පච්ඡිමානං පච්ඡිමානං අජ්ඣත්තානං ඛන්ධානං ආසෙවනපච්චයෙන පච්චයො. අනුලොමං ගොත්‍රභුස්ස… අනුලොමං වොදානස්ස… ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (1)

බහිද්ධා ධම්මො බහිද්ධා ධම්මස්ස ආසෙවනපච්චයෙන පච්චයො – පුරිමා පුරිමා…පෙ… (අජ්ඣත්තසදිසංයෙව).

කම්මපච්චයො

41. අජ්ඣත්තො ධම්මො අජ්ඣත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අජ්ඣත්තා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. නානාක්ඛණිකා – අජ්ඣත්තා චෙතනා විපාකානං අජ්ඣත්තානං ඛන්ධානං කටත්තා ච රූපානං කම්මපච්චයෙන පච්චයො. (1)

බහිද්ධා ධම්මො බහිද්ධා ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – බහිද්ධා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. නානාක්ඛණිකා – බහිද්ධා චෙතනා විපාකානං බහිද්ධා ඛන්ධානං කටත්තා ච රූපානං කම්මපච්චයෙන පච්චයො. (1)

විපාකපච්චයො

42. අජ්ඣත්තො ධම්මො අජ්ඣත්තස්ස ධම්මස්ස විපාකපච්චයෙන පච්චයො…පෙ… (පරිපුණ්ණං, පටිච්චවාරසදිසං).

ආහාරපච්චයො

43. අජ්ඣත්තො ධම්මො අජ්ඣත්තස්ස ධම්මස්ස ආහාරපච්චයෙන පච්චයො – අජ්ඣත්තා ආහාරා සම්පයුත්තකානං ඛන්ධානං චිත්තසමුට්ඨානානඤ්ච රූපානං ආහාරපච්චයෙන පච්චයො. පටිසන්ධික්ඛණෙ…පෙ… අජ්ඣත්තො කබළීකාරො ආහාරො අජ්ඣත්තස්ස කායස්ස ආහාරපච්චයෙන පච්චයො. (1)

අජ්ඣත්තො ධම්මො බහිද්ධා ධම්මස්ස ආහාරපච්චයෙන පච්චයො – අජ්ඣත්තො කබළීකාරො ආහාරො බහිද්ධා කායස්ස ආහාරපච්චයෙන පච්චයො. (2)

බහිද්ධා ධම්මො බහිද්ධා ධම්මස්ස ආහාරපච්චයෙන පච්චයො (පවත්තිපටිසන්ධි) බහිද්ධා කබළීකාරො ආහාරො බහිද්ධා කායස්ස ආහාරපච්චයෙන පච්චයො. (1)

බහිද්ධා ධම්මො අජ්ඣත්තස්ස ධම්මස්ස ආහාරපච්චයෙන පච්චයො – බහිද්ධා කබළීකාරො ආහාරො අජ්ඣත්තස්ස කායස්ස ආහාරපච්චයෙන පච්චයො. (2)

44. අජ්ඣත්තො ධම්මො ච බහිද්ධා ධම්මො ච අජ්ඣත්තස්ස ධම්මස්ස ආහාරපච්චයෙන පච්චයො – අජ්ඣත්තො කබළීකාරො ආහාරො ච බහිද්ධා කබළීකාරො ආහාරො ච අජ්ඣත්තස්ස කායස්ස ආහාරපච්චයෙන පච්චයො. (1)

අජ්ඣත්තො ධම්මො ච බහිද්ධා ධම්මො ච බහිද්ධා ධම්මස්ස ආහාරපච්චයෙන පච්චයො – අජ්ඣත්තො කබළීකාරො ආහාරො ච බහිද්ධා කබළීකාරො ආහාරො ච බහිද්ධා කායස්ස ආහාරපච්චයෙන පච්චයො. (2)

ඉන්ද්‍රියපච්චයාදි

45. අජ්ඣත්තො ධම්මො අජ්ඣත්තස්ස ධම්මස්ස ඉන්ද්‍රියපච්චයෙන පච්චයො, අජ්ඣත්තිකා ඉන්ද්‍රියා (රූපජීවිතින්ද්‍රියම්පි විත්ථාරෙතබ්බං)… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො… විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (මාතිකාපදානි අනුමජ්ජන්තෙන විත්ථාරෙතබ්බානි).

බහිද්ධා ධම්මො බහිද්ධා ධම්මස්ස විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං (සංඛිත්තං).

අත්ථිපච්චයො

46. අජ්ඣත්තො ධම්මො අජ්ඣත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – අජ්ඣත්තො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධා වත්ථුස්ස …පෙ… වත්ථු ඛන්ධානං…පෙ… එකං මහාභූතං…පෙ… අසඤ්ඤසත්තානං එකං මහාභූතං තිණ්ණන්නං මහාභූතානං…පෙ…. පුරෙජාතං – චක්ඛුං…පෙ… වත්ථුං (පුරෙජාතසදිසං), වත්ථු අජ්ඣත්තානං ඛන්ධානං අත්ථිපච්චයෙන පච්චයො. පච්ඡාජාතා – අජ්ඣත්තා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. අජ්ඣත්තො කබළීකාරො ආහාරො අජ්ඣත්තස්ස කායස්ස…පෙ… රූපජීවිතින්ද්‍රියං කටත්තාරූපානං…පෙ…. (1)

අජ්ඣත්තො ධම්මො බහිද්ධා ධම්මස්ස අත්ථිපච්චයෙන පච්චයො – පුරෙජාතං, ආහාරං. පුරෙජාතං – පරො අජ්ඣත්තං චක්ඛුං…පෙ… වත්ථුං අනිච්චතො…පෙ… විපස්සති, දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, අජ්ඣත්තං රූපායතනං…පෙ… ඵොට්ඨබ්බායතනං බහිද්ධා කායවිඤ්ඤාණස්ස අත්ථිපච්චයෙන පච්චයො. අජ්ඣත්තො කබළීකාරො ආහාරො බහිද්ධා කායස්ස අත්ථිපච්චයෙන පච්චයො. (2)

47. බහිද්ධා ධම්මො බහිද්ධා ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං (බහිද්ධා නින්නානාකරණං, මාතිකාපදානි විත්ථාරෙතබ්බානි). (1)

බහිද්ධා ධම්මො අජ්ඣත්තස්ස ධම්මස්ස අත්ථිපච්චයෙන පච්චයො – පුරෙජාතං, ආහාරං. පුරෙජාතං – බහිද්ධා චක්ඛුං…පෙ… වත්ථුං…පෙ… දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, බහිද්ධා රූපායතනං…පෙ… ඵොට්ඨබ්බායතනං අජ්ඣත්තස්ස කායවිඤ්ඤාණස්ස අත්ථිපච්චයෙන පච්චයො. බහිද්ධා කබළීකාරො ආහාරො අජ්ඣත්තස්ස කායස්ස අත්ථිපච්චයෙන පච්චයො. (2)

48. අජ්ඣත්තො ධම්මො ච බහිද්ධා ධම්මො ච අජ්ඣත්තස්ස ධම්මස්ස අත්ථිපච්චයෙන පච්චයො – පුරෙජාතං, ආහාරං. පුරෙජාතං – බහිද්ධා රූපායතනඤ්ච අජ්ඣත්තං චක්ඛු ච අජ්ඣත්තස්ස චක්ඛුවිඤ්ඤාණස්ස…පෙ… බහිද්ධා ඵොට්ඨබ්බායතනඤ්ච අජ්ඣත්තං කායායතනඤ්ච අජ්ඣත්තස්ස කායවිඤ්ඤාණස්ස අත්ථිපච්චයෙන පච්චයො. බහිද්ධා රූපායතනඤ්ච අජ්ඣත්තං වත්ථු ච…පෙ… බහිද්ධා ඵොට්ඨබ්බායතනඤ්ච අජ්ඣත්තං වත්ථු ච අජ්ඣත්තානං ඛන්ධානං අත්ථිපච්චයෙන පච්චයො. ආහාරං – අජ්ඣත්තො කබළීකාරො ආහාරො ච බහිද්ධා කබළීකාරො ආහාරො ච අජ්ඣත්තස්ස කායස්ස අත්ථිපච්චයෙන පච්චයො. (1)

අජ්ඣත්තො ධම්මො ච බහිද්ධා ධම්මො ච බහිද්ධා ධම්මස්ස අත්ථිපච්චයෙන පච්චයො – පුරෙජාතං, ආහාරං. පුරෙජාතං – අජ්ඣත්තං රූපායතනඤ්ච බහිද්ධා චක්ඛායතනඤ්ච බහිද්ධා චක්ඛුවිඤ්ඤාණස්ස අත්ථිපච්චයෙන පච්චයො…පෙ… අජ්ඣත්තං ඵොට්ඨබ්බායතනඤ්ච බහිද්ධා කායායතනඤ්ච බහිද්ධා කායවිඤ්ඤාණස්ස අත්ථිපච්චයෙන පච්චයො. අජ්ඣත්තං රූපායතනඤ්ච බහිද්ධා වත්ථු ච බහිද්ධා ඛන්ධානං අත්ථිපච්චයෙන පච්චයො…පෙ… අජ්ඣත්තං ඵොට්ඨබ්බායතනඤ්ච බහිද්ධා වත්ථු ච බහිද්ධා ඛන්ධානං අත්ථිපච්චයෙන පච්චයො. ආහාරං – අජ්ඣත්තො කබළීකාරො ආහාරො ච බහිද්ධා කබළීකාරො ආහාරො ච බහිද්ධා කායස්ස අත්ථිපච්චයෙන පච්චයො. (2)

නත්ථිවිගතාවිගතපච්චයා

49. අජ්ඣත්තො ධම්මො අජ්ඣත්තස්ස ධම්මස්ස නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.