1. විභඞ්ගවාරො

හෙතුපච්චයො

18. අජ්ඣත්තං ධම්මං පච්චයා අජ්ඣත්තො ධම්මො උප්පජ්ජති හෙතුපච්චයා – අජ්ඣත්තං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ (පරිපුණ්ණං). එකං මහාභූතං…පෙ… වත්ථුං පච්චයා අජ්ඣත්තා ඛන්ධා. (1)

බහිද්ධා ධම්මං පච්චයා බහිද්ධා ධම්මො උප්පජ්ජති හෙතුපච්චයා – බහිද්ධා එකං ඛන්ධං පච්චයා තයො ඛන්ධා…පෙ… පටිසන්ධික්ඛණෙ…පෙ… එකං මහාභූතං…පෙ… වත්ථුං පච්චයා බහිද්ධා ඛන්ධා. (1)

ආරම්මණපච්චයො

19. අජ්ඣත්තං ධම්මං පච්චයා අජ්ඣත්තො ධම්මො උප්පජ්ජති ආරම්මණපච්චයා (පටිච්චවාරසදිසං), චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං…පෙ… වත්ථුං පච්චයා අජ්ඣත්තා ඛන්ධා. (1)

බහිද්ධා ධම්මං පච්චයා බහිද්ධා ධම්මො උප්පජ්ජති ආරම්මණපච්චයා (පටිච්චවාරසදිසං), චක්ඛායතනං…පෙ… කායායතනං…පෙ… වත්ථුං පච්චයා බහිද්ධා ඛන්ධා. (1)

අධිපතිපච්චයාදි

20. අජ්ඣත්තං ධම්මං පච්චයා අජ්ඣත්තො ධම්මො උප්පජ්ජති අධිපතිපච්චයා… (වත්ථුං අතිරෙකං, පටිච්චවාරසදිසං) අනන්තරපච්චයා… සමනන්තරපච්චයා… සහජාතපච්චයා… (සහජාතවාරෙ පරිපුණ්ණා) මහාභූතෙ පච්චයා…පෙ… (මහාභූතානං ඛන්ධානඤ්ච පච්ඡා පඤ්චායතනානි ච වත්ථු ච කාතබ්බා) අඤ්ඤමඤ්ඤපච්චයා… නිස්සයපච්චයා…පෙ… අවිගතපච්චයා.