1. විභඞ්ගවාරො

නහෙතුපච්චයො

6. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නහෙතුපච්චයා – අහෙතුකං අතීතාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ …පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

7. අනාගතාරම්මණං ධම්මං පටිච්ච අනාගතාරම්මණො ධම්මො උප්පජ්ජති නහෙතුපච්චයා – අහෙතුකං අනාගතාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

8. පච්චුප්පන්නාරම්මණං ධම්මං පටිච්ච පච්චුප්පන්නාරම්මණො ධම්මො උප්පජ්ජති නහෙතුපච්චයා – අහෙතුකං පච්චුප්පන්නාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නඅධිපතිපච්චයො

9. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නඅධිපතිපච්චයා (අනුලොමසහජාතසදිසං).

නපුරෙජාතපච්චයො

10. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නපුරෙජාතපච්චයා – අරූපෙ අතීතාරම්මණං එකං ඛන්ධං පටිච්ච…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

අනාගතාරම්මණං ධම්මං පටිච්ච අනාගතාරම්මණො ධම්මො උප්පජ්ජති නපුරෙජාතපච්චයා – අරූපෙ අනාගතාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

පච්චුප්පන්නාරම්මණං ධම්මං පටිච්ච පච්චුප්පන්නාරම්මණො ධම්මො උප්පජ්ජති නපුරෙජාතපච්චයා – පටිසන්ධික්ඛණෙ පච්චුප්පන්නාරම්මණං එකං ඛන්ධං පටිච්ච…පෙ… ද්වෙ ඛන්ධෙ…පෙ…. (1)

නපච්ඡාජාතපච්චයාදි

11. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නපච්ඡාජාතපච්චයා… නආසෙවනපච්චයා (නඅධිපතිසදිසා)… නකම්මපච්චයා – අතීතාරම්මණෙ ඛන්ධෙ පටිච්ච අතීතාරම්මණා චෙතනා. (1)

අනාගතාරම්මණං ධම්මං පටිච්ච අනාගතාරම්මණො ධම්මො උප්පජ්ජති නකම්මපච්චයා – අනාගතාරම්මණෙ ඛන්ධෙ පටිච්ච අනාගතාරම්මණා චෙතනා. (1)

පච්චුප්පන්නාරම්මණං ධම්මං පටිච්ච පච්චුප්පන්නාරම්මණො ධම්මො උප්පජ්ජති නකම්මපච්චයා – පච්චුප්පන්නාරම්මණෙ ඛන්ධෙ පටිච්ච පච්චුප්පන්නාරම්මණා චෙතනා. (1)

නවිපාකපච්චයො

12. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නවිපාකපච්චයා…පෙ… (නවිපාකෙ පටිසන්ධි නත්ථි).

නඣානපච්චයො

13. පච්චුප්පන්නාරම්මණං ධම්මං පටිච්ච පච්චුප්පන්නාරම්මණො ධම්මො උප්පජ්ජති නඣානපච්චයා – පඤ්චවිඤ්ඤාණසහගතං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

නමග්ගපච්චයො

14. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නමග්ගපච්චයා – අහෙතුකං අතීතාරම්මණං එකං ඛන්ධං පටිච්ච තයො ඛන්ධා…පෙ… (නහෙතුසදිසා තිස්සො පඤ්හා, මොහො නත්ථි ).

නවිප්පයුත්තපච්චයො

15. අතීතාරම්මණං ධම්මං පටිච්ච අතීතාරම්මණො ධම්මො උප්පජ්ජති නවිප්පයුත්තපච්චයා – අරූපෙ අතීතාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)

අනාගතාරම්මණං ධම්මං පටිච්ච අනාගතාරම්මණො ධම්මො උප්පජ්ජති නවිප්පයුත්තපච්චයා – අරූපෙ අනාගතාරම්මණං එකං ඛන්ධං පටිච්ච තයො ඛන්ධා…පෙ… ද්වෙ ඛන්ධෙ…පෙ…. (1)