1. විභඞ්ගවාරො

හෙතුපච්චයො

19. අතීතාරම්මණො ධම්මො අතීතාරම්මණස්ස ධම්මස්ස හෙතුපච්චයෙන පච්චයො – අතීතාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. පටිසන්ධික්ඛණෙ අතීතාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

අනාගතාරම්මණො ධම්මො අනාගතාරම්මණස්ස ධම්මස්ස හෙතුපච්චයෙන පච්චයො – අනාගතාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස හෙතුපච්චයෙන පච්චයො – පච්චුප්පන්නාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. පටිසන්ධික්ඛණෙ පච්චුප්පන්නාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

ආරම්මණපච්චයො

20. අතීතාරම්මණො ධම්මො අතීතාරම්මණස්ස ධම්මස්ස ආරම්මණපච්චයෙන පච්චයො – අතීතං විඤ්ඤාණඤ්චායතනං පච්චවෙක්ඛති, නෙවසඤ්ඤානාසඤ්ඤායතනං පච්චවෙක්ඛති. අතීතාරම්මණං අතීතං ඉද්ධිවිධඤාණං පච්චවෙක්ඛති, චෙතොපරියඤාණං… පුබ්බෙනිවාසානුස්සතිඤාණං… යථාකම්මූපගඤාණං පච්චවෙක්ඛති. අරියා අතීතාරම්මණෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. අතීතාරම්මණෙ අතීතෙ ඛන්ධෙ අනිච්චතො දුක්ඛතො අනත්තතො විපස්සති, අස්සාදෙති අභිනන්දති; තං ආරබ්භ අතීතාරම්මණො රාගො උප්පජ්ජති, දිට්ඨි…පෙ… විචිකිච්ඡා…පෙ… උද්ධච්චං…පෙ… දොමනස්සං උප්පජ්ජති. අතීතාරම්මණා අතීතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, ආවජ්ජනාය ආරම්මණපච්චයෙන පච්චයො. (1)

අතීතාරම්මණො ධම්මො අනාගතාරම්මණස්ස ධම්මස්ස ආරම්මණපච්චයෙන පච්චයො – අනාගතං විඤ්ඤාණඤ්චායතනං පච්චවෙක්ඛති, නෙවසඤ්ඤානාසඤ්ඤායතනං පච්චවෙක්ඛති. අතීතාරම්මණං අනාගතං ඉද්ධිවිධඤාණං පච්චවෙක්ඛති, චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං පච්චවෙක්ඛති. අතීතාරම්මණෙ අනාගතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති; තං ආරබ්භ අනාගතාරම්මණො රාගො උප්පජ්ජති…පෙ… දොමනස්සං උප්පජ්ජති. අතීතාරම්මණා අනාගතා ඛන්ධා චෙතොපරියඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

අතීතාරම්මණො ධම්මො පච්චුප්පන්නාරම්මණස්ස ධම්මස්ස ආරම්මණපච්චයෙන පච්චයො – චෙතොපරියඤාණෙන අතීතාරම්මණපච්චුප්පන්නචිත්තසමඞ්ගිස්ස චිත්තං ජානාති. අතීතාරම්මණා පච්චුප්පන්නා ඛන්ධා චෙතොපරියඤාණස්ස, ආවජ්ජනාය ආරම්මණපච්චයෙන පච්චයො. (3)

21. අනාගතාරම්මණො ධම්මො අනාගතාරම්මණස්ස ධම්මස්ස ආරම්මණපච්චයෙන පච්චයො – අනාගතාරම්මණං අනාගතං ඉද්ධිවිධඤාණං පච්චවෙක්ඛති, චෙතොපරියඤාණං…පෙ… අනාගතංසඤාණං…පෙ… අනාගතාරම්මණෙ අනාගතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති; තං ආරබ්භ අනාගතාරම්මණො රාගො උප්පජ්ජති…පෙ… දොමනස්සං උප්පජ්ජති. අනාගතාරම්මණා අනාගතා ඛන්ධා චෙතොපරියඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

අනාගතාරම්මණො ධම්මො අතීතාරම්මණස්ස ධම්මස්ස ආරම්මණපච්චයෙන පච්චයො – අනාගතාරම්මණං අතීතං ඉද්ධිවිධඤාණං පච්චවෙක්ඛති, චෙතොපරියඤාණං… අනාගතංසඤාණං…පෙ… අරියා අනාගතාරම්මණෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති. පුබ්බෙ සමුදාචිණ්ණෙ කිලෙසෙ ජානන්ති. අනාගතාරම්මණෙ අතීතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති; තං ආරබ්භ අතීතාරම්මණො රාගො උප්පජ්ජති…පෙ… දොමනස්සං උප්පජ්ජති. අනාගතාරම්මණා අතීතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, ආවජ්ජනාය ආරම්මණපච්චයෙන පච්චයො. (2)

අනාගතාරම්මණො ධම්මො පච්චුප්පන්නාරම්මණස්ස ධම්මස්ස ආරම්මණපච්චයෙන පච්චයො – චෙතොපරියඤාණෙන අනාගතාරම්මණපච්චුප්පන්නචිත්තසමඞ්ගිස්ස චිත්තං ජානාති. අනාගතාරම්මණා පච්චුප්පන්නා ඛන්ධා චෙතොපරියඤාණස්ස, ආවජ්ජනාය ආරම්මණපච්චයෙන පච්චයො. (3)

22. පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස ආරම්මණපච්චයෙන පච්චයො – චෙතොපරියඤාණෙන පච්චුප්පන්නාරම්මණපච්චුප්පන්නචිත්තසමඞ්ගිස්ස චිත්තං ජානාති. පච්චුප්පන්නාරම්මණා පච්චුප්පන්නා ඛන්ධා චෙතොපරියඤාණස්ස, ආවජ්ජනාය ආරම්මණපච්චයෙන පච්චයො. (1)

පච්චුප්පන්නාරම්මණො ධම්මො අතීතාරම්මණස්ස ධම්මස්ස ආරම්මණපච්චයෙන පච්චයො – අතීතං දිබ්බං චක්ඛුං පච්චවෙක්ඛති, දිබ්බං සොතධාතුං පච්චවෙක්ඛති, පච්චුප්පන්නාරම්මණං අතීතං ඉද්ධිවිධඤාණං පච්චවෙක්ඛති, චෙතොපරියඤාණං පච්චවෙක්ඛති. අරියා පච්චුප්පන්නාරම්මණෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. පච්චුප්පන්නාරම්මණෙ අතීතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති; තං ආරබ්භ අතීතාරම්මණො රාගො උප්පජ්ජති…පෙ… දොමනස්සං උප්පජ්ජති. පච්චුප්පන්නාරම්මණා අතීතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, ආවජ්ජනාය ආරම්මණපච්චයෙන පච්චයො. (2)

පච්චුප්පන්නාරම්මණො ධම්මො අනාගතාරම්මණස්ස ධම්මස්ස ආරම්මණපච්චයෙන පච්චයො – අනාගතං දිබ්බං චක්ඛුං පච්චවෙක්ඛති, දිබ්බං සොතධාතුං පච්චවෙක්ඛති, පච්චුප්පන්නාරම්මණං අනාගතං ඉද්ධිවිධඤාණං පච්චවෙක්ඛති, චෙතොපරියඤාණං…පෙ… පච්චුප්පන්නාරම්මණෙ අනාගතෙ ඛන්ධෙ අනිච්චතො…පෙ… විපස්සති…පෙ… තං ආරබ්භ අනාගතාරම්මණො රාගො උප්පජ්ජති…පෙ… දොමනස්සං උප්පජ්ජති. පච්චුප්පන්නාරම්මණා අනාගතා ඛන්ධා චෙතොපරියඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (3)

අධිපතිපච්චයො

23. අතීතාරම්මණො ධම්මො අතීතාරම්මණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අතීතං විඤ්ඤාණඤ්චායතනං ගරුං කත්වා පච්චවෙක්ඛති, නෙවසඤ්ඤානාසඤ්ඤායතනං ගරුං කත්වා පච්චවෙක්ඛති. අතීතාරම්මණං අතීතං ඉද්ධිවිධඤාණං ගරුං කත්වා පච්චවෙක්ඛති, චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං ගරුං කත්වා පච්චවෙක්ඛති. අතීතාරම්මණෙ අතීතෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා අතීතාරම්මණො රාගො උප්පජ්ජති, දිට්ඨි උප්පජ්ජති. සහජාතාධිපති – අතීතාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

අතීතාරම්මණො ධම්මො අනාගතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – අනාගතං විඤ්ඤාණඤ්චායතනං ගරුං කත්වා…පෙ… නෙවසඤ්ඤානාසඤ්ඤායතනං …පෙ… අතීතාරම්මණං අනාගතං ඉද්ධිවිධඤාණං ගරුං කත්වා…පෙ… චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අතීතාරම්මණෙ අනාගතෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා අනාගතාරම්මණො රාගො උප්පජ්ජති, දිට්ඨි උප්පජ්ජති. (2)

24. අනාගතාරම්මණො ධම්මො අනාගතාරම්මණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අනාගතාරම්මණං අනාගතං ඉද්ධිවිධඤාණං ගරුං කත්වා…පෙ… චෙතොපරියඤාණං…පෙ… අනාගතංසඤාණං ගරුං කත්වා පච්චවෙක්ඛති. අනාගතාරම්මණෙ අනාගතෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා අනාගතාරම්මණො රාගො උප්පජ්ජති, දිට්ඨි උප්පජ්ජති. සහජාතාධිපති – අනාගතාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

අනාගතාරම්මණො ධම්මො අතීතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – අනාගතාරම්මණං අතීතං ඉද්ධිවිධඤාණං ගරුං කත්වා…පෙ… චෙතොපරියඤාණං…පෙ… අනාගතංසඤාණං ගරුං කත්වා…පෙ… අනාගතාරම්මණෙ අතීතෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා අතීතාරම්මණො රාගො උප්පජ්ජති, දිට්ඨි උප්පජ්ජති. (2)

25. පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස අධිපතිපච්චයෙන පච්චයො. සහජාතාධිපති – පච්චුප්පන්නාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

පච්චුප්පන්නාරම්මණො ධම්මො අතීතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – අතීතං දිබ්බං චක්ඛුං ගරුං කත්වා පච්චවෙක්ඛති, දිබ්බං සොතධාතුං ගරුං කත්වා පච්චවෙක්ඛති, පච්චුප්පන්නාරම්මණං අතීතං ඉද්ධිවිධඤාණං ගරුං කත්වා…පෙ… චෙතොපරියඤාණං ගරුං කත්වා…පෙ… පච්චුප්පන්නාරම්මණෙ අතීතෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා අතීතාරම්මණො රාගො උප්පජ්ජති, දිට්ඨි උප්පජ්ජති. (2)

පච්චුප්පන්නාරම්මණො ධම්මො අනාගතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – අනාගතං දිබ්බං චක්ඛුං ගරුං කත්වා පච්චවෙක්ඛති, දිබ්බං සොතධාතුං ගරුං කත්වා …පෙ… පච්චුප්පන්නාරම්මණං අනාගතං ඉද්ධිවිධඤාණං ගරුං කත්වා…පෙ… චෙතොපරියඤාණං ගරුං කත්වා…පෙ… පච්චුප්පන්නාරම්මණෙ අනාගතෙ ඛන්ධෙ ගරුං කත්වා අස්සාදෙති අභිනන්දති; තං ගරුං කත්වා අනාගතාරම්මණො රාගො උප්පජ්ජති, දිට්ඨි උප්පජ්ජති. (3)

අනන්තරපච්චයො

26. අතීතාරම්මණො ධම්මො අතීතාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා අතීතාරම්මණා ඛන්ධා පච්ඡිමානං පච්ඡිමානං අතීතාරම්මණානං ඛන්ධානං අනන්තරපච්චයෙන පච්චයො. (1)

අතීතාරම්මණො ධම්මො අනාගතාරම්මණස්ස ධම්මස්ස අනන්තරපච්චයෙන පච්චයො – අතීතාරම්මණං භවඞ්ගං අනාගතාරම්මණාය ආවජ්ජනාය අනන්තරපච්චයෙන පච්චයො. (2)

අතීතාරම්මණො ධම්මො පච්චුප්පන්නාරම්මණස්ස ධම්මස්ස අනන්තරපච්චයෙන පච්චයො – අතීතාරම්මණං චුතිචිත්තං පච්චුප්පන්නාරම්මණස්ස පටිසන්ධිචිත්තස්ස අනන්තරපච්චයෙන පච්චයො. අතීතාරම්මණං භවඞ්ගං පච්චුප්පන්නාරම්මණාය ආවජ්ජනාය අනන්තරපච්චයෙන පච්චයො. (3)

27. අනාගතාරම්මණො ධම්මො අනාගතාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා අනාගතාරම්මණා ඛන්ධා පච්ඡිමානං පච්ඡිමානං අනාගතාරම්මණානං ඛන්ධානං අනන්තරපච්චයෙන පච්චයො. (1)

අනාගතාරම්මණො ධම්මො අතීතාරම්මණස්ස ධම්මස්ස අනන්තරපච්චයෙන පච්චයො – අනාගතාරම්මණං ඉද්ධිවිධඤාණං අතීතාරම්මණස්ස වුට්ඨානස්ස…පෙ… චෙතොපරියඤාණං අතීතාරම්මණස්ස වුට්ඨානස්ස…පෙ… අනාගතංසඤාණං අතීතාරම්මණස්ස වුට්ඨානස්ස…පෙ… අනාගතාරම්මණා ඛන්ධා අතීතාරම්මණස්ස වුට්ඨානස්ස අනන්තරපච්චයෙන පච්චයො. (2)

28. පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා පච්චුප්පන්නාරම්මණා ඛන්ධා පච්ඡිමානං පච්ඡිමානං පච්චුප්පන්නාරම්මණානං ඛන්ධානං අනන්තරපච්චයෙන පච්චයො. පච්චුප්පන්නාරම්මණං පටිසන්ධිචිත්තං පච්චුප්පන්නාරම්මණස්ස භවඞ්ගස්ස…පෙ… පච්චුප්පන්නාරම්මණං භවඞ්ගං පච්චුප්පන්නාරම්මණස්ස භවඞ්ගස්ස අනන්තරපච්චයෙන පච්චයො. (1)

පච්චුප්පන්නාරම්මණො ධම්මො අතීතාරම්මණස්ස ධම්මස්ස අනන්තරපච්චයෙන පච්චයො – පච්චුප්පන්නාරම්මණං පටිසන්ධිචිත්තං අතීතාරම්මණස්ස භවඞ්ගස්ස…පෙ… පච්චුප්පන්නාරම්මණං භවඞ්ගං අතීතාරම්මණස්ස භවඞ්ගස්ස…පෙ… පච්චුප්පන්නාරම්මණා ඛන්ධා අතීතාරම්මණස්ස වුට්ඨානස්ස අනන්තරපච්චයෙන පච්චයො. (2)

සමනන්තරපච්චයො

29. අතීතාරම්මණො ධම්මො අතීතාරම්මණස්ස ධම්මස්ස සමනන්තරපච්චයෙන පච්චයො (අනන්තරසදිසං).

සහජාතපච්චයාදි

30. අතීතාරම්මණො ධම්මො අතීතාරම්මණස්ස ධම්මස්ස සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො…(තයොපි පච්චයා පටිච්චවාරසදිසා).

උපනිස්සයපච්චයො

31. අතීතාරම්මණො ධම්මො අතීතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අතීතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අතීතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (1)

අතීතාරම්මණො ධම්මො අනාගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අතීතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අනාගතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (2)

අතීතාරම්මණො ධම්මො පච්චුප්පන්නාරම්මණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – අතීතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා පච්චුප්පන්නාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (3)

32. අනාගතාරම්මණො ධම්මො අනාගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අනාගතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අනාගතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (1)

අනාගතාරම්මණො ධම්මො අතීතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අනාගතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අතීතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (2)

අනාගතාරම්මණො ධම්මො පච්චුප්පන්නාරම්මණස්ස ධම්මස්ස උපනිස්සයපච්චයෙන පච්චයො. පකතූපනිස්සයො – අනාගතාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා පච්චුප්පන්නාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (3)

33. පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – පච්චුප්පන්නාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා පච්චුප්පන්නාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (1)

පච්චුප්පන්නාරම්මණො ධම්මො අතීතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – පච්චුප්පන්නාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අතීතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (2)

පච්චුප්පන්නාරම්මණො ධම්මො අනාගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, පකතූපනිස්සයො…පෙ…. පකතූපනිස්සයො – පච්චුප්පන්නාරම්මණා අනිච්චානුපස්සනා, දුක්ඛානුපස්සනා, අනත්තානුපස්සනා අනාගතාරම්මණාය අනිච්චානුපස්සනාය, දුක්ඛානුපස්සනාය, අනත්තානුපස්සනාය උපනිස්සයපච්චයෙන පච්චයො. (3)

ආසෙවනපච්චයො

34. අතීතාරම්මණො ධම්මො අතීතාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා අතීතාරම්මණා ඛන්ධා පච්ඡිමානං පච්ඡිමානං අතීතාරම්මණානං ඛන්ධානං ආසෙවනපච්චයෙන පච්චයො. (1)

අනාගතාරම්මණො ධම්මො අනාගතාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා අනාගතාරම්මණා ඛන්ධා පච්ඡිමානං පච්ඡිමානං අනාගතාරම්මණානං ඛන්ධානං ආසෙවනපච්චයෙන පච්චයො. (1)

පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා පච්චුප්පන්නාරම්මණා ඛන්ධා පච්ඡිමානං පච්ඡිමානං පච්චුප්පන්නාරම්මණානං ඛන්ධානං ආසෙවනපච්චයෙන පච්චයො. (1)

කම්මපච්චයො

35. අතීතාරම්මණො ධම්මො අතීතාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අතීතාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ…. නානාක්ඛණිකා – අතීතාරම්මණා චෙතනා විපාකානං අතීතාරම්මණානං ඛන්ධානං කම්මපච්චයෙන පච්චයො. (1)

අතීතාරම්මණො ධම්මො අනාගතාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – අතීතාරම්මණා චෙතනා විපාකානං අනාගතාරම්මණානං ඛන්ධානං කම්මපච්චයෙන පච්චයො. (2)

අතීතාරම්මණො ධම්මො පච්චුප්පන්නාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – අතීතාරම්මණා චෙතනා විපාකානං පච්චුප්පන්නාරම්මණානං ඛන්ධානං කම්මපච්චයෙන පච්චයො. (3)

36. අනාගතාරම්මණො ධම්මො අනාගතාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අනාගතාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. නානාක්ඛණිකා – අනාගතාරම්මණා චෙතනා විපාකානං අනාගතාරම්මණානං ඛන්ධානං කම්මපච්චයෙන පච්චයො. (1)

අනාගතාරම්මණො ධම්මො අතීතාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – අනාගතාරම්මණා චෙතනා විපාකානං අතීතාරම්මණානං ඛන්ධානං කම්මපච්චයෙන පච්චයො. (2)

අනාගතාරම්මණො ධම්මො පච්චුප්පන්නාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – අනාගතාරම්මණා චෙතනා විපාකානං පච්චුප්පන්නාරම්මණානං ඛන්ධානං කම්මපච්චයෙන පච්චයො. (3)

37. පච්චුප්පන්නාරම්මණො ධම්මො පච්චුප්පන්නාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – පච්චුප්පන්නාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ… නානාක්ඛණිකා – පච්චුප්පන්නාරම්මණා චෙතනා විපාකානං පච්චුප්පන්නාරම්මණානං ඛන්ධානං කම්මපච්චයෙන පච්චයො. (1)

පච්චුප්පන්නාරම්මණො ධම්මො අතීතාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – පච්චුප්පන්නාරම්මණා චෙතනා විපාකානං අතීතාරම්මණානං ඛන්ධානං කම්මපච්චයෙන පච්චයො. (2)

පච්චුප්පන්නාරම්මණො ධම්මො අනාගතාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – පච්චුප්පන්නාරම්මණා චෙතනා විපාකානං අනාගතාරම්මණානං ඛන්ධානං කම්මපච්චයෙන පච්චයො. (3)

විපාකපච්චයාදි

38. අතීතාරම්මණො ධම්මො අතීතාරම්මණස්ස ධම්මස්ස විපාකපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො… අත්ථිපච්චයෙන පච්චයො… නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො.