2. සඞ්ඛ්‍යාවාරො
17. හෙතුයා එකං, ආරම්මණෙ තීණි, අධිපතියා තීණි, අනන්තරෙ එකං, සමනන්තරෙ එකං, සහජාතෙ අඤ්ඤමඤ්ඤෙ නිස්සයෙ එකං, උපනිස්සයෙ තීණි, පුරෙජාතෙ පච්ඡාජාතෙ ආසෙවනෙ එකං, කම්මෙ ද්වෙ, විපාකෙ ආහාරෙ එකං…පෙ… අවිගතෙ එකං (එවං ගණෙතබ්බං).
අනුලොමං.
පච්චනීයුද්ධාරො
18. අතීතො ධම්මො පච්චුප්පන්නස්ස ධම්මස්ස ආරම්මණපච්චයෙන පච්චයො… උපනිස්සයපච්චයෙන පච්චයො… කම්මපච්චයෙන පච්චයො. (1)
අනාගතො ධම්මො පච්චුප්පන්නස්ස ධම්මස්ස ආරම්මණපච්චයෙන පච්චයො… උපනිස්සයපච්චයෙන පච්චයො. (1)
පච්චුප්පන්නො ධම්මො පච්චුප්පන්නස්ස ධම්මස්ස ආරම්මණපච්චයෙන පච්චයො… සහජාතපච්චයෙන පච්චයො… උපනිස්සයපච්චයෙන පච්චයො… පුරෙජාතපච්චයෙන පච්චයො… පච්ඡාජාතපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො. (1)