1. විභඞ්ගවාරො

හෙතුපච්චයො

13. පරිත්තාරම්මණො ධම්මො පරිත්තාරම්මණස්ස ධම්මස්ස හෙතුපච්චයෙන පච්චයො – පරිත්තාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. පටිසන්ධික්ඛණෙ පරිත්තාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

මහග්ගතාරම්මණො ධම්මො මහග්ගතාරම්මණස්ස ධම්මස්ස හෙතුපච්චයෙන පච්චයො – මහග්ගතාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. පටිසන්ධික්ඛණෙ…පෙ…. (1)

අප්පමාණාරම්මණො ධම්මො අප්පමාණාරම්මණස්ස ධම්මස්ස හෙතුපච්චයෙන පච්චයො – අප්පමාණාරම්මණා හෙතූ සම්පයුත්තකානං ඛන්ධානං හෙතුපච්චයෙන පච්චයො. (1)

ආරම්මණපච්චයො

14. පරිත්තාරම්මණො ධම්මො පරිත්තාරම්මණස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, අරියා පරිත්තාරම්මණෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. පරිත්තාරම්මණෙ පරිත්තෙ ඛන්ධෙ අනිච්චතො දුක්ඛතො අනත්තතො විපස්සති, අස්සාදෙති අභිනන්දති, තං ආරබ්භ පරිත්තාරම්මණො රාගො උප්පජ්ජති…පෙ… දොමනස්සං උප්පජ්ජති. චෙතොපරියඤාණෙන පරිත්තාරම්මණපරිත්තචිත්තසමඞ්ගිස්ස චිත්තං ජානාති. පරිත්තාරම්මණා පරිත්තා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

පරිත්තාරම්මණො ධම්මො මහග්ගතාරම්මණස්ස ධම්මස්ස ආරම්මණපච්චයෙන පච්චයො – දිබ්බං චක්ඛුං පච්චවෙක්ඛති, දිබ්බං සොතධාතුං පච්චවෙක්ඛති, පරිත්තාරම්මණං ඉද්ධිවිධඤාණං පච්චවෙක්ඛති, චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං පච්චවෙක්ඛති. පරිත්තාරම්මණෙ මහග්ගතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති, තං ආරබ්භ මහග්ගතාරම්මණො රාගො උප්පජ්ජති…පෙ… දොමනස්සං උප්පජ්ජති. චෙතොපරියඤාණෙන පරිත්තාරම්මණමහග්ගතචිත්තසමඞ්ගිස්ස චිත්තං ජානාති. පරිත්තාරම්මණා මහග්ගතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

15. මහග්ගතාරම්මණො ධම්මො මහග්ගතාරම්මණස්ස ධම්මස්ස ආරම්මණපච්චයෙන පච්චයො – විඤ්ඤාණඤ්චායතනං පච්චවෙක්ඛති, නෙවසඤ්ඤානාසඤ්ඤායතනං පච්චවෙක්ඛති, මහග්ගතාරම්මණං ඉද්ධිවිධඤාණං පච්චවෙක්ඛති, චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං පච්චවෙක්ඛති. මහග්ගතාරම්මණෙ මහග්ගතෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති, තං ආරබ්භ මහග්ගතාරම්මණො රාගො උප්පජ්ජති…පෙ… දොමනස්සං උප්පජ්ජති. චෙතොපරියඤාණෙන මහග්ගතාරම්මණමහග්ගතචිත්තසමඞ්ගිස්ස චිත්තං ජානාති. මහග්ගතාරම්මණා මහග්ගතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

මහග්ගතාරම්මණො ධම්මො පරිත්තාරම්මණස්ස ධම්මස්ස ආරම්මණපච්චයෙන පච්චයො – පඨමජ්ඣානපච්චවෙක්ඛණං පච්චවෙක්ඛති…පෙ… නෙවසඤ්ඤානාසඤ්ඤායතනපච්චවෙක්ඛණං පච්චවෙක්ඛති, දිබ්බචක්ඛුපච්චවෙක්ඛණං පච්චවෙක්ඛති, දිබ්බසොතධාතුපච්චවෙක්ඛණං පච්චවෙක්ඛති, ඉද්ධිවිධඤාණපච්චවෙක්ඛණං…පෙ… චෙතොපරියඤාණපච්චවෙක්ඛණං…පෙ… පුබ්බෙනිවාසානුස්සතිඤාණපච්චවෙක්ඛණං…පෙ… යථාකම්මූපගඤාණපච්චවෙක්ඛණං…පෙ… අනාගතංසඤාණපච්චවෙක්ඛණං පච්චවෙක්ඛති, අරියා මහග්ගතාරම්මණෙ පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. මහග්ගතාරම්මණෙ පරිත්තෙ ඛන්ධෙ අනිච්චතො…පෙ… විපස්සති, අස්සාදෙති අභිනන්දති, තං ආරබ්භ පරිත්තාරම්මණො රාගො උප්පජ්ජති…පෙ… දොමනස්සං උප්පජ්ජති. චෙතොපරියඤාණෙන මහග්ගතාරම්මණපරිත්තචිත්තසමඞ්ගිස්ස චිත්තං ජානාති. මහග්ගතාරම්මණා පරිත්තා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (2)

16. අප්පමාණාරම්මණො ධම්මො අප්පමාණාරම්මණස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති. චෙතොපරියඤාණෙන අප්පමාණාරම්මණඅප්පමාණචිත්තසමඞ්ගිස්ස චිත්තං ජානාති. අප්පමාණාරම්මණා අප්පමාණා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (1)

අප්පමාණාරම්මණො ධම්මො පරිත්තාරම්මණස්ස ධම්මස්ස ආරම්මණපච්චයෙන පච්චයො – අරියා ගොත්‍රභුං පච්චවෙක්ඛන්ති, වොදානං පච්චවෙක්ඛන්ති, මග්ගපච්චවෙක්ඛණං පච්චවෙක්ඛන්ති, ඵලපච්චවෙක්ඛණං පච්චවෙක්ඛන්ති, නිබ්බානපච්චවෙක්ඛණං පච්චවෙක්ඛන්ති. අප්පමාණාරම්මණෙ පරිත්තෙ ඛන්ධෙ අනිච්චතො…පෙ… විපස්සති, චෙතොපරියඤාණෙන අප්පමාණාරම්මණපරිත්තචිත්තසමඞ්ගිස්ස චිත්තං ජානාති. අප්පමාණාරම්මණා පරිත්තා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, යථාකම්මූපගඤාණස්ස, අනාගතංසඤාණස්ස ආවජ්ජනාය ආරම්මණපච්චයෙන පච්චයො. (2)

අප්පමාණාරම්මණො ධම්මො මහග්ගතාරම්මණස්ස ධම්මස්ස ආරම්මණපච්චයෙන පච්චයො – අරියා අප්පමාණාරම්මණං චෙතොපරියඤාණං පච්චවෙක්ඛන්ති, පුබ්බෙනිවාසානුස්සතිඤාණං පච්චවෙක්ඛන්ති, අනාගතංසඤාණං පච්චවෙක්ඛන්ති. චෙතොපරියඤාණෙන අප්පමාණාරම්මණමහග්ගතචිත්තසමඞ්ගිස්ස චිත්තං ජානන්ති. අප්පමාණාරම්මණං මහග්ගතා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස, ආවජ්ජනාය ආරම්මණපච්චයෙන පච්චයො. (3)

අධිපතිපච්චයො

17. පරිත්තාරම්මණො ධම්මො පරිත්තාරම්මණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා තං ගරුං කත්වා පච්චවෙක්ඛති, පුබ්බෙ සුචිණ්ණානි ගරුං කත්වා පච්චවෙක්ඛති, පරිත්තාරම්මණෙ පරිත්තෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා පරිත්තාරම්මණො රාගො උප්පජ්ජති, දිට්ඨි උප්පජ්ජති. සහජාතාධිපති – පරිත්තාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

පරිත්තාරම්මණො ධම්මො මහග්ගතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – දිබ්බං චක්ඛුං ගරුං කත්වා පච්චවෙක්ඛති, දිබ්බං සොතධාතුං…පෙ… පරිත්තාරම්මණං ඉද්ධිවිධඤාණං…පෙ… චෙතොපරියඤාණං…පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං ගරුං කත්වා පච්චවෙක්ඛති. පරිත්තාරම්මණෙ මහග්ගතෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා මහග්ගතාරම්මණො රාගො උප්පජ්ජති, දිට්ඨි උප්පජ්ජති. (2)

18. මහග්ගතාරම්මණො ධම්මො මහග්ගතාරම්මණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – විඤ්ඤාණඤ්චායතනං ගරුං කත්වා පච්චවෙක්ඛති, නෙවසඤ්ඤානාසඤ්ඤායතනං…පෙ… මහග්ගතාරම්මණං ඉද්ධිවිධඤාණං…පෙ… චෙතොපරියඤාණං …පෙ… පුබ්බෙනිවාසානුස්සතිඤාණං…පෙ… යථාකම්මූපගඤාණං…පෙ… අනාගතංසඤාණං ගරුං කත්වා පච්චවෙක්ඛති. මහග්ගතාරම්මණෙ මහග්ගතෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා මහග්ගතාරම්මණො රාගො උප්පජ්ජති, දිට්ඨි උප්පජ්ජති. සහජාතාධිපති – මහග්ගතාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

මහග්ගතාරම්මණො ධම්මො පරිත්තාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – පඨමජ්ඣානපච්චවෙක්ඛණං ගරුං කත්වා පච්චවෙක්ඛති…පෙ… අනාගතංසඤාණපච්චවෙක්ඛණං ගරුං කත්වා පච්චවෙක්ඛති. මහග්ගතාරම්මණෙ පරිත්තෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා පරිත්තාරම්මණො රාගො උප්පජ්ජති, දිට්ඨි උප්පජ්ජති. (2)

19. අප්පමාණාරම්මණො ධම්මො අප්පමාණාරම්මණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං ගරුං කත්වා පච්චවෙක්ඛන්ති. සහජාතාධිපති – අප්පමාණාරම්මණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

අප්පමාණාරම්මණො ධම්මො පරිත්තාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – සෙක්ඛා ගොත්‍රභුං ගරුං කත්වා පච්චවෙක්ඛන්ති, වොදානං ගරුං කත්වා පච්චවෙක්ඛන්ති, මග්ගපච්චවෙක්ඛණං ගරුං කත්වා පච්චවෙක්ඛන්ති, ඵලපච්චවෙක්ඛණං ගරුං කත්වා පච්චවෙක්ඛන්ති, නිබ්බානපච්චවෙක්ඛණං ගරුං කත්වා පච්චවෙක්ඛන්ති. (2)

අප්පමාණාරම්මණො ධම්මො මහග්ගතාරම්මණස්ස ධම්මස්ස අධිපතිපච්චයෙන පච්චයො. ආරම්මණාධිපති – සෙක්ඛා අප්පමාණාරම්මණං චෙතොපරියඤාණං ගරුං කත්වා පච්චවෙක්ඛන්ති. පුබ්බෙනිවාසානුස්සතිඤාණං…පෙ… අනාගතංසඤාණං ගරුං කත්වා පච්චවෙක්ඛන්ති. (3)

අනන්තරපච්චයො

20. පරිත්තාරම්මණො ධම්මො පරිත්තාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා පරිත්තාරම්මණා ඛන්ධා පච්ඡිමානං පච්ඡිමානං පරිත්තාරම්මණානං ඛන්ධානං අනන්තරපච්චයෙන පච්චයො. (1)

පරිත්තාරම්මණො ධම්මො මහග්ගතාරම්මණස්ස ධම්මස්ස අනන්තරපච්චයෙන පච්චයො – පරිත්තාරම්මණං චුතිචිත්තං මහග්ගතාරම්මණස්ස උපපත්තිචිත්තස්ස අනන්තරපච්චයෙන පච්චයො. පරිත්තාරම්මණං භවඞ්ගං මහග්ගතාරම්මණාය ආවජ්ජනාය අනන්තරපච්චයෙන පච්චයො. පරිත්තාරම්මණා ඛන්ධා මහග්ගතාරම්මණස්ස වුට්ඨානස්ස අනන්තරපච්චයෙන පච්චයො. (2)

පරිත්තාරම්මණො ධම්මො අප්පමාණාරම්මණස්ස ධම්මස්ස අනන්තරපච්චයෙන පච්චයො – පරිත්තාරම්මණං භවඞ්ගං අප්පමාණාරම්මණාය ආවජ්ජනාය අනන්තරපච්චයෙන පච්චයො. පරිත්තාරම්මණං අනුලොමං ගොත්‍රභුස්ස… අනුලොමං වොදානස්ස… අනුලොමං ඵලසමාපත්තියා අනන්තරපච්චයෙන පච්චයො. (3)

21. මහග්ගතාරම්මණො ධම්මො මහග්ගතාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා මහග්ගතාරම්මණා ඛන්ධා පච්ඡිමානං පච්ඡිමානං මහග්ගතාරම්මණානං ඛන්ධානං අනන්තරපච්චයෙන පච්චයො. (1)

මහග්ගතාරම්මණො ධම්මො පරිත්තාරම්මණස්ස ධම්මස්ස අනන්තරපච්චයෙන පච්චයො – මහග්ගතාරම්මණං චුතිචිත්තං පරිත්තාරම්මණස්ස උපපත්තිචිත්තස්ස අනන්තරපච්චයෙන පච්චයො. මහග්ගතාරම්මණං භවඞ්ගං පරිත්තාරම්මණාය ආවජ්ජනාය අනන්තරපච්චයෙන පච්චයො. මහග්ගතාරම්මණා ඛන්ධා පරිත්තාරම්මණස්ස වුට්ඨානස්ස අනන්තරපච්චයෙන පච්චයො. (2)

මහග්ගතාරම්මණො ධම්මො අප්පමාණාරම්මණස්ස ධම්මස්ස අනන්තරපච්චයෙන පච්චයො – මහග්ගතාරම්මණං භවඞ්ගං අප්පමාණාරම්මණාය ආවජ්ජනාය අනන්තරපච්චයෙන පච්චයො. මහග්ගතාරම්මණං අනුලොමං ගොත්‍රභුස්ස… අනුලොමං වොදානස්ස… අනුලොමං ඵලසමාපත්තියා… නිරොධා වුට්ඨහන්තස්ස නෙවසඤ්ඤානාසඤ්ඤායතනං ඵලසමාපත්තියා අනන්තරපච්චයෙන පච්චයො. (3)

22. අප්පමාණාරම්මණො ධම්මො අප්පමාණාරම්මණස්ස ධම්මස්ස අනන්තරපච්චයෙන පච්චයො – පුරිමා පුරිමා අප්පමාණාරම්මණා ඛන්ධා පච්ඡිමානං පච්ඡිමානං අප්පමාණාරම්මණානං ඛන්ධානං අනන්තරපච්චයෙන පච්චයො. ගොත්‍රභු මග්ගස්ස… වොදානං මග්ගස්ස… මග්ගො ඵලස්ස… ඵලං ඵලස්ස අනන්තරපච්චයෙන පච්චයො. (1)

අප්පමාණාරම්මණො ධම්මො පරිත්තාරම්මණස්ස ධම්මස්ස අනන්තරපච්චයෙන පච්චයො – මග්ගපච්චවෙක්ඛණං පරිත්තාරම්මණස්ස වුට්ඨානස්ස… ඵලපච්චවෙක්ඛණං පරිත්තාරම්මණස්ස වුට්ඨානස්ස… නිබ්බානපච්චවෙක්ඛණං පරිත්තාරම්මණස්ස වුට්ඨානස්ස… අප්පමාණාරම්මණං චෙතොපරියඤාණං පරිත්තාරම්මණස්ස වුට්ඨානස්ස… පුබ්බෙනිවාසානුස්සතිඤාණං පරිත්තාරම්මණස්ස වුට්ඨානස්ස… අනාගතංසඤාණං පරිත්තාරම්මණස්ස වුට්ඨානස්ස… ඵලං පරිත්තාරම්මණස්ස වුට්ඨානස්ස අනන්තරපච්චයෙන පච්චයො. (2)

අප්පමාණාරම්මණො ධම්මො මහග්ගතාරම්මණස්ස ධම්මස්ස අනන්තරපච්චයෙන පච්චයො – මග්ගපච්චවෙක්ඛණං මහග්ගතාරම්මණස්ස වුට්ඨානස්ස… ඵලපච්චවෙක්ඛණං මහග්ගතාරම්මණස්ස වුට්ඨානස්ස… නිබ්බානපච්චවෙක්ඛණං මහග්ගතාරම්මණස්ස වුට්ඨානස්ස… ඵලං මහග්ගතාරම්මණස්ස වුට්ඨානස්ස අනන්තරපච්චයෙන පච්චයො. (3)

සමනන්තරපච්චයො

23. පරිත්තාරම්මණො ධම්මො පරිත්තාරම්මණස්ස ධම්මස්ස සමනන්තරපච්චයෙන පච්චයො (අනන්තරසදිසං).

සහජාතපච්චයාදි

24. පරිත්තාරම්මණො ධම්මො පරිත්තාරම්මණස්ස ධම්මස්ස සහජාතපච්චයෙන පච්චයො… අඤ්ඤමඤ්ඤපච්චයෙන පච්චයො… නිස්සයපච්චයෙන පච්චයො… තීණි (පටිච්චවාරසදිසා කාතබ්බා).

උපනිස්සයපච්චයො

25. පරිත්තාරම්මණො ධම්මො පරිත්තාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරිත්තාරම්මණං සද්ධං උපනිස්සාය දානං දෙති, සීලං…පෙ… උපොසථකම්මං…පෙ… පරිත්තාරම්මණං ඣානං උප්පාදෙති, විපස්සනං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. පරිත්තාරම්මණං සීලං…පෙ… පඤ්ඤං… රාගං දොසං… මොහං… මානං… දිට්ඨිං… පත්ථනං… කායිකං සුඛං… කායිකං දුක්ඛං උපනිස්සාය දානං දෙති, සීලං…පෙ… උපොසථකම්මං…පෙ… පරිත්තාරම්මණං ඣානං උප්පාදෙති, විපස්සනං…පෙ… අභිඤ්ඤං…පෙ… සමාපත්තිං උප්පාදෙති, පාණං හනති…පෙ… සඞ්ඝං භින්දති. පරිත්තාරම්මණා සද්ධා…පෙ… පඤ්ඤා, රාගො…පෙ… පත්ථනා, කායිකං සුඛං… කායිකං දුක්ඛං… පරිත්තාරම්මණාය සද්ධාය…පෙ… පඤ්ඤාය රාගස්ස…පෙ… පත්ථනාය, කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. (1)

පරිත්තාරම්මණො ධම්මො මහග්ගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරිත්තාරම්මණං සද්ධං උපනිස්සාය මහග්ගතාරම්මණං ඣානං උප්පාදෙති, විපස්සනං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. පරිත්තාරම්මණං සීලං…පෙ… පඤ්ඤං… රාගං…පෙ… පත්ථනං… කායිකං සුඛං, කායිකං දුක්ඛං උපනිස්සාය මහග්ගතාරම්මණං ඣානං උප්පාදෙති, විපස්සනං…පෙ… අභිඤ්ඤං…පෙ… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. පරිත්තාරම්මණා සද්ධා…පෙ… කායිකං සුඛං, කායිකං දුක්ඛං, මහග්ගතාරම්මණාය සද්ධාය…පෙ… පඤ්ඤාය රාගස්ස…පෙ… පත්ථනාය උපනිස්සයපච්චයෙන පච්චයො. (2)

පරිත්තාරම්මණො ධම්මො අප්පමාණාරම්මණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරිත්තාරම්මණං සද්ධං උපනිස්සාය අප්පමාණාරම්මණං ඣානං උප්පාදෙති, මග්ගං…පෙ… අභිඤ්ඤං…පෙ… සමාපත්තිං උප්පාදෙති. පරිත්තාරම්මණං සීලං…පෙ… පඤ්ඤං, රාගං…පෙ… කායිකං සුඛං, කායිකං දුක්ඛං උපනිස්සාය අප්පමාණාරම්මණං ඣානං උප්පාදෙති, මග්ගං… අභිඤ්ඤං… සමාපත්තිං උප්පාදෙති. පරිත්තාරම්මණා සද්ධා…පෙ… කායිකං සුඛං, කායිකං දුක්ඛං අප්පමාණාරම්මණාය සද්ධාය…පෙ… පඤ්ඤාය උපනිස්සයපච්චයෙන පච්චයො. (3)

26. මහග්ගතාරම්මණො ධම්මො මහග්ගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතාරම්මණං සද්ධං උපනිස්සාය මහග්ගතාරම්මණං ඣානං උප්පාදෙති, විපස්සනං… අභිඤ්ඤං… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. මහග්ගතාරම්මණං සීලං…පෙ… පඤ්ඤං, රාගං…පෙ… පත්ථනං උපනිස්සාය මහග්ගතාරම්මණං ඣානං උප්පාදෙති…පෙ… දිට්ඨිං ගණ්හාති. මහග්ගතාරම්මණා සද්ධා…පෙ… පඤ්ඤා, රාගො…පෙ… පත්ථනා මහග්ගතාරම්මණාය සද්ධාය…පෙ… පත්ථනාය උපනිස්සයපච්චයෙන පච්චයො. (1)

මහග්ගතාරම්මණො ධම්මො පරිත්තාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතාරම්මණං සද්ධං උපනිස්සාය දානං දෙති, සීලං සමාදියති, උපොසථකම්මං කරොති, පරිත්තාරම්මණං ඣානං උප්පාදෙති, විපස්සනං… අභිඤ්ඤං… සමාපත්තිං උප්පාදෙති, මානං ජප්පෙති, දිට්ඨිං ගණ්හාති. මහග්ගතාරම්මණං සීලං…පෙ… පත්ථනං උපනිස්සාය දානං දෙති…පෙ… දිට්ඨිං ගණ්හාති. මහග්ගතාරම්මණා සද්ධා…පෙ… පත්ථනා පරිත්තාරම්මණාය සද්ධාය…පෙ… පත්ථනාය කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. (2)

මහග්ගතාරම්මණො ධම්මො අප්පමාණාරම්මණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතාරම්මණං සද්ධං උපනිස්සාය අප්පමාණාරම්මණං ඣානං උප්පාදෙති, මග්ගං… අභිඤ්ඤං… සමාපත්තිං උප්පාදෙති. මහග්ගතාරම්මණං සීලං…පෙ… පත්ථනං උපනිස්සාය අප්පමාණාරම්මණං ඣානං උප්පාදෙති…පෙ… සමාපත්තිං උප්පාදෙති. මහග්ගතාරම්මණා සද්ධා…පෙ… පත්ථනා අප්පමාණාරම්මණාය සද්ධාය…පෙ… පඤ්ඤාය උපනිස්සයපච්චයෙන පච්චයො (3)

27. අප්පමාණාරම්මණො ධම්මො අප්පමාණාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණාරම්මණං සද්ධං උපනිස්සාය අප්පමාණාරම්මණං ඣානං උප්පාදෙති, මග්ගං… අභිඤ්ඤං… සමාපත්තිං උප්පාදෙති. අප්පමාණාරම්මණං සීලං…පෙ… පඤ්ඤං උපනිස්සාය අප්පමාණාරම්මණං ඣානං උප්පාදෙති. මග්ගං…පෙ… අභිඤ්ඤං…පෙ… සමාපත්තිං උප්පාදෙති අප්පමාණාරම්මණා සද්ධා…පෙ… පඤ්ඤා අප්පමාණාරම්මණාය සද්ධාය…පෙ… පඤ්ඤාය මග්ගස්ස ඵලසමාපත්තියා උපනිස්සයපච්චයෙන පච්චයො. (1)

අප්පමාණාරම්මණො ධම්මො පරිත්තාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණාරම්මණං සද්ධං උපනිස්සාය දානං දෙති, සීලං සමාදියති, උපොසථකම්මං කරොති, පරිත්තාරම්මණං ඣානං උප්පාදෙති, විපස්සනං… අභිඤ්ඤං… සමාපත්තිං උප්පාදෙති. අප්පමාණාරම්මණං සීලං…පෙ… පඤ්ඤං උපනිස්සාය දානං දෙති…පෙ… සමාපත්තිං උප්පාදෙති. අප්පමාණාරම්මණා සද්ධා…පෙ… පඤ්ඤා පරිත්තාරම්මණාය සද්ධාය…පෙ… පඤ්ඤාය කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. (2)

අප්පමාණාරම්මණො ධම්මො මහග්ගතාරම්මණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණාරම්මණං සද්ධං උපනිස්සාය මහග්ගතාරම්මණං ඣානං උප්පාදෙති, විපස්සනං… අභිඤ්ඤං… සමාපත්තිං උප්පාදෙති. අප්පමාණාරම්මණං සීලං…පෙ… පඤ්ඤං උපනිස්සාය මහග්ගතාරම්මණං ඣානං උප්පාදෙති, විපස්සනං… අභිඤ්ඤං… සමාපත්තිං උප්පාදෙති. අප්පමාණාරම්මණා සද්ධා…පෙ… පඤ්ඤා මහග්ගතාරම්මණාය සද්ධාය…පෙ… පඤ්ඤාය උපනිස්සයපච්චයෙන පච්චයො. (3)

ආසෙවනපච්චයො

28. පරිත්තාරම්මණො ධම්මො පරිත්තාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා පරිත්තාරම්මණා ඛන්ධා පච්ඡිමානං පච්ඡිමානං පරිත්තාරම්මණානං ඛන්ධානං ආසෙවනපච්චයෙන පච්චයො. (1)

පරිත්තාරම්මණො ධම්මො අප්පමාණාරම්මණස්ස ධම්මස්ස ආසෙවනපච්චයෙන පච්චයො – පරිත්තාරම්මණං අනුලොමං ගොත්‍රභුස්ස… අනුලොමං වොදානස්ස ආසෙවනපච්චයෙන පච්චයො. (2)

29. මහග්ගතාරම්මණො ධම්මො මහග්ගතාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා මහග්ගතාරම්මණා ඛන්ධා පච්ඡිමානං පච්ඡිමානං මහග්ගතාරම්මණානං ඛන්ධානං ආසෙවනපච්චයෙන පච්චයො. (1)

මහග්ගතාරම්මණො ධම්මො අප්පමාණාරම්මණස්ස ධම්මස්ස ආසෙවනපච්චයෙන පච්චයො – මහග්ගතාරම්මණං අනුලොමං ගොත්‍රභුස්ස… අනුලොමං වොදානස්ස ආසෙවනපච්චයෙන පච්චයො. (2)

30. අප්පමාණාරම්මණො ධම්මො අප්පමාණාරම්මණස්ස ධම්මස්ස ආසෙවනපච්චයෙන පච්චයො – පුරිමා පුරිමා අප්පමාණාරම්මණා ඛන්ධා පච්ඡිමානං පච්ඡිමානං අප්පමාණාරම්මණානං ඛන්ධානං ආසෙවනපච්චයෙන පච්චයො. ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (1)

කම්මපච්චයො

31. පරිත්තාරම්මණො ධම්මො පරිත්තාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – පරිත්තාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ…. නානාක්ඛණිකා – පරිත්තාරම්මණා චෙතනා විපාකානං පරිත්තාරම්මණානං ඛන්ධානං කම්මපච්චයෙන පච්චයො. (1)

මහග්ගතාරම්මණො ධම්මො මහග්ගතාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – මහග්ගතාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ…පෙ…. නානාක්ඛණිකා – මහග්ගතාරම්මණා චෙතනා විපාකානං මහග්ගතාරම්මණානං ඛන්ධානං කම්මපච්චයෙන පච්චයො. (1)

මහග්ගතාරම්මණො ධම්මො පරිත්තාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – මහග්ගතාරම්මණා චෙතනා විපාකානං පරිත්තාරම්මණානං ඛන්ධානං කම්මපච්චයෙන පච්චයො. (2)

32. අප්පමාණාරම්මණො ධම්මො අප්පමාණාරම්මණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අප්පමාණාරම්මණා චෙතනා සම්පයුත්තකානං ඛන්ධානං කම්මපච්චයෙන පච්චයො. නානාක්ඛණිකා – අප්පමාණාරම්මණා චෙතනා විපාකානං අප්පමාණාරම්මණානං ඛන්ධානං කම්මපච්චයෙන පච්චයො. (1)

අප්පමාණාරම්මණො ධම්මො පරිත්තාරම්මණස්ස ධම්මස්ස කම්මපච්චයෙන පච්චයො. නානාක්ඛණිකා – අප්පමාණාරම්මණා චෙතනා විපාකානං පරිත්තාරම්මණානං ඛන්ධානං කම්මපච්චයෙන පච්චයො. (2)

විපාකපච්චයාදි

33. පරිත්තාරම්මණො ධම්මො පරිත්තාරම්මණස්ස ධම්මස්ස විපාකපච්චයෙන පච්චයො… ආහාරපච්චයෙන පච්චයො… ඉන්ද්‍රියපච්චයෙන පච්චයො… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චය… අත්ථිපච්චයෙන පච්චයො… නත්ථිපච්චයෙන පච්චයො… විගතපච්චයෙන පච්චය… අවිගතපච්චයෙන පච්චයො.