1. විභඞ්ගවාරො

හෙතුපච්චයො

55. පරිත්තො ධම්මො පරිත්තස්ස ධම්මස්ස හෙතුපච්චයෙන පච්චයො – පරිත්තා හෙතූ සම්පයුත්තකානං ඛන්ධානං චිත්තසමුට්ඨානානඤ්ච රූපානං හෙතුපච්චයෙන පච්චයො. පටිසන්ධික්ඛණෙ…පෙ…. (1)

මහග්ගතො ධම්මො මහග්ගතස්ස ධම්මස්ස හෙතුපච්චයෙන පච්චයො… තීණි (පවත්තිපටිසන්ධි කාතබ්බා).

අප්පමාණො ධම්මො අප්පමාණස්ස ධම්මස්ස හෙතුපච්චයෙන පච්චයො… තීණි.

ආරම්මණපච්චයො

56. පරිත්තො ධම්මො පරිත්තස්ස ධම්මස්ස ආරම්මණපච්චයෙන පච්චයො – දානං දත්වා සීලං සමාදියිත්වා උපොසථකම්මං කත්වා තං පච්චවෙක්ඛති, පුබ්බෙ සුචිණ්ණානි පච්චවෙක්ඛති, අරියා ගොත්‍රභුං පච්චවෙක්ඛන්ති, වොදානං පච්චවෙක්ඛන්ති, පහීනෙ කිලෙසෙ පච්චවෙක්ඛන්ති, වික්ඛම්භිතෙ කිලෙසෙ පච්චවෙක්ඛන්ති, පුබ්බෙ සමුදාචිණ්ණෙ කිලෙසෙ ජානන්ති. චක්ඛුං…පෙ… වත්ථුං… පරිත්තෙ ඛන්ධෙ අනිච්චතො…පෙ… විපස්සන්ති අස්සාදෙන්ති අභිනන්දන්ති, තං ආරබ්භ රාගො උප්පජ්ජති …පෙ… දොමනස්සං උප්පජ්ජති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස ආරම්මණපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස ආරම්මණපච්චයෙන පච්චයො – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, චෙතොපරියඤාණෙන පරිත්තචිත්තසමඞ්ගිස්ස චිත්තං ජානාති. පරිත්තා ඛන්ධා ඉද්ධිවිධඤාණස්ස, චෙතොපරියඤාණස්ස පුබ්බෙනිවාසානුස්සතිඤාණස්ස යථාකම්මූපගඤාණස්ස අනාගතංසඤාණස්ස ආරම්මණපච්චයෙන පච්චයො. (2)

57. මහග්ගතො ධම්මො මහග්ගතස්ස ධම්මස්ස ආරම්මණපච්චයෙන පච්චයො – චෙතොපරියඤාණෙන මහග්ගතචිත්තසමඞ්ගිස්ස චිත්තං ජානාති, ආකාසානඤ්චායතනං විඤ්ඤාණඤ්චායතනස්ස… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස ආරම්මණපච්චයෙන පච්චයො. මහග්ගතා ඛන්ධා ඉද්ධිවිධඤාණස්ස, චෙතොපරියඤාණස්ස පුබ්බෙනිවාසානුස්සතිඤාණස්ස යථාකම්මූපගඤාණස්ස අනාගතංසඤාණස්ස ආරම්මණපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස ආරම්මණපච්චයෙන පච්චයො – පඨමං ඣානං පච්චවෙක්ඛති…පෙ… නෙවසඤ්ඤානාසඤ්ඤායතනං පච්චවෙක්ඛති, දිබ්බං චක්ඛුං පච්චවෙක්ඛති, දිබ්බං සොතධාතුං පච්චවෙක්ඛති, ඉද්ධිවිධඤාණං පච්චවෙක්ඛති, චෙතොපරියඤාණං පච්චවෙක්ඛති, පුබ්බෙනිවාසානුස්සතිඤාණං පච්චවෙක්ඛති, යථාකම්මූපගඤාණං පච්චවෙක්ඛති, අනාගතංසඤාණං පච්චවෙක්ඛති. මහග්ගතෙ ඛන්ධෙ අනිච්චතො…පෙ… විප්පස්සති අස්සාදෙති අභිනන්දති, තං ආරබ්භ රාගො උප්පජ්ජති…පෙ… දොමනස්සං උප්පජ්ජති. (2)

58. අප්පමාණො ධම්මො අප්පමාණස්ස ධම්මස්ස ආරම්මණපච්චයෙන පච්චයො – නිබ්බානං මග්ගස්ස, ඵලස්ස ආරම්මණපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස ආරම්මණපච්චයෙන පච්චයො – අරියා මග්ගා වුට්ඨහිත්වා මග්ගං පච්චවෙක්ඛන්ති, ඵලං පච්චවෙක්ඛන්ති, නිබ්බානං පච්චවෙක්ඛන්ති, නිබ්බානං ගොත්‍රභුස්ස, වොදානස්ස, ආවජ්ජනාය ආරම්මණපච්චයෙන පච්චයො. (2)

අප්පමාණො ධම්මො මහග්ගතස්ස ධම්මස්ස ආරම්මණපච්චයෙන පච්චයො – අරියා චෙතොපරියඤාණෙන අප්පමාණචිත්තසමඞ්ගිස්ස චිත්තං ජානන්ති, අප්පමාණා ඛන්ධා චෙතොපරියඤාණස්ස, පුබ්බෙනිවාසානුස්සතිඤාණස්ස, අනාගතංසඤාණස්ස ආරම්මණපච්චයෙන පච්චයො. (3)

අධිපතිපච්චයො

59. පරිත්තො ධම්මො පරිත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – දානං දත්වා සීලං සමාදියිත්වා උපොසථකම්මං කත්වා තං ගරුං කත්වා පච්චවෙක්ඛති, පුබ්බෙ සුචිණ්ණානි ගරුං කත්වා පච්චවෙක්ඛති. සෙක්ඛා ගොත්‍රභුං ගරුං කත්වා පච්චවෙක්ඛන්ති, වොදානං ගරුං කත්වා පච්චවෙක්ඛන්ති. චක්ඛුං…පෙ… වත්ථුං… පරිත්තෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති, දිට්ඨි උප්පජ්ජති. සහජාතාධිපති – පරිත්තාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (1)

මහග්ගතො ධම්මො මහග්ගතස්ස ධම්මස්ස අධිපතිපච්චයෙන පච්චයො. සහජාතාධිපති – මහග්ගතාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – පඨමං ඣානං ගරුං කත්වා…පෙ… නෙවසඤ්ඤානාසඤ්ඤායතනං…පෙ… දිබ්බං චක්ඛුං…පෙ… අනාගතංසඤාණං ගරුං කත්වා පච්චවෙක්ඛති. මහග්ගතෙ ඛන්ධෙ ගරුං කත්වා අස්සාදෙති අභිනන්දති, තං ගරුං කත්වා රාගො උප්පජ්ජති… දිට්ඨි උප්පජ්ජති. සහජාතාධිපති – මහග්ගතාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස අධිපතිපච්චයෙන පච්චයො. සහජාතාධිපති – මහග්ගතාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

60. අප්පමාණො ධම්මො අප්පමාණස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – නිබ්බානං මග්ගස්ස… ඵලස්ස අධිපතිපච්චයෙන පච්චයො. සහජාතාධිපති – අප්පමාණාධිපති සම්පයුත්තකානං ඛන්ධානං අධිපතිපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස අධිපතිපච්චයෙන පච්චයො – ආරම්මණාධිපති, සහජාතාධිපති. ආරම්මණාධිපති – අරියා මග්ගා වුට්ඨහිත්වා මග්ගං ගරුං කත්වා පච්චවෙක්ඛන්ති, ඵලං ගරුං කත්වා පච්චවෙක්ඛන්ති, නිබ්බානං ගරුං කත්වා පච්චවෙක්ඛන්ති, නිබ්බානං ගොත්‍රභුස්ස, වොදානස්ස අධිපතිපච්චයෙන පච්චයො. සහජාතාධිපති – අප්පමාණාධිපති චිත්තසමුට්ඨානානං රූපානං අධිපතිපච්චයෙන පච්චයො. (2)

අප්පමාණො ධම්මො පරිත්තස්ස ච අප්පමාණස්ස ච ධම්මස්ස අධිපතිපච්චයෙන පච්චයො. සහජාතාධිපති – අප්පමාණාධිපති සම්පයුත්තකානං ඛන්ධානං චිත්තසමුට්ඨානානඤ්ච රූපානං අධිපතිපච්චයෙන පච්චයො. (3)

අනන්තරපච්චයො

61. පරිත්තො ධම්මො පරිත්තස්ස ධම්මස්ස අනන්තරපච්චයෙන පච්චයො – පුරිමා පුරිමා පරිත්තා ඛන්ධා පච්ඡිමානං පච්ඡිමානං පරිත්තානං ඛන්ධානං අනන්තරපච්චයෙන පච්චයො. අනුලොමං ගොත්‍රභුස්ස… අනුලොමං වොදානස්ස… ආවජ්ජනා පරිත්තානං ඛන්ධානං අනන්තරපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස අනන්තරපච්චයෙන පච්චයො – පරිත්තං චුතිචිත්තං මහග්ගතස්ස උපපත්තිචිත්තස්ස අනන්තරපච්චයෙන පච්චයො. පරිත්තා ඛන්ධා මහග්ගතස්ස වුට්ඨානස්ස අනන්තරපච්චයෙන පච්චයො. පඨමස්ස ඣානස්ස පරිකම්මං…පෙ… නෙවසඤ්ඤානාසඤ්ඤායතනස්ස පරිකම්මං…පෙ… දිබ්බස්ස චක්ඛුස්ස පරිකම්මං…පෙ… අනාගතංසඤාණස්ස පරිකම්මං අනාගතංසඤාණස්ස අනන්තරපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස අනන්තරපච්චයෙන පච්චයො – ගොත්‍රභු මග්ගස්ස… වොදානං මග්ගස්ස… අනුලොමං ඵලසමාපත්තියා අනන්තරපච්චයෙන පච්චයො. (3)

62. මහග්ගතො ධම්මො මහග්ගතස්ස ධම්මස්ස අනන්තරපච්චයෙන පච්චයො – පුරිමා පුරිමා මහග්ගතා ඛන්ධා පච්ඡිමානං පච්ඡිමානං මහග්ගතානං ඛන්ධානං අනන්තරපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස අනන්තරපච්චයෙන පච්චයො – මහග්ගතං චුතිචිත්තං පරිත්තස්ස උපපත්තිචිත්තස්ස අනන්තරපච්චයෙන පච්චයො. මහග්ගතං භවඞ්ගං ආවජ්ජනාය අනන්තරපච්චයෙන පච්චයො. මහග්ගතා ඛන්ධා පරිත්තස්ස වුට්ඨානස්ස අනන්තරපච්චයෙන පච්චයො. (2)

මහග්ගතො ධම්මො අප්පමාණස්ස ධම්මස්ස අනන්තරපච්චයෙන පච්චයො – නෙවසඤ්ඤානාසඤ්ඤායතනං නිරොධා වුට්ඨහන්තස්ස ඵලසමාපත්තියා අනන්තරපච්චයෙන පච්චයො. (3)

63. අප්පමාණො ධම්මො අප්පමාණස්ස ධම්මස්ස අනන්තරපච්චයෙන පච්චයො – පුරිමා පුරිමා අප්පමාණා ඛන්ධා පච්ඡිමානං පච්ඡිමානං අප්පමාණානං ඛන්ධානං අනන්තරපච්චයෙන පච්චයො. මග්ගො ඵලස්ස… ඵලං ඵලස්ස අනන්තරපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස අනන්තරපච්චයෙන පච්චයො – ඵලං පරිත්තස්ස වුට්ඨානස්ස අනන්තරපච්චයෙන පච්චයො. (2)

අප්පමාණො ධම්මො මහග්ගතස්ස ධම්මස්ස අනන්තරපච්චයෙන පච්චයො – ඵලං මහග්ගතස්ස වුට්ඨානස්ස අනන්තරපච්චයෙන පච්චයො. (3)

(සමනන්තරපච්චයං අනන්තරපච්චයසදිසං.)

සහජාතපච්චයො

64. පරිත්තො ධම්මො පරිත්තස්ස ධම්මස්ස සහජාතපච්චයෙන පච්චයො – පරිත්තො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං සහජාතපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස, වත්ථු ඛන්ධානං සහජාතපච්චයෙන පච්චයො; එකං මහාභූතං…පෙ… අසඤ්ඤසත්තානං…පෙ…. (1)

පරිත්තො ධම්මො මහග්ගතස්ස ධම්මස්ස සහජාතපච්චයෙන පච්චයො – පටිසන්ධික්ඛණෙ වත්ථු මහග්ගතානං ඛන්ධානං සහජාතපච්චයෙන පච්චයො. (2)

65. මහග්ගතො ධම්මො මහග්ගතස්ස ධම්මස්ස සහජාතපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (1)

මහග්ගතො ධම්මො පරිත්තස්ස ධම්මස්ස සහජාතපච්චයෙන පච්චයො – මහග්ගතා ඛන්ධා චිත්තසමුට්ඨානානං රූපානං සහජාතපච්චයෙන පච්චයො. පටිසන්ධික්ඛණෙ මහග්ගතා ඛන්ධා කටත්තාරූපානං සහජාතපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස සහජාතපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං සහජාතපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (3)

66. අප්පමාණො ධම්මො අප්පමාණස්ස ධම්මස්ස සහජාතපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං සහජාතපච්චයෙන පච්චයො…පෙ…. (1)

අප්පමාණො ධම්මො පරිත්තස්ස ධම්මස්ස සහජාතපච්චයෙන පච්චයො – අප්පමාණා ඛන්ධා චිත්තසමුට්ඨානානං රූපානං සහජාතපච්චයෙන පච්චයො. (2)

අප්පමාණො ධම්මො පරිත්තස්ස ච අප්පමාණස්ස ච ධම්මස්ස සහජාතපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං සහජාතපච්චයෙන පච්චයො…පෙ…. (3)

67. පරිත්තො ච අප්පමාණො ච ධම්මා පරිත්තස්ස ධම්මස්ස සහජාතපච්චයෙන පච්චයො – අප්පමාණා ඛන්ධා ච මහාභූතා ච චිත්තසමුට්ඨානානං රූපානං සහජාතපච්චයෙන පච්චයො. (1)

පරිත්තො ච මහග්ගතො ච ධම්මා පරිත්තස්ස ධම්මස්ස සහජාතපච්චයෙන පච්චයො – මහග්ගතා ඛන්ධා ච මහාභූතා ච චිත්තසමුට්ඨානානං රූපානං සහජාතපච්චයෙන පච්චයො. පටිසන්ධික්ඛණෙ මහග්ගතා ඛන්ධා ච මහාභූතා ච කටත්තාරූපානං සහජාතපච්චයෙන පච්චයො. (1)

පරිත්තො ච මහග්ගතො ච ධම්මා මහග්ගතස්ස ධම්මස්ස සහජාතපච්චයෙන පච්චයො – පටිසන්ධික්ඛණෙ මහග්ගතො එකො ඛන්ධො ච වත්ථු ච තිණ්ණන්නං ඛන්ධානං සහජාතපච්චයෙන පච්චයො…පෙ…. (2)

අඤ්ඤමඤ්ඤපච්චයො

68. පරිත්තො ධම්මො පරිත්තස්ස ධම්මස්ස අඤ්ඤමඤ්ඤපච්චයෙන පච්චයො – පරිත්තො එකො ඛන්ධො තිණ්ණන්නං ඛන්ධානං අඤ්ඤමඤ්ඤපච්චයෙන පච්චයො…පෙ… පටිසන්ධික්ඛණෙ…පෙ… ඛන්ධා වත්ථුස්ස…පෙ… වත්ථු ඛන්ධානං අඤ්ඤමඤ්ඤපච්චයෙන පච්චයො; එකං මහාභූතං…පෙ… අසඤ්ඤසත්තානං…පෙ…. (1)

පරිත්තො ධම්මො මහග්ගතස්ස ධම්මස්ස අඤ්ඤමඤ්ඤපච්චයෙන පච්චයො…පෙ… පටිසන්ධික්ඛණෙ වත්ථු මහග්ගතානං ඛන්ධානං අඤ්ඤමඤ්ඤපච්චයෙන පච්චයො…පෙ…. (2)

මහග්ගතො ධම්මො මහග්ගතස්ස ධම්මස්ස අඤ්ඤමඤ්ඤපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං අඤ්ඤමඤ්ඤපච්චයෙන පච්චයො…පෙ… පටිසන්ධික්ඛණෙ…පෙ…. (1)

මහග්ගතො ධම්මො පරිත්තස්ස ධම්මස්ස අඤ්ඤමඤ්ඤපච්චයෙන පච්චයො – පටිසන්ධික්ඛණෙ මහග්ගතා ඛන්ධා වත්ථුස්ස අඤ්ඤමඤ්ඤපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස අඤ්ඤමඤ්ඤපච්චයෙන පච්චයො – පටිසන්ධික්ඛණෙ මහග්ගතො එකො ඛන්ධො තිණ්ණන්නං ඛන්ධානං වත්ථුස්ස ච අඤ්ඤමඤ්ඤපච්චයෙන පච්චයො…පෙ…. (3)

අප්පමාණො ධම්මො අප්පමාණස්ස ධම්මස්ස අඤ්ඤමඤ්ඤපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං අඤ්ඤමඤ්ඤපච්චයෙන පච්චයො…පෙ… ද්වෙ ඛන්ධා…පෙ…. (1)

පරිත්තො ච මහග්ගතො ච ධම්මා මහග්ගතස්ස ධම්මස්ස අඤ්ඤමඤ්ඤපච්චයෙන පච්චයො – පටිසන්ධික්ඛණෙ මහග්ගතො එකො ඛන්ධො ච වත්ථු ච තිණ්ණන්නං ඛන්ධානං අඤ්ඤමඤ්ඤපච්චයෙන පච්චයො…පෙ…. (1)

නිස්සයපච්චයො

69. පරිත්තො ධම්මො පරිත්තස්ස ධම්මස්ස නිස්සයපච්චයෙන පච්චයො – පරිත්තො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං නිස්සයපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස…පෙ… වත්ථු ඛන්ධානං නිස්සයපච්චයෙන පච්චයො…පෙ… එකං මහාභූතං…පෙ… අසඤ්ඤසත්තානං එකං මහාභූතං…පෙ… චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස… වත්ථු පරිත්තානං ඛන්ධානං නිස්සයපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස නිස්සයපච්චයෙන පච්චයො – වත්ථු මහග්ගතානං ඛන්ධානං නිස්සයපච්චයෙන පච්චයො. පටිසන්ධික්ඛණෙ වත්ථු මහග්ගතානං ඛන්ධානං නිස්සයපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස නිස්සයපච්චයෙන පච්චයො – වත්ථු අප්පමාණානං ඛන්ධානං නිස්සයපච්චයෙන පච්චයො. (3)

70. මහග්ගතො ධම්මො මහග්ගතස්ස ධම්මස්ස නිස්සයපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (1)

මහග්ගතො ධම්මො පරිත්තස්ස ධම්මස්ස නිස්සයපච්චයෙන පච්චයො – මහග්ගතා ඛන්ධා චිත්තසමුට්ඨානානං රූපානං නිස්සයපච්චයෙන පච්චයො. පටිසන්ධික්ඛණෙ මහග්ගතා ඛන්ධා කටත්තාරූපානං නිස්සයපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස නිස්සයපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං නිස්සයපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (3)

71. අප්පමාණො ධම්මො අප්පමාණස්ස ධම්මස්ස නිස්සයපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං නිස්සයපච්චයෙන පච්චයො…පෙ…. (1)

අප්පමාණො ධම්මො පරිත්තස්ස ධම්මස්ස නිස්සයපච්චයෙන පච්චයො – අප්පමාණා ඛන්ධා චිත්තසමුට්ඨානානං රූපානං නිස්සයපච්චයෙන පච්චයො. (2)

අප්පමාණො ධම්මො පරිත්තස්ස ච අප්පමාණස්ස ච ධම්මස්ස නිස්සයපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං නිස්සයපච්චයෙන පච්චයො…පෙ…. (3)

පරිත්තො ච අප්පමාණො ච ධම්මා පරිත්තස්ස ධම්මස්ස නිස්සයපච්චයෙන පච්චයො – අප්පමාණා ඛන්ධා ච මහාභූතා ච චිත්තසමුට්ඨානානං රූපානං නිස්සයපච්චයෙන පච්චයො. (1)

පරිත්තො ච අප්පමාණො ච ධම්මා අප්පමාණස්ස ධම්මස්ස නිස්සයපච්චයෙන පච්චයො – අප්පමාණො එකො ඛන්ධො ච වත්ථු ච තිණ්ණන්නං ඛන්ධානං නිස්සයපච්චයෙන පච්චයො…පෙ… ද්වෙ ඛන්ධා…පෙ…. (2)

පරිත්තො ච මහග්ගතො ච ධම්මා පරිත්තස්ස ධම්මස්ස නිස්සයපච්චයෙන පච්චයො – මහග්ගතා ඛන්ධා ච මහාභූතා ච චිත්තසමුට්ඨානානං රූපානං නිස්සයපච්චයෙන පච්චයො. පටිසන්ධික්ඛණෙ මහග්ගතා ඛන්ධා ච මහාභූතා ච කටත්තාරූපානං නිස්සයපච්චයෙන පච්චයො. (1)

පරිත්තො ච මහග්ගතො ච ධම්මා මහග්ගතස්ස ධම්මස්ස නිස්සයපච්චයෙන පච්චයො – මහග්ගතො එකො ඛන්ධො ච වත්ථු ච තිණ්ණන්නං ඛන්ධානං නිස්සයපච්චයෙන පච්චයො…පෙ… පටිසන්ධික්ඛණෙ මහග්ගතො එකො ඛන්ධො ච වත්ථු ච තිණ්ණන්නං ඛන්ධානං නිස්සයපච්චයෙන පච්චයො…පෙ… ද්වෙ ඛන්ධා…පෙ…. (2)

උපනිස්සයපච්චයො

72. පරිත්තො ධම්මො පරිත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරිත්තං සද්ධං උපනිස්සාය දානං දෙති, සීලං සමාදියති, උපොසථකම්මං කරොති, විපස්සනං උප්පාදෙති, මානං ජප්පෙති, දිට්ඨිං ගණ්හාති, පරිත්තං සීලං…පෙ… පඤ්ඤං… රාගං…පෙ… පත්ථනං… කායිකං සුඛං…පෙ… සෙනාසනං උපනිස්සාය දානං දෙති, සීලං…පෙ… උපොසථං…පෙ… විපස්සනං උප්පාදෙති, පාණං හනති…පෙ… සඞ්ඝං භින්දති. පරිත්තා සද්ධා…පෙ… පඤ්ඤා, රාගො…පෙ… පත්ථනා, කායිකං සුඛං…පෙ… සෙනාසනං පරිත්තාය සද්ධාය…පෙ… පඤ්ඤාය, රාගස්ස…පෙ… පත්ථනාය, කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. කුසලාකුසලං කම්මං විපාකස්ස උපනිස්සයපච්චයෙන පච්චයො. පාණාතිපාතො පාණාතිපාතස්ස උපනිස්සයපච්චයෙන පච්චයො (චක්කං කාතබ්බං). මාතුඝාතිකම්මං මාතුඝාතිකම්මස්ස උපනිස්සයපච්චයෙන පච්චයො (චක්කං කාතබ්බං කුසලත්තිකසදිසං). (1)

පරිත්තො ධම්මො මහග්ගතස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – පරිත්තං සද්ධං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති. පරිත්තං සීලං…පෙ… පඤ්ඤං… රාගං…පෙ… සෙනාසනං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති. පරිත්තා සද්ධා…පෙ… සෙනාසනං මහග්ගතාය සද්ධාය…පෙ… පඤ්ඤාය උපනිස්සයපච්චයෙන පච්චයො. පඨමස්ස ඣානස්ස පරිකම්මං…පෙ… නෙවසඤ්ඤානාසඤ්ඤායතනස්ස පරිකම්මං නෙවසඤ්ඤානාසඤ්ඤායතනස්ස උපනිස්සයපච්චයෙන පච්චයො. දිබ්බස්ස චක්ඛුස්ස පරිකම්මං…පෙ… අනාගතංසඤාණස්ස පරිකම්මං…පෙ…. (2)

පරිත්තො ධම්මො අප්පමාණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො පරිත්තං සද්ධං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. පරිත්තං සීලං…පෙ… පඤ්ඤං… රාගං…පෙ… පත්ථනං… කායිකං සුඛං…පෙ… සෙනාසනං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. පරිත්තා සද්ධා…පෙ… සෙනාසනං අප්පමාණාය සද්ධාය…පෙ… පඤ්ඤාය, මග්ගස්ස ඵලසමාපත්තියා උපනිස්සයපච්චයෙන පච්චයො. පඨමස්ස මග්ගස්ස පරිකම්මං පඨමස්ස මග්ගස්ස…පෙ… චතුත්ථස්ස මග්ගස්ස පරිකම්මං චතුත්ථස්ස මග්ගස්ස උපනිස්සයපච්චයෙන පච්චයො. (3)

73. මහග්ගතො ධම්මො මහග්ගතස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතං සද්ධං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති. මහග්ගතං සීලං…පෙ… පඤ්ඤං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති. මහග්ගතා සද්ධා…පෙ… පඤ්ඤා මහග්ගතාය සද්ධාය…පෙ… පඤ්ඤාය උපනිස්සයපච්චයෙන පච්චයො. පඨමං ඣානං දුතියස්ස ඣානස්ස…පෙ… ආකිඤ්චඤ්ඤායතනං නෙවසඤ්ඤානාසඤ්ඤායතනස්ස උපනිස්සයපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතං සද්ධං උපනිස්සාය දානං දෙති, සීලං සමාදියති, උපොසථකම්මං කරොති, විපස්සනං උප්පාදෙති, මානං ජප්පෙති, දිට්ඨිං ගණ්හාති, මහග්ගතං සීලං…පෙ… පඤ්ඤං උපනිස්සාය දානං දෙති…පෙ… විපස්සනං උප්පාදෙති…පෙ… මහග්ගතා සද්ධා…පෙ… පඤ්ඤා පරිත්තාය සද්ධාය…පෙ… පඤ්ඤාය…පෙ… කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. (2)

මහග්ගතො ධම්මො අප්පමාණස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – මහග්ගතං සද්ධං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. මහග්ගතං සීලං…පෙ… පඤ්ඤං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. මහග්ගතා සද්ධා…පෙ… පඤ්ඤා අප්පමාණාය සද්ධාය…පෙ… පඤ්ඤාය මග්ගස්ස ඵලසමාපත්තියා උපනිස්සයපච්චයෙන පච්චයො. (3)

74. අප්පමාණො ධම්මො අප්පමාණස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණං සද්ධං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. අප්පමාණං සීලං…පෙ… පඤ්ඤං උපනිස්සාය අප්පමාණං ඣානං උප්පාදෙති, මග්ගං උප්පාදෙති, ඵලසමාපත්තිං උප්පාදෙති. අප්පමාණා සද්ධා…පෙ… පඤ්ඤා අප්පමාණාය සද්ධාය…පෙ… පඤ්ඤාය උපනිස්සයපච්චයෙන පච්චයො. පඨමො මග්ගො දුතියස්ස මග්ගස්ස…පෙ… තතියො මග්ගො චතුත්ථස්ස මග්ගස්ස… මග්ගො ඵලසමාපත්තියා උපනිස්සයපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස උපනිස්සයපච්චයෙන පච්චයො – ආරම්මණූපනිස්සයො, අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණං සද්ධං උපනිස්සාය දානං දෙති, සීලං…පෙ… උපොසථකම්මං… විපස්සනං උප්පාදෙති. අප්පමාණං සීලං…පෙ… පඤ්ඤං උපනිස්සාය දානං දෙති, සීලං…පෙ… උපොසථකම්මං… විපස්සනං… අප්පමාණා සද්ධා…පෙ… පඤ්ඤා පරිත්තාය සද්ධාය…පෙ… පඤ්ඤාය…පෙ… කායිකස්ස සුඛස්ස, කායිකස්ස දුක්ඛස්ස උපනිස්සයපච්චයෙන පච්චයො. ඵලසමාපත්ති කායිකස්ස සුඛස්ස උපනිස්සයපච්චයෙන පච්චයො. අරියා මග්ගං උපනිස්සාය සඞ්ඛාරෙ අනිච්චතො…පෙ… විපස්සන්ති, මග්ගො අරියානං අත්ථප්පටිසම්භිදාය…පෙ… පටිභානප්පටිසම්භිදාය… ඨානාඨානකොසල්ලස්ස උපනිස්සයපච්චයෙන පච්චයො. (2)

අප්පමාණො ධම්මො මහග්ගතස්ස ධම්මස්ස උපනිස්සයපච්චයෙන පච්චයො – අනන්තරූපනිස්සයො, පකතූපනිස්සයො…පෙ…. පකතූපනිස්සයො – අප්පමාණං සද්ධං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති, අප්පමාණං සීලං…පෙ… පඤ්ඤං උපනිස්සාය මහග්ගතං ඣානං උප්පාදෙති, අභිඤ්ඤං උප්පාදෙති, සමාපත්තිං උප්පාදෙති. අප්පමාණා සද්ධා…පෙ… පඤ්ඤා මහග්ගතාය සද්ධාය…පෙ… පඤ්ඤාය උපනිස්සයපච්චයෙන පච්චයො, අරියා මග්ගං උපනිස්සාය අනුප්පන්නං සමාපත්තිං උප්පාදෙන්ති, උප්පන්නං සමාපජ්ජන්ති. (3)

පුරෙජාතපච්චයො

75. පරිත්තො ධම්මො පරිත්තස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – චක්ඛුං අනිච්චතො…පෙ… විපස්සති අස්සාදෙති අභිනන්දති; තං ආරබ්භ රාගො උප්පජ්ජති…පෙ… දොමනස්සං උප්පජ්ජති. සොතං…පෙ… වත්ථුං අනිච්චතො…පෙ… දොමනස්සං උප්පජ්ජති. රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස පුරෙජාතපච්චයෙන පච්චයො. වත්ථුපුරෙජාතං – චක්ඛායතනං චක්ඛුවිඤ්ඤාණස්ස…පෙ… කායායතනං කායවිඤ්ඤාණස්ස… වත්ථු පරිත්තානං ඛන්ධානං පුරෙජාතපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස පුරෙජාතපච්චයෙන පච්චයො – ආරම්මණපුරෙජාතං, වත්ථුපුරෙජාතං. ආරම්මණපුරෙජාතං – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති. වත්ථුපුරෙජාතං – වත්ථු මහග්ගතානං ඛන්ධානං පුරෙජාතපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස පුරෙජාතපච්චයෙන පච්චයො. වත්ථුපුරෙජාතං – වත්ථු අප්පමාණානං ඛන්ධානං පුරෙජාතපච්චයෙන පච්චයො. (3)

පච්ඡාජාතපච්චයො

76. පරිත්තො ධම්මො පරිත්තස්ස ධම්මස්ස පච්ඡාජාතපච්චයෙන පච්චයො – පච්ඡාජාතා පරිත්තා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස පච්ඡාජාතපච්චයෙන පච්චයො – පච්ඡාජාතා මහග්ගතා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස පච්ඡාජාතපච්චයෙන පච්චයො – පච්ඡාජාතා අප්පමාණා ඛන්ධා පුරෙජාතස්ස ඉමස්ස කායස්ස පච්ඡාජාතපච්චයෙන පච්චයො. (1)

ආසෙවනපච්චයො

77. පරිත්තො ධම්මො පරිත්තස්ස ධම්මස්ස ආසෙවනපච්චයෙන පච්චයො – පුරිමා පුරිමා පරිත්තා ඛන්ධා පච්ඡිමානං පච්ඡිමානං පරිත්තානං ඛන්ධානං…පෙ… අනුලොමං ගොත්‍රභුස්ස, අනුලොමං වොදානස්ස ආසෙවනපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස ආසෙවනපච්චයෙන පච්චයො – පඨමස්ස ඣානස්ස පරිකම්මං තස්සෙව [පඨමස්ස ඣානස්ස (?)] ආසෙවනපච්චයෙන පච්චයො…පෙ… නෙවසඤ්ඤානාසඤ්ඤායතනස්ස පරිකම්මං තස්සෙව [නෙවසඤ්ඤානාසඤ්ඤායතනස්ස (?) අඤ්ඤෙසු තිකෙසු ඔලොකෙතබ්බං] ආසෙවනපච්චයෙන පච්චයො. දිබ්බස්ස චක්ඛුස්ස පරිකම්මං…පෙ… අනාගතංසඤාණස්ස පරිකම්මං අනාගතංසඤාණස්ස ආසෙවනපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස ආසෙවනපච්චයෙන පච්චයො – ගොත්‍රභු මග්ගස්ස… වොදානං මග්ගස්ස ආසෙවනපච්චයෙන පච්චයො. (3)

මහග්ගතො ධම්මො මහග්ගතස්ස ධම්මස්ස ආසෙවනපච්චයෙන පච්චයො – පුරිමා පුරිමා මහග්ගතා ඛන්ධා පච්ඡිමානං පච්ඡිමානං මහග්ගතානං ඛන්ධානං…පෙ… ආසෙවනපච්චයෙන පච්චයො. (1)

කම්මපච්චයො

78. පරිත්තො ධම්මො පරිත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – පරිත්තා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. පටිසන්ධික්ඛණෙ පරිත්තා චෙතනා සම්පයුත්තකානං ඛන්ධානං කටත්තා ච රූපානං කම්මපච්චයෙන පච්චයො. නානාක්ඛණිකා – පරිත්තා චෙතනා විපාකානං පරිත්තානං ඛන්ධානං කටත්තා ච රූපානං කම්මපච්චයෙන පච්චයො. (1)

මහග්ගතො ධම්මො මහග්ගතස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – මහග්ගතා චෙතනා සම්පයුත්තකානං ඛන්ධානං කම්මපච්චයෙන පච්චයො. පටිසන්ධික්ඛණෙ මහග්ගතා චෙතනා සම්පයුත්තකානං ඛන්ධානං කම්මපච්චයෙන පච්චයො. නානාක්ඛණිකා – මහග්ගතා චෙතනා විපාකානං මහග්ගතානං ඛන්ධානං කම්මපච්චයෙන පච්චයො. (1)

මහග්ගතො ධම්මො පරිත්තස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – මහග්ගතා චෙතනා චිත්තසමුට්ඨානානං රූපානං කම්මපච්චයෙන පච්චයො. පටිසන්ධික්ඛණෙ මහග්ගතා චෙතනා කටත්තාරූපානං කම්මපච්චයෙන පච්චයො. නානාක්ඛණිකා – මහග්ගතා චෙතනා කටත්තාරූපානං කම්මපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – මහග්ගතා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. පටිසන්ධික්ඛණෙ මහග්ගතා චෙතනා සම්පයුත්තකානං ඛන්ධානං කටත්තා ච රූපානං කම්මපච්චයෙන පච්චයො. නානාක්ඛණිකා – මහග්ගතා චෙතනා විපාකානං මහග්ගතානං ඛන්ධානං කටත්තා ච රූපානං කම්මපච්චයෙන පච්චයො. (3)

79. අප්පමාණො ධම්මො අප්පමාණස්ස ධම්මස්ස කම්මපච්චයෙන පච්චයො – සහජාතා, නානාක්ඛණිකා. සහජාතා – අප්පමාණා චෙතනා සම්පයුත්තකානං ඛන්ධානං කම්මපච්චයෙන පච්චයො. නානාක්ඛණිකා – අප්පමාණා චෙතනා විපාකානං අප්පමාණානං ඛන්ධානං කම්මපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස කම්මපච්චයෙන පච්චයො – අප්පමාණා චෙතනා චිත්තසමුට්ඨානානං රූපානං කම්මපච්චයෙන පච්චයො. (2)

අප්පමාණො ධම්මො පරිත්තස්ස ච අප්පමාණස්ස ච ධම්මස්ස කම්මපච්චයෙන පච්චයො – අප්පමාණා චෙතනා සම්පයුත්තකානං ඛන්ධානං චිත්තසමුට්ඨානානඤ්ච රූපානං කම්මපච්චයෙන පච්චයො. (3)

විපාකපච්චයො

80. පරිත්තො ධම්මො පරිත්තස්ස ධම්මස්ස විපාකපච්චයෙන පච්චයො – විපාකො පරිත්තො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං විපාකපච්චයෙන පච්චයො…පෙ… පටිසන්ධික්ඛණෙ…පෙ… ඛන්ධා වත්ථුස්ස විපාකපච්චයෙන පච්චයො. (1)

මහග්ගතො ධම්මො මහග්ගතස්ස ධම්මස්ස විපාකපච්චයෙන පච්චයො…පෙ… (තිස්සො පඤ්හා, පවත්තිපටිසන්ධි කාතබ්බා). (3)

අප්පමාණො ධම්මො අප්පමාණස්ස ධම්මස්ස විපාකපච්චයෙන පච්චයො… තීණි (පවත්තිමෙව).

ආහාරපච්චයාදි

81. පරිත්තො ධම්මො පරිත්තස්ස ධම්මස්ස ආහාරපච්චයෙන පච්චයො…පෙ… ඉන්ද්‍රියපච්චයෙන පච්චයො… ඣානපච්චයෙන පච්චයො… මග්ගපච්චයෙන පච්චයො… සම්පයුත්තපච්චයෙන පච්චයො… විප්පයුත්තපච්චයෙන පච්චයො – සහජාතං, පුරෙජාතං, පච්ඡාජාතං. සහජාතා – පරිත්තා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පටිසන්ධික්ඛණෙ පරිත්තා ඛන්ධා කටත්තාරූපානං විප්පයුත්තපච්චයෙන පච්චයො. ඛන්ධා වත්ථුස්ස…පෙ… වත්ථු ඛන්ධානං විප්පයුත්තපච්චයෙන පච්චයො. පුරෙජාතං – චක්ඛායතනං චක්ඛුවිඤ්ඤාණස්ස විප්පයුත්තපච්චයෙන පච්චයො…පෙ… කායායතනං කායවිඤ්ඤාණස්ස විප්පයුත්තපච්චයෙන පච්චයො. වත්ථු පරිත්තානං ඛන්ධානං විප්පයුත්තපච්චයෙන පච්චයො. පච්ඡාජාතා – පරිත්තා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස විප්පයුත්තපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු මහග්ගතානං ඛන්ධානං විප්පයුත්තපච්චයෙන පච්චයො. පුරෙජාතං – වත්ථු මහග්ගතානං ඛන්ධානං විප්පයුත්තපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස විප්පයුත්තපච්චයෙන පච්චයො. පුරෙජාතං – වත්ථු අප්පමාණානං ඛන්ධානං විප්පයුත්තපච්චයෙන පච්චයො. (3)

82. මහග්ගතො ධම්මො පරිත්තස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – මහග්ගතා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පටිසන්ධික්ඛණෙ…පෙ… පච්ඡාජාතා – මහග්ගතා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අප්පමාණො ධම්මො පරිත්තස්ස ධම්මස්ස විප්පයුත්තපච්චයෙන පච්චයො – සහජාතං, පච්ඡාජාතං. සහජාතා – අප්පමාණා ඛන්ධා චිත්තසමුට්ඨානානං රූපානං විප්පයුත්තපච්චයෙන පච්චයො. පච්ඡාජාතා – අප්පමාණා ඛන්ධා පුරෙජාතස්ස ඉමස්ස කායස්ස විප්පයුත්තපච්චයෙන පච්චයො. (1)

අත්ථිපච්චයො

83. පරිත්තො ධම්මො පරිත්තස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං, පච්ඡාජාතං, ආහාරං, ඉන්ද්‍රියං. සහජාතො – පරිත්තො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ… ඛන්ධා වත්ථුස්ස අත්ථිපච්චයෙන පච්චයො. වත්ථු ඛන්ධානං අත්ථිපච්චයෙන පච්චයො; එකං මහාභූතං…පෙ… අසඤ්ඤසත්තානං…පෙ…. පුරෙජාතං – චක්ඛුං…පෙ… වත්ථුං අනිච්චතො…පෙ… විපස්සති අස්සාදෙති අභිනන්දති, තං ආරබ්භ රාගො උප්පජ්ජති…පෙ… දොමනස්සං උප්පජ්ජති, රූපායතනං චක්ඛුවිඤ්ඤාණස්ස…පෙ… ඵොට්ඨබ්බායතනං කායවිඤ්ඤාණස්ස අත්ථිපච්චයෙන පච්චයො. චක්ඛායතනං චක්ඛුවිඤ්ඤාණස්ස අත්ථිපච්චයෙන පච්චයො…පෙ… කායායතනං කායවිඤ්ඤාණස්ස…පෙ… වත්ථු පරිත්තානං ඛන්ධානං අත්ථිපච්චයෙන පච්චයො. පච්ඡාජාතා – පරිත්තා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. කබළීකාරො ආහාරො ඉමස්ස කායස්ස අත්ථිපච්චයෙන පච්චයො. රූපජීවිතින්ද්‍රියං කටත්තාරූපානං අත්ථිපච්චයෙන පච්චයො. (1)

පරිත්තො ධම්මො මහග්ගතස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතං – පටිසන්ධික්ඛණෙ වත්ථු මහග්ගතානං ඛන්ධානං අත්ථිපච්චයෙන පච්චයො. පුරෙජාතං – දිබ්බෙන චක්ඛුනා රූපං පස්සති, දිබ්බාය සොතධාතුයා සද්දං සුණාති, වත්ථු මහග්ගතානං ඛන්ධානං අත්ථිපච්චයෙන පච්චයො. (2)

පරිත්තො ධම්මො අප්පමාණස්ස ධම්මස්ස අත්ථිපච්චයෙන පච්චයො. පුරෙජාතං – වත්ථු අප්පමාණානං ඛන්ධානං අත්ථිපච්චයෙන පච්චයො. (3)

84. මහග්ගතො ධම්මො මහග්ගතස්ස ධම්මස්ස අත්ථිපච්චයෙන පච්චයො. මහග්ගතො එකො ඛන්ධො තිණ්ණන්නං ඛන්ධානං…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (1)

මහග්ගතො ධම්මො පරිත්තස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – මහග්ගතා ඛන්ධා චිත්තසමුට්ඨානානං රූපානං අත්ථිපච්චයෙන පච්චයො. පටිසන්ධික්ඛණෙ මහග්ගතා ඛන්ධා කටත්තාරූපානං අත්ථිපච්චයෙන පච්චයො. පච්ඡාජාතා – මහග්ගතා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

මහග්ගතො ධම්මො පරිත්තස්ස ච මහග්ගතස්ස ච ධම්මස්ස අත්ථිපච්චයෙන පච්චයො – මහග්ගතො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ…පෙ…. (3)

85. අප්පමාණො ධම්මො අප්පමාණස්ස ධම්මස්ස අත්ථිපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං…පෙ…. (1)

අප්පමාණො ධම්මො පරිත්තස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං. සහජාතා – අප්පමාණා ඛන්ධා චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – අප්පමාණා ඛන්ධා පුරෙජාතස්ස ඉමස්ස කායස්ස අත්ථිපච්චයෙන පච්චයො. (2)

අප්පමාණො ධම්මො පරිත්තස්ස ච අප්පමාණස්ස ච ධම්මස්ස අත්ථිපච්චයෙන පච්චයො – අප්පමාණො එකො ඛන්ධො තිණ්ණන්නං ඛන්ධානං චිත්තසමුට්ඨානානඤ්ච රූපානං අත්ථිපච්චයෙන පච්චයො…පෙ…. (3)

86. පරිත්තො ච අප්පමාණො ච ධම්මා පරිත්තස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – අප්පමාණා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පච්ඡාජාතා – අප්පමාණා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – අප්පමාණා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (1)

පරිත්තො ච අප්පමාණො ච ධම්මා අප්පමාණස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – අප්පමාණො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා…පෙ…. (2)

පරිත්තො ච මහග්ගතො ච ධම්මා පරිත්තස්ස ධම්මස්ස අත්ථිපච්චයෙන පච්චයො – සහජාතං, පච්ඡාජාතං, ආහාරං, ඉන්ද්‍රියං. සහජාතා – මහග්ගතා ඛන්ධා ච මහාභූතා ච චිත්තසමුට්ඨානානං රූපානං අත්ථිපච්චයෙන පච්චයො. පටිසන්ධික්ඛණෙ මහග්ගතා ඛන්ධා ච මහාභූතා ච කටත්තාරූපානං අත්ථිපච්චයෙන පච්චයො. පච්ඡාජාතා – මහග්ගතා ඛන්ධා ච කබළීකාරො ආහාරො ච ඉමස්ස කායස්ස අත්ථිපච්චයෙන පච්චයො. පච්ඡාජාතා – මහග්ගතා ඛන්ධා ච රූපජීවිතින්ද්‍රියඤ්ච කටත්තාරූපානං අත්ථිපච්චයෙන පච්චයො. (1)

පරිත්තො ච මහග්ගතො ච ධම්මා මහග්ගතස්ස ධම්මස්ස අත්ථිපච්චයෙන පච්චයො – සහජාතං, පුරෙජාතං. සහජාතො – මහග්ගතො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා…පෙ… පටිසන්ධික්ඛණෙ මහග්ගතො එකො ඛන්ධො ච වත්ථු ච තිණ්ණන්නං ඛන්ධානං අත්ථිපච්චයෙන පච්චයො…පෙ… ද්වෙ ඛන්ධා ච වත්ථු ච…පෙ… නත්ථිපච්චයෙන පච්චයො… විගතපච්චයෙන පච්චයො… අවිගතපච්චයෙන පච්චයො. (2)