1. විභඞ්ගවාරො

හෙතුපච්චයො

42. පරිත්තං ධම්මං සංසට්ඨො පරිත්තො ධම්මො උප්පජ්ජති හෙතුපච්චයා – පරිත්තං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

මහග්ගතං ධම්මං සංසට්ඨො මහග්ගතො ධම්මො උප්පජ්ජති හෙතුපච්චයා – මහග්ගතං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

අප්පමාණං ධම්මං සංසට්ඨො අප්පමාණො ධම්මො උප්පජ්ජති හෙතුපච්චයා – අප්පමාණං එකං ඛන්ධං සංසට්ඨා තයො ඛන්ධා…පෙ… ද්වෙ ඛන්ධෙ…පෙ…. (1)

ආරම්මණපච්චයාදි

43. පරිත්තං ධම්මං සංසට්ඨො පරිත්තො ධම්මො උප්පජ්ජති ආරම්මණපච්චයා… අධිපතිපච්චයා (පටිසන්ධි නත්ථි)… අනන්තරපච්චයා… සමනන්තරපච්චයා… සහජාතපච්චයා… අඤ්ඤමඤ්ඤපච්චයා… නිස්සයපච්චයා… උපනිස්සයපච්චයා… පුරෙජාතපච්චයා (පටිසන්ධි නත්ථි)… ආසෙවනපච්චයා(විපාකොපි පටිසන්ධිපි නත්ථි)… කම්මපච්චයා… විපාකපච්චයා… ආහාරපච්චයා… ඉන්ද්‍රියපච්චයා… ඣානපච්චයා… මග්ගපච්චයා… සම්පයුත්තපච්චයා… විප්පයුත්තපච්චයා… අත්ථිපච්චයා… නත්ථිපච්චයා… විගතපච්චයා… අවිගතපච්චයා.