1. විභඞ්ගවාරො

නහෙතුපච්චයො

33. පරිත්තං ධම්මං පච්චයා පරිත්තො ධම්මො උප්පජ්ජති නහෙතුපච්චයා – අහෙතුකං පරිත්තං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… ඛන්ධෙ පච්චයා වත්ථු, වත්ථුං පච්චයා ඛන්ධා; එකං මහාභූතං…පෙ… අසඤ්ඤසත්තානං…පෙ… චක්ඛායතනං පච්චයා චක්ඛුවිඤ්ඤාණං…පෙ… කායායතනං පච්චයා කායවිඤ්ඤාණං, වත්ථුං පච්චයා අහෙතුකා පරිත්තා ඛන්ධා, විචිකිච්ඡාසහගතෙ උද්ධච්චසහගතෙ ඛන්ධෙ ච වත්ථුඤ්ච පච්චයා විචිකිච්ඡාසහගතො උද්ධච්චසහගතො මොහො. (1)

නආරම්මණපච්චයො

34. පරිත්තං ධම්මං පච්චයා පරිත්තො ධම්මො උප්පජ්ජති නආරම්මණපච්චයා (පටිච්චවාරසදිසං. පඤ්ච).

නඅධිපතිපච්චයො

35. පරිත්තං ධම්මං පච්චයා පරිත්තො ධම්මො උප්පජ්ජති නඅධිපතිපච්චයා – පරිත්තං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… 53අසඤ්ඤසත්තානං…පෙ… චක්ඛායතනං…පෙ… කායායතනං…පෙ… වත්ථුං පච්චයා පරිත්තා ඛන්ධා. (1)

පරිත්තං ධම්මං පච්චයා මහග්ගතො ධම්මො උප්පජ්ජති නඅධිපතිපච්චයා – වත්ථුං පච්චයා මහග්ගතාධිපති, වත්ථුං පච්චයා විපාකා මහග්ගතා ඛන්ධා. පටිසන්ධික්ඛණෙ වත්ථුං පච්චයා මහග්ගතා ඛන්ධා. (2)

පරිත්තං ධම්මං පච්චයා අප්පමාණො ධම්මො උප්පජ්ජති නඅධිපතිපච්චයා – වත්ථුං පච්චයා අප්පමාණාධිපති. (3)

පරිත්තං ධම්මං පච්චයා පරිත්තො ච මහග්ගතො ච ධම්මා උප්පජ්ජන්ති නඅධිපතිපච්චයා – වත්ථුං පච්චයා විපාකා මහග්ගතා ඛන්ධා, මහාභූතෙ පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (4)

36. මහග්ගතං ධම්මං පච්චයා මහග්ගතො ධම්මො උප්පජ්ජති නඅධිපතිපච්චයා – මහග්ගතෙ ඛන්ධෙ පච්චයා මහග්ගතාධිපති, විපාකං මහග්ගතං එකං ඛන්ධං පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (1)

මහග්ගතං ධම්මං පච්චයා පරිත්තො ධම්මො උප්පජ්ජති නඅධිපතිපච්චයා – විපාකෙ මහග්ගතෙ ඛන්ධෙ පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (2)

මහග්ගතං ධම්මං පච්චයා පරිත්තො ච මහග්ගතො ච ධම්මා උප්පජ්ජන්ති නඅධිපතිපච්චයා – විපාකං මහග්ගතං එකං ඛන්ධං පච්චයා තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (3)

අප්පමාණං ධම්මං පච්චයා අප්පමාණො ධම්මො උප්පජ්ජති නඅධිපතිපච්චයා – අප්පමාණෙ ඛන්ධෙ පච්චයා අප්පමාණාධිපති. (1)

37. පරිත්තඤ්ච අප්පමාණඤ්ච ධම්මං පච්චයා අප්පමාණො ධම්මො උප්පජ්ජති නඅධිපතිපච්චයා – අප්පමාණෙ ඛන්ධෙ ච වත්ථුඤ්ච පච්චයා අප්පමාණාධිපති. (1)

පරිත්තඤ්ච මහග්ගතඤ්ච ධම්මං පච්චයා පරිත්තො ධම්මො උප්පජ්ජති නඅධිපතිපච්චයා – විපාකෙ මහග්ගතෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. පටිසන්ධික්ඛණෙ…පෙ…. (1)

පරිත්තඤ්ච මහග්ගතඤ්ච ධම්මං පච්චයා මහග්ගතො ධම්මො උප්පජ්ජති නඅධිපතිපච්චයා – මහග්ගතෙ ඛන්ධෙ ච වත්ථුඤ්ච පච්චයා මහග්ගතාධිපති, විපාකං මහග්ගතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ…. (2)

පරිත්තඤ්ච මහග්ගතඤ්ච ධම්මං පච්චයා පරිත්තො ච මහග්ගතො ච ධම්මා උප්පජ්ජන්ති නඅධිපතිපච්චයා – විපාකං මහග්ගතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… විපාකෙ මහග්ගතෙ ඛන්ධෙ ච මහාභූතෙ ච පච්චයා චිත්තසමුට්ඨානං රූපං. පටිසන්ධික්ඛණෙ විපාකං මහග්ගතං එකං ඛන්ධඤ්ච වත්ථුඤ්ච පච්චයා තයො ඛන්ධා…පෙ… ද්වෙ ඛන්ධෙ…පෙ… විපාකෙ මහග්ගතෙ ඛන්ධෙ ච මහාභූතෙ ච පච්චයා කටත්තාරූපං. (3)

නඅනන්තරපච්චයාදි

38. පරිත්තං ධම්මං පච්චයා පරිත්තො ධම්මො උප්පජ්ජති නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා… නපුරෙජාතපච්චයා… (පටිච්චවාරසදිසා ද්වාදස පඤ්හා) නපච්ඡාජාතපච්චයා… නආසෙවනපච්චයා… (පරිපුණ්ණං, විපාකොති නිද්දිසිතබ්බං චිත්තසමුට්ඨානං රූපං විපාකොති න කාතබ්බං) නකම්මපච්චයා… නවිපාකපච්චයා… (පටිසන්ධිවිපාකොපි නත්ථි) නආහාරපච්චයා… නඉන්ද්‍රියපච්චයා… නඣානපච්චයා… නමග්ගපච්චයා… නසම්පයුත්තපච්චයා… නවිප්පයුත්තපච්චයා… නොනත්ථිපච්චයා… නොවිගතපච්චයා.