1. විභඞ්ගවාරො

නහෙතුපච්චයො

8. ආචයගාමිං ධම්මං පටිච්ච ආචයගාමී ධම්මො උප්පජ්ජති නහෙතුපච්චයා – විචිකිච්ඡාසහගතෙ උද්ධච්චසහගතෙ ඛන්ධෙ පටිච්ච විචිකිච්ඡාසහගතො උද්ධච්චසහගතො මොහො. (1)

නෙවාචයගාමිනාපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නහෙතුපච්චයා – අහෙතුකං නෙවාචයගාමිනාපචයගාමිං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… අහෙතුකපටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා; එකං මහාභූතං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං…පෙ…. (1)

නආරම්මණපච්චයො

9. ආචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආරම්මණපච්චයා – ආචයගාමී ඛන්ධෙ පටිච්ච චිත්තසමුට්ඨානං රූපං. (1)

අපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආරම්මණපච්චයා – අපචයගාමී ඛන්ධෙ පටිච්ච චිත්තසමුට්ඨානං රූපං. (1)

නෙවාචයගාමිනාපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආරම්මණපච්චයා – නෙවාචයගාමිනාපචයගාමී ඛන්ධෙ පටිච්ච චිත්තසමුට්ඨානං රූපං. පටිසන්ධික්ඛණෙ…පෙ… ඛන්ධෙ පටිච්ච වත්ථු…පෙ… එකං මහාභූතං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං…පෙ…. (1)

ආචයගාමිඤ්ච නෙවාචයගාමිනාපචයගාමිඤ්ච ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආරම්මණපච්චයා – ආචයගාමී ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

අපචයගාමිඤ්ච නෙවාචයගාමිනාපචයගාමිඤ්ච ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආරම්මණපච්චයා – අපචයගාමී ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

නඅධිපතිපච්චයො

10. ආචයගාමිං ධම්මං පටිච්ච ආචයගාමී ධම්මො උප්පජ්ජති නඅධිපතිපච්චයා… තීණි.

අපචයගාමිං ධම්මං පටිච්ච අපචයගාමී ධම්මො උප්පජ්ජති නඅධිපතිපච්චයා – අපචයගාමී ඛන්ධෙ පටිච්ච අපචයගාමී අධිපති. (1)

නෙවාචයගාමිනාපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නඅධිපතිපච්චයා – නෙවාචයගාමිනාපචයගාමිං එකං ඛන්ධං පටිච්ච තයො ඛන්ධා චිත්තසමුට්ඨානඤ්ච රූපං…පෙ… ද්වෙ ඛන්ධෙ…පෙ… පටිසන්ධික්ඛණෙ…පෙ… ඛන්ධෙ පටිච්ච වත්ථු, වත්ථුං පටිච්ච ඛන්ධා; එකං මහාභූතං…පෙ… බාහිරං… ආහාරසමුට්ඨානං… උතුසමුට්ඨානං… අසඤ්ඤසත්තානං එකං මහාභූතං…පෙ…. (1)

ආචයගාමිඤ්ච නෙවාචයගාමිනාපචයගාමිඤ්ච ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නඅධිපතිපච්චයා – ආචයගාමී ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

නඅනන්තරපච්චයාදි

11. ආචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නඅනන්තරපච්චයා… නසමනන්තරපච්චයා… නඅඤ්ඤමඤ්ඤපච්චයා… නඋපනිස්සයපච්චයා… නපුරෙජාතපච්චයා (කුසලත්තිකසදිසා සත්ත පඤ්හා)… නපච්ඡාජාතපච්චයා.

නආසෙවනපච්චයො

12. ආචයගාමිං ධම්මං පටිච්ච ආචයගාමී ධම්මො උප්පජ්ජති නආසෙවනපච්චයා… තීණි.

අපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආසෙවනපච්චයා – අපචයගාමී ඛන්ධෙ පටිච්ච චිත්තසමුට්ඨානං රූපං. (1)

නෙවාචයගාමිනාපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආසෙවනපච්චයා (එකා පඤ්හා සබ්බෙ මහාභූතා කාතබ්බා).

ආචයගාමිඤ්ච නෙවාචයගාමිනාපචයගාමිඤ්ච ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආසෙවනපච්චයා – ආචයගාමී ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

අපචයගාමිඤ්ච නෙවාචයගාමිනාපචයගාමිඤ්ච ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නආසෙවනපච්චයා – අපචයගාමී ඛන්ධෙ ච මහාභූතෙ ච පටිච්ච චිත්තසමුට්ඨානං රූපං. (1)

නකම්මපච්චයො

13. ආචයගාමිං ධම්මං පටිච්ච ආචයගාමී ධම්මො උප්පජ්ජති නකම්මපච්චයා – ආචයගාමී ඛන්ධෙ පටිච්ච ආචයගාමී චෙතනා. (1)

අපචයගාමිං ධම්මං පටිච්ච අපචයගාමී ධම්මො උප්පජ්ජති නකම්මපච්චයා – අපචයගාමී ඛන්ධෙ පටිච්ච අපචයගාමී චෙතනා. (1)

නෙවාචයගාමිනාපචයගාමිං ධම්මං පටිච්ච නෙවාචයගාමිනාපචයගාමී ධම්මො උප්පජ්ජති නකම්මපච්චයා – නෙවාචයගාමිනාපචයගාමී ඛන්ධෙ පටිච්ච නෙවාචයගාමිනාපචයගාමී චෙතනා; බාහිරං… ආහාරසමුට්ඨානං… උතුසමුට්ඨානං… එකං මහාභූතං…පෙ…. (1)

නවිපාකපච්චයාදි

14. ආචයගාමිං ධම්මං පටිච්ච ආචයගාමී ධම්මො උප්පජ්ජති නවිපාකපච්චයා (පරිපුණ්ණං, පටිසන්ධි නත්ථි)… නආහාරපච්චයා… නඉන්ද්‍රියපච්චයා… නඣානපච්චයා… නමග්ගපච්චයා… නසම්පයුත්තපච්චයා… නවිප්පයුත්තපච්චයා (තීණි)… නොනත්ථිපච්චයා… නොවිගතපච්චයා.