2. අනාගතාදිඑකච්චකථා

300. අනාගතං අත්ථීති? එකච්චං අත්ථි, එකච්චං නත්ථීති. එකච්චං ජාතං, එකච්චං අජාතං; එකච්චං සඤ්ජාතං, එකච්චං අසඤ්ජාතං; එකච්චං නිබ්බත්තං, එකච්චං අනිබ්බත්තං; එකච්චං පාතුභූතං, එකච්චං අපාතුභූතන්ති? න හෙවං වත්තබ්බෙ…පෙ….

අනාගතං එකච්චං අත්ථි, එකච්චං නත්ථීති? ආමන්තා. අනාගතා උප්පාදිනො ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ… අනාගතං එකච්චං අත්ථි, එකච්චං නත්ථීති? ආමන්තා. අනාගතා අනුප්පාදිනො ධම්මා එකච්චෙ අත්ථි, එකච්චෙ නත්ථීති? න හෙවං වත්තබ්බෙ…පෙ….

අනාගතං එකච්චං අත්ථි, එකච්චං නත්ථීති? ආමන්තා. කිං අත්ථි, කිං නත්ථීති? අනාගතා උප්පාදිනො ධම්මා – තෙ අත්ථි; අනාගතා අනුප්පාදිනො ධම්මා – තෙ නත්ථීති. අනාගතා උප්පාදිනො ධම්මා – තෙ අත්ථීති? ආමන්තා. අනාගතා අනුප්පාදිනො ධම්මා – තෙ අත්ථීති? න හෙවං වත්තබ්බෙ…පෙ… අනාගතා අනුප්පාදිනො ධම්මා – තෙ නත්ථීති? ආමන්තා. අනාගතා උප්පාදිනො ධම්මා – තෙ නත්ථීති? න හෙවං වත්තබ්බෙ…පෙ….

අනාගතා උප්පාදිනො ධම්මා – තෙ අත්ථීති? ආමන්තා. නනු අනාගතා උප්පාදිනො ධම්මා අජාතාති? ආමන්තා. හඤ්චි අනාගතා උප්පාදිනො ධම්මා අජාතා, නො ච වත රෙ වත්තබ්බෙ – ‘‘අනාගතා උප්පාදිනො ධම්මා – තෙ අත්ථී’’ති.

අනාගතා උප්පාදිනො ධම්මා අජාතා – තෙ අත්ථීති? ආමන්තා. අනාගතා අනුප්පාදිනො ධම්මා අජාතා – තෙ අත්ථීති? න හෙවං වත්තබ්බෙ…පෙ… අනාගතා අනුප්පාදිනො ධම්මා අජාතා – තෙ නත්ථීති? ආමන්තා. අනාගතා උප්පාදිනො ධම්මා අජාතා – තෙ නත්ථීති? න හෙවං වත්තබ්බෙ…පෙ….

න වත්තබ්බං – ‘‘අනාගතා උප්පාදිනො ධම්මා – තෙ අත්ථී’’ති? ආමන්තා. නනු අනාගතා උප්පාදිනො ධම්මා උප්පජ්ජිස්සන්තීති? ආමන්තා. හඤ්චි අනාගතා උප්පාදිනො ධම්මා උප්පජ්ජිස්සන්ති, තෙන වත රෙ වත්තබ්බෙ – ‘‘අනාගතා උප්පාදිනො ධම්මා – තෙ අත්ථී’’ති.

අනාගතා උප්පාදිනො ධම්මා උප්පජ්ජිස්සන්තීති කත්වා තෙ අත්ථීති? ආමන්තා. උප්පජ්ජිස්සන්තීති කත්වා පච්චුප්පන්නාති? න හෙවං වත්තබ්බෙ…පෙ… උප්පජ්ජිස්සන්තීති කත්වා පච්චුප්පන්නාති? ආමන්තා. පච්චුප්පන්නා ධම්මා නිරුජ්ඣිස්සන්තීති කත්වා තෙ නත්ථීති? න හෙවං වත්තබ්බෙ…පෙ….

එකච්චං අත්ථීතිකථා නිට්ඨිතා.