23. තෙවීසතිමවග්ගො

(226) 9. අපරිනිප්ඵන්නකථා

917. රූපං අපරිනිප්ඵන්නන්ති? ආමන්තා. රූපං න අනිච්චං න සඞ්ඛතං න පටිච්චසමුප්පන්නං න ඛයධම්මං න වයධම්මං න විරාගධම්මං න නිරොධධම්මං න විපරිණාමධම්මන්ති? න හෙවං වත්තබ්බෙ…පෙ… නනු රූපං අනිච්චං සඞ්ඛතං පටිච්චසමුප්පන්නං ඛයධම්මං වයධම්මං විරාගධම්මං නිරොධධම්මං විපරිණාමධම්මන්ති? ආමන්තා. හඤ්චි රූපං අනිච්චං සඞ්ඛතං…පෙ… විපරිණාමධම්මං, නො ච වත රෙ වත්තබ්බෙ – ‘‘රූපං අපරිනිප්ඵන්න’’න්ති.

දුක්ඛඤ්ඤෙව පරිනිප්ඵන්නන්ති? ආමන්තා. නනු යදනිච්චං තං දුක්ඛං [සං. නි. 3.15] වුත්තං භගවතා – ‘‘රූපං අනිච්ච’’න්ති? ආමන්තා. හඤ්චි යදනිච්චං තං දුක්ඛං වුත්තං භගවතා – ‘‘රූපං අනිච්චං’’, නො ච වත රෙ වත්තබ්බෙ – ‘‘දුක්ඛඤ්ඤෙව පරිනිප්ඵන්න’’න්ති…පෙ….

918. වෙදනා …පෙ… සඤ්ඤා… සඞ්ඛාරා… විඤ්ඤාණං… චක්ඛායතනං…පෙ… ධම්මායතනං… චක්ඛුධාතු… ධම්මධාතු… චක්ඛුන්ද්‍රියං…පෙ… අඤ්ඤාතාවින්ද්‍රියං අපරිනිප්ඵන්නන්ති? ආමන්තා. අඤ්ඤාතාවින්ද්‍රියං න අනිච්චං…පෙ… න විපරිණාමධම්මන්ති? න හෙවං වත්තබ්බෙ…පෙ… නනු අඤ්ඤාතාවින්ද්‍රියං අනිච්චං සඞ්ඛතං…පෙ… විපරිණාමධම්මන්ති? ආමන්තා. හඤ්චි අඤ්ඤාතාවින්ද්‍රියං අනිච්චං සඞ්ඛතං පටිච්චසමුප්පන්නං ඛයධම්මං වයධම්මං විරාගධම්මං නිරොධධම්මං විපරිණාමධම්මං, නො ච වත රෙ වත්තබ්බෙ – ‘‘අඤ්ඤාතාවින්ද්‍රියං අපරිනිප්ඵන්න’’න්ති.

දුක්ඛඤ්ඤෙව පරිනිප්ඵන්නන්ති? ආමන්තා. නනු යදනිච්චං තං දුක්ඛං වුත්තං භගවතා – ‘‘අඤ්ඤාතාවින්ද්‍රියං අනිච්ච’’න්ති? ආමන්තා. හඤ්චි යදනිච්චං තං දුක්ඛං වුත්තං භගවතා – ‘‘අඤ්ඤාතාවින්ද්‍රියං අනිච්චං’’, නො ච වත රෙ වත්තබ්බෙ – ‘‘දුක්ඛඤ්ඤෙව පරිනිප්ඵන්න’’න්ති.

අපරිනිප්ඵන්නකථා නිට්ඨිතා.

තෙවීසතිමවග්ගො.

තස්සුද්දානං –

එකාධිප්පායෙන මෙථුනො ධම්මො පටිසෙවිතබ්බො, අරහන්තානං වණ්ණෙන අමනුස්සා මෙථුනං ධම්මං පටිසෙවන්ති, බොධිසත්තො ඉස්සරියකාමකාරිකාහෙතු විනිපාතං ගච්ඡති, ගබ්භසෙය්‍යං ඔක්කමති, දුක්කරකාරිකං අකාසි, අපරන්තපං අකාසි, අඤ්ඤං සත්ථාරං උද්දිසි, අත්ථි න රාගො රාගපතිරූපකො අත්ථි න දොසො දොසපතිරූපකො අත්ථි න මොහො මොහපතිරූපකො අත්ථි න කිලෙසො කිලෙසපතිරූපකො, රූපං අපරිනිප්ඵන්නං අඤ්ඤාතාවින්ද්‍රියං අපරිනිප්ඵන්නන්ති.

ඛුද්දකො අඩ්ඪපණ්ණාසකො.

තස්සුද්දානං –

නවං, නිබ්බුති, එකාධිප්පායොති.

පණ්ණාසකුද්දානං –

මහානියාමො, අනුසයා, නිග්ගහො, ඛුද්දකපඤ්චමො;

පරප්පවාදමද්දනා, සුත්තමූලසමාහිතා;

උජ්ජොතනා සත්ථුසමයෙ, කථාවත්ථුපකරණෙති.

පඤ්චත්තිංසභාණවාරං

කථාවත්ථුපකරණං නිට්ඨිතං.