23. තෙවීසතිමවග්ගො

(220-4) 3-7. ඉස්සරියකාමකාරිකාදිකථා

910. බොධිසත්තො ඉස්සරියකාමකාරිකාහෙතු විනිපාතං ගච්ඡතීති? ආමන්තා. බොධිසත්තො ඉස්සරියකාමකාරිකාහෙතු නිරයං ගච්ඡති, සඤ්ජීවං ගච්ඡති, කාලසුත්තං ගච්ඡති, තාපනං ගච්ඡති, මහාතාපනං [පතාපනං (සී. ස්‍යා. කං. පී.)] ගච්ඡති, සඞ්ඝාතකං ගච්ඡති, රොරුවං ගච්ඡති…පෙ… අවීචිං ගච්ඡතීති? න හෙවං වත්තබ්බෙ…පෙ….

බොධිසත්තො ඉස්සරියකාමකාරිකාහෙතු විනිපාතං ගච්ඡතීති? ආමන්තා. ‘‘බොධිසත්තො ඉස්සරියකාමකාරිකාහෙතු විනිපාතං ගච්ඡතී’’ති – අත්ථෙව සුත්තන්තොති? නත්ථි. හඤ්චි ‘‘බොධිසත්තො ඉස්සරියකාමකාරිකාහෙතු විනිපාතං ගච්ඡතී’’ති – නත්ථෙව සුත්තන්තො, නො ච වත රෙ වත්තබ්බෙ – ‘‘බොධිසත්තො ඉස්සරියකාමකාරිකාහෙතු විනිපාතං ගච්ඡතී’’ති.

911. බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතීති? ආමන්තා. බොධිසත්තො ඉස්සරියකාමකාරිකාහෙතු නිරයං උපපජ්ජෙය්‍ය, තිරච්ඡානයොනිං උපපජ්ජෙය්‍යාති? න හෙවං වත්තබ්බෙ…පෙ….

බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතීති? ආමන්තා. බොධිසත්තො ඉද්ධිමාති? න හෙවං වත්තබ්බෙ…පෙ… බොධිසත්තො ඉද්ධිමාති? ආමන්තා. බොධිසත්තෙන ඡන්දිද්ධිපාදො භාවිතො…පෙ… වීරියිද්ධිපාදො…පෙ… චිත්තිද්ධිපාදො…පෙ… වීමංසිද්ධිපාදො භාවිතොති? න හෙවං වත්තබ්බෙ…පෙ….

බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතීති? ආමන්තා. ‘‘බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතී’’ති – අත්ථෙව සුත්තන්තොති? නත්ථි. හඤ්චි ‘‘බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතී’’ති – නත්ථෙව සුත්තන්තො, නො ච වත රෙ වත්තබ්බෙ – ‘‘බොධිසත්තො ඉස්සරියකාමකාරිකාහෙතු ගබ්භසෙය්‍යං ඔක්කමතී’’ති.

912. බොධිසත්තො ඉස්සරියකාමකාරිකාහෙතු දුක්කරකාරිකං අකාසීති? ආමන්තා. බොධිසත්තො ඉස්සරියකාමකාරිකාහෙතු ‘‘සස්සතො ලොකො’’ති පච්චාගච්ඡි, ‘‘අසස්සතො ලොකො’’ති…පෙ… ‘‘අන්තවා ලොකො’’ති…පෙ… ‘‘අනන්තවා ලොකො’’ති… ‘‘තං ජීවං තං සරීර’’න්ති … ‘‘අඤ්ඤං ජීවං අඤ්ඤං සරීර’’න්ති… ‘‘හොති තථාගතො පරං මරණා’’ති… ‘‘න හොති තථාගතො පරං මරණා’’ති… ‘‘හොති ච න ච හොති තථාගතො පරං මරණා’’ති…පෙ… ‘‘නෙව හොති න න හොති තථාගතො පරං මරණා’’ති පච්චාගච්ඡීති? න හෙවං වත්තබ්බෙ…පෙ….

බොධිසත්තො ඉස්සරියකාමකාරිකාහෙතු දුක්කරකාරිකං අකාසීති? ආමන්තා. ‘‘බොධිසත්තො ඉස්සරියකාමකාරිකාහෙතු දුක්කරකාරිකං අකාසී’’ති – අත්ථෙව සුත්තන්තොති? නත්ථි. හඤ්චි ‘‘බොධිසත්තො ඉස්සරියකාමකාරිකාහෙතු දුක්කරකාරිකං අකාසී’’ති – නත්ථෙව සුත්තන්තො, නො ච වත රෙ වත්තබ්බෙ – ‘‘බොධිසත්තො ඉස්සරියකාමකාරිකාහෙතු දුක්කරකාරිකං අකාසී’’ති.

913. බොධිසත්තො ඉස්සරියකාමකාරිකාහෙතු අපරන්තපං [අමරං තපං (සං. නි. 1.137)] අකාසි, අඤ්ඤං සත්ථාරං උද්දිසීති? ආමන්තා. බොධිසත්තො ඉස්සරියකාමකාරිකාහෙතු ‘‘සස්සතො ලොකො’’ති පච්චාගච්ඡි…පෙ… ‘‘නෙව හොති න න හොති තථාගතො පරං මරණා’’ති පච්චාගච්ඡීති? න හෙවං වත්තබ්බෙ…පෙ….

914. බොධිසත්තො ඉස්සරියකාමකාරිකාහෙතු අඤ්ඤං සත්ථාරං උද්දිසීති? ආමන්තා. ‘‘බොධිසත්තො ඉස්සරියකාමකාරිකාහෙතු අඤ්ඤං සත්ථාරං උද්දිසී’’ති – අත්ථෙව සුත්තන්තොති? නත්ථි. හඤ්චි ‘‘බොධිසත්තො ඉස්සරියකාමකාරිකාහෙතු අඤ්ඤං සත්ථාරං උද්දිසී’’ති – නත්ථෙව සුත්තන්තො, නො ච වත රෙ වත්තබ්බෙ – ‘‘බොධිසත්තො ඉස්සරියකාමකාරිකාහෙතු අඤ්ඤං සත්ථාරං උද්දිසී’’ති.

ඉස්සරියකාමකාරිකාකථා නිට්ඨිතා.