22. බාවීසතිමවග්ගො
(215) 8. අබ්‍යාකතකථා
901. සබ්බං සුපිනගතස්ස චිත්තං අබ්‍යාකතන්ති? ආමන්තා. සුපිනන්තෙන පාණං හනෙය්‍යාති? ආමන්තා. හඤ්චි සුපිනන්තෙන පාණං හනෙය්‍ය, නො ච වත රෙ වත්තබ්බෙ – ‘‘සබ්බං සුපිනගතස්ස චිත්තං අබ්‍යාකත’’න්ති.
සුපිනන්තෙන අදින්නං ආදියෙය්‍ය…පෙ… මුසා භණෙය්‍ය, පිසුණං භණෙය්‍ය, ඵරුසං භණෙය්‍ය, සම්ඵං පලපෙය්‍ය, සන්ධිං ඡින්දෙය්‍ය, නිල්ලොපං හරෙය්‍ය, එකාගාරිකං කරෙය්‍ය, පරිපන්ථෙ තිට්ඨෙය්‍ය, පරදාරං ගච්ඡෙය්‍ය, ගාමඝාතකං කරෙය්‍ය, නිගමඝාතකං කරෙය්‍ය, සුපිනන්තෙන මෙථුනං ධම්මං පටිසෙවෙය්‍ය, සුපිනගතස්ස අසුචි මුච්චෙය්‍ය, සුපිනන්තෙන දානං දදෙය්‍ය, චීවරං දදෙය්‍ය, පිණ්ඩපාතං දදෙය්‍ය, සෙනාසනං දදෙය්‍ය, ගිලානපච්චයභෙසජ්ජපරික්ඛාරං දදෙය්‍ය, ඛාදනීයං දදෙය්‍ය, භොජනීයං දදෙය්‍ය, පානීයං දදෙය්‍ය, චෙතියං වන්දෙය්‍ය, චෙතියෙ මාලං ආරොපෙය්‍ය, ගන්ධං ආරොපෙය්‍ය, විලෙපනං ආරොපෙය්‍ය…පෙ… චෙතියං අභිදක්ඛිණං කරෙය්‍යාති? ආමන්තා. හඤ්චි සුපිනන්තෙන චෙතියං අභිදක්ඛිණං කරෙය්‍ය, නො ච වත රෙ වත්තබ්බෙ – ‘‘සබ්බං සුපිනගතස්ස චිත්තං අබ්‍යාකත’’න්ති.
902. න වත්තබ්බං – ‘‘සබ්බං සුපිනගතස්ස චිත්තං අබ්‍යාකත’’න්ති? ආමන්තා. නනු සුපිනගතස්ස චිත්තං අබ්බොහාරියං වුත්තං භගවතාති? ආමන්තා. හඤ්චි සුපිනගතස්ස චිත්තං අබ්බොහාරියං වුත්තං භගවතා, තෙන වත රෙ වත්තබ්බෙ – ‘‘සබ්බං සුපිනගතස්ස චිත්තං අබ්‍යාකත’’න්ති.
අබ්‍යාකතකථා නිට්ඨිතා.