(210) 3. ආනෙඤ්ජකථා

896. අරහා ආනෙඤ්ජෙ ඨිතො පරිනිබ්බායතීති? ආමන්තා. නනු අරහා පකතිචිත්තෙ ඨිතො පරිනිබ්බායතීති? ආමන්තා. හඤ්චි අරහා පකතිචිත්තෙ ඨිතො පරිනිබ්බායති, නො ච වත රෙ වත්තබ්බෙ – ‘‘අරහා ආනෙඤ්ජෙ ඨිතො පරිනිබ්බායතී’’ති.

අරහා ආනෙඤ්ජෙ ඨිතො පරිනිබ්බායතීති? ආමන්තා. අරහා කිරියමයෙ චිත්තෙ ඨිතො පරිනිබ්බායතීති? න හෙවං වත්තබ්බෙ…පෙ… නනු අරහා විපාකචිත්තෙ ඨිතො පරිනිබ්බායතීති? ආමන්තා. හඤ්චි අරහා විපාකචිත්තෙ ඨිතො පරිනිබ්බායති, නො ච වත රෙ වත්තබ්බෙ – ‘‘අරහා ආනෙඤ්ජෙ ඨිතො පරිනිබ්බායතී’’ති.

අරහා ආනෙඤ්ජෙ ඨිතො පරිනිබ්බායතීති? ආමන්තා. අරහා කිරියාබ්‍යාකතෙ චිත්තෙ ඨිතො පරිනිබ්බායතීති? න හෙවං වත්තබ්බෙ…පෙ… නනු අරහා විපාකාබ්‍යාකතෙ චිත්තෙ ඨිතො පරිනිබ්බායතීති? ආමන්තා. හඤ්චි අරහා විපාකාබ්‍යාකතෙ චිත්තෙ ඨිතො පරිනිබ්බායති, නො ච වත රෙ වත්තබ්බෙ – ‘‘අරහා ආනෙඤ්ජෙ ඨිතො පරිනිබ්බායතී’’ති.

අරහා ආනෙඤ්ජෙ ඨිතො පරිනිබ්බායතීති? ආමන්තා. නනු භගවා චතුත්ථජ්ඣානා වුට්ඨහිත්වා සමනන්තරා පරිනිබ්බුතොති [දී. නි. 2.219]? ආමන්තා. හඤ්චි භගවා චතුත්ථජ්ඣානා වුට්ඨහිත්වා සමනන්තරා පරිනිබ්බුතො, නො ච වත රෙ වත්තබ්බෙ – ‘‘අරහා ආනෙඤ්ජෙ ඨිතො පරිනිබ්බායතී’’ති.

ආනෙඤ්ජකථා නිට්ඨිතා.