20. වීසතිමවග්ගො

(197) 4. තිරච්ඡානකථා

869. අත්ථි දෙවෙසු තිරච්ඡානගතාති? ආමන්තා. අත්ථි තිරච්ඡානගතෙසු දෙවාති? න හෙවං වත්තබ්බෙ…පෙ… අත්ථි දෙවෙසු තිරච්ඡානගතාති? ආමන්තා. දෙවලොකො තිරච්ඡානයොනීති? න හෙවං වත්තබ්බෙ…පෙ… අත්ථි දෙවෙසු තිරච්ඡානගතාති? ආමන්තා. අත්ථි තත්ථ කීටා පටඞ්ගා මකසා මක්ඛිකා අහී විච්ඡිකා සතපදී ගණ්ඩුප්පාදාති [ගණ්ඩුපාදාති (ස්‍යා. කං. පී.)]? න හෙවං වත්තබ්බෙ…පෙ….

870. නත්ථි දෙවෙසු තිරච්ඡානගතාති? ආමන්තා. නනු අත්ථි තත්ථ එරාවණො නාම හත්ථිනාගො සහස්සයුත්තං දිබ්බං යානන්ති? ආමන්තා. හඤ්චි අත්ථි තත්ථ එරාවණො නාම හත්ථිනාගො සහස්සයුත්තං දිබ්බං යානං, තෙන වත රෙ වත්තබ්බෙ – ‘‘අත්ථි දෙවෙසු තිරච්ඡානගතා’’ති.

871. අත්ථි දෙවෙසු තිරච්ඡානගතාති? ආමන්තා. අත්ථි තත්ථ හත්ථිබන්ධා අස්සබන්ධා [හත්ථිභණ්ඩා අස්සභණ්ඩා (?)] යාවසිකා කාරණිකා භත්තකාරකාති? න හෙවං වත්තබ්බෙ. තෙන හි නත්ථි දෙවෙසු තිරච්ඡානගතාති.

තිරච්ඡානකථා නිට්ඨිතා.