18. අට්ඨාරසමවග්ගො

(180) 4. ගන්ධජාතිකථා

809. බුද්ධස්ස භගවතො උච්චාරපස්සාවො අතිවිය අඤ්ඤෙ ගන්ධජාතෙ අධිග්ගණ්හාතීති? ආමන්තා. භගවා ගන්ධභොජීති? න හෙවං වත්තබ්බෙ…පෙ… නනු භගවා ඔදනකුම්මාසං භුඤ්ජතීති? ආමන්තා. හඤ්චි භගවා ඔදනකුම්මාසං භුඤ්ජති, නො ච වත රෙ වත්තබ්බෙ – ‘‘බුද්ධස්ස භගවතො උච්චාරපස්සාවො අතිවිය අඤ්ඤෙ ගන්ධජාතෙ අධිග්ගණ්හාතී’’ති.

බුද්ධස්ස භගවතො උච්චාරපස්සාවො අතිවිය අඤ්ඤෙ ගන්ධජාතෙ අධිග්ගණ්හාතීති? ආමන්තා. අත්ථි කෙචි බුද්ධස්ස භගවතො උච්චාරපස්සාවං න්හායන්ති විලිම්පන්ති උච්ඡාදෙන්ති [උච්චාරෙන්ති (සී. පී. ක.)] පෙළාය පටිසාමෙන්ති කරණ්ඩාය නික්ඛිපන්ති ආපණෙ පසාරෙන්ති, තෙන ච ගන්ධෙන ගන්ධකරණීයං කරොන්තීති? න හෙවං වත්තබ්බෙ…පෙ….

ගන්ධජාතිකථා නිට්ඨිතා.