(178) 2. ධම්මදෙසනාකථා

804. න වත්තබ්බං – ‘‘බුද්ධෙන භගවතා ධම්මො දෙසිතො’’ති? ආමන්තා. කෙන දෙසිතොති? අභිනිම්මිතෙන දෙසිතොති. අභිනිම්මිතො ජිනො සත්ථා සම්මාසම්බුද්ධො සබ්බඤ්ඤූ සබ්බදස්සාවී ධම්මස්සාමී ධම්මප්පටිසරණොති? න හෙවං වත්තබ්බෙ…පෙ….

න වත්තබ්බං – ‘‘බුද්ධෙන භගවතා ධම්මො දෙසිතො’’ති? ආමන්තා. කෙන දෙසිතොති? ආයස්මතා ආනන්දෙන දෙසිතොති. ආයස්මා ආනන්දො ජිනො සත්ථා සම්මාසම්බුද්ධො සබ්බඤ්ඤූ සබ්බදස්සාවී ධම්මස්සාමී ධම්මප්පටිසරණොති? න හෙවං වත්තබ්බෙ…පෙ….

805. න වත්තබ්බං – ‘‘බුද්ධෙන භගවතා ධම්මො දෙසිතො’’ති? ආමන්තා. නනු වුත්තං භගවතා – ‘‘සංඛිත්තෙනපි ඛො අහං, සාරිපුත්ත, ධම්මං දෙසෙය්‍යං; විත්ථාරෙනපි ඛො අහං, සාරිපුත්ත, ධම්මං දෙසෙය්‍යං; සංඛිත්තවිත්ථාරෙනපි ඛො අහං, සාරිපුත්ත, ධම්මං දෙසෙය්‍යං; අඤ්ඤාතාරො ච දුල්ලභා’’ති [අ. නි. 3.33 සාරිපුත්තසුත්තෙ]! අත්ථෙව සුත්තන්තොති? ආමන්තා. තෙන හි බුද්ධෙන භගවතා ධම්මො දෙසිතොති.

806. න වත්තබ්බං – ‘‘බුද්ධෙන භගවතා ධම්මො දෙසිතො’’ති? ආමන්තා. නනු වුත්තං භගවතා – ‘‘‘අභිඤ්ඤායාහං, භික්ඛවෙ, ධම්මං දෙසෙමි, නො අනභිඤ්ඤාය; සනිදානාහං, භික්ඛවෙ, ධම්මං දෙසෙමි, නො අනිදානං; සප්පාටිහාරියාහං, භික්ඛවෙ, ධම්මං දෙසෙමි, නො අප්පාටිහාරියං; තස්ස [යඤ්චස්ස (සී. පී. ක.)] මය්හං, භික්ඛවෙ, අභිඤ්ඤාය ධම්මං දෙසයතො නො අනභිඤ්ඤාය, සනිදානං ධම්මං දෙසයතො නො අනිදානං, සප්පාටිහාරියං ධම්මං දෙසයතො නො අප්පාටිහාරියං කරණීයො ඔවාදො කරණීයා අනුසාසනී; අලඤ්ච පන වො, භික්ඛවෙ, තුට්ඨියා අලං අත්තමනතාය අලං සොමනස්සාය – සම්මාසම්බුද්ධො භගවා, ස්වාක්ඛාතො ධම්මො, සුප්පටිපන්නො සඞ්ඝො’ති. ඉමස්මිඤ්ච පන වෙය්‍යාකරණස්මිං භඤ්ඤමානෙ දසසහස්සිලොකධාතු අකම්පිත්ථා’’ති [අ. නි. 3.126]! අත්ථෙව සුත්තන්තොති? ආමන්තා. තෙන හි බුද්ධෙන භගවතා ධම්මො දෙසිතොති.

ධම්මදෙසනාකථා නිට්ඨිතා.