17. සත්තරසමවග්ගො

(170) 5. ඨපෙත්වා අරියමග්ගන්තිකථා

789. ඨපෙත්වා අරියමග්ගං අවසෙසා සඞ්ඛාරා දුක්ඛාති? ආමන්තා. දුක්ඛසමුදයොපි දුක්ඛොති? න හෙවං වත්තබ්බෙ…පෙ… දුක්ඛසමුදයොපි දුක්ඛොති? ආමන්තා. තීණෙව අරියසච්චානීති? න හෙවං වත්තබ්බෙ…පෙ… තීණෙව අරියසච්චානීති? ආමන්තා. නනු චත්තාරි අරියසච්චානි වුත්තානි භගවතා – දුක්ඛං, දුක්ඛසමුදයො, දුක්ඛනිරොධො, දුක්ඛනිරොධගාමිනී පටිපදාති? ආමන්තා. හඤ්චි චත්තාරි අරියසච්චානි වුත්තානි භගවතා – දුක්ඛං, දුක්ඛසමුදයො, දුක්ඛනිරොධො, දුක්ඛනිරොධගාමිනී පටිපදා; නො ච වත රෙ වත්තබ්බෙ – ‘‘තීණෙව අරියසච්චානී’’ති.

දුක්ඛසමුදයොපි දුක්ඛොති? ආමන්තා. කෙනට්ඨෙනාති? අනිච්චට්ඨෙන. අරියමග්ගො අනිච්චොති? ආමන්තා. අරියමග්ගො දුක්ඛොති? න හෙවං වත්තබ්බෙ…පෙ….

අරියමග්ගො අනිච්චො, සො ච න දුක්ඛොති? ආමන්තා. දුක්ඛසමුදයො අනිච්චො, සො ච න දුක්ඛොති? න හෙවං වත්තබ්බෙ…පෙ… දුක්ඛසමුදයො අනිච්චො, සො ච දුක්ඛොති? ආමන්තා. අරියමග්ගො අනිච්චො, සො ච දුක්ඛොති? න හෙවං වත්තබ්බෙ…පෙ….

790. න වත්තබ්බං – ‘‘ඨපෙත්වා අරියමග්ගං අවසෙසා සඞ්ඛාරා දුක්ඛා’’ති? ආමන්තා. නනු සා දුක්ඛනිරොධගාමිනී පටිපදාති? ආමන්තා. හඤ්චි සා දුක්ඛනිරොධගාමිනී පටිපදා, තෙන වත රෙ වත්තබ්බෙ – ‘‘ඨපෙත්වා අරියමග්ගං අවසෙසා සඞ්ඛාරා දුක්ඛා’’ති.

ඨපෙත්වා අරියමග්ගන්තිකථා නිට්ඨිතා.