16. සොළසමවග්ගො

(160) 5. රූපං හෙතූතිකථා

754. රූපං හෙතූති? ආමන්තා. අලොභො හෙතූති? න හෙවං වත්තබ්බෙ…පෙ… අදොසො හෙතු…පෙ… අමොහො හෙතු… ලොභො හෙතු… දොසො හෙතු… මොහො හෙතූති? න හෙවං වත්තබ්බෙ…පෙ….

රූපං හෙතූති? ආමන්තා. සාරම්මණං, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… නනු අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. හඤ්චි අනාරම්මණං, නත්ථි තස්ස ආවට්ටනා…පෙ… පණිධි, නො ච වත රෙ වත්තබ්බෙ – ‘‘රූපං හෙතූ’’ති.

755. අලොභො හෙතු සාරම්මණො, අත්ථි තස්ස ආවට්ටනා…පෙ… පණිධීති? ආමන්තා. රූපං හෙතු සාරම්මණං, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… අදොසො හෙතු… අමොහො හෙතු… ලොභො හෙතු… දොසො හෙතු… මොහො හෙතු සාරම්මණො, අත්ථි තස්ස ආවට්ටනා…පෙ… පණිධීති? ආමන්තා. රූපං හෙතු සාරම්මණං, අත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

රූපං හෙතු අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. අලොභො හෙතු අනාරම්මණො, නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ… රූපං හෙතු අනාරම්මණං, නත්ථි තස්ස ආවට්ටනා…පෙ… පණිධීති? ආමන්තා. අදොසො හෙතු… අමොහො හෙතු… ලොභො හෙතු… දොසො හෙතු… මොහො හෙතු අනාරම්මණො, නත්ථි තස්ස ආවට්ටනා…පෙ… පණිධීති? න හෙවං වත්තබ්බෙ…පෙ….

756. න වත්තබ්බං – ‘‘රූපං හෙතූ’’ති? ආමන්තා. නනු මහාභූතා උපාදායරූපානං [උපාදාරූපානං (සී. පී. ක.)] උපාදායහෙතූති? ආමන්තා. හඤ්චි මහාභූතා උපාදායරූපානං උපාදායහෙතු, තෙන වත රෙ වත්තබ්බෙ – ‘‘රූපං හෙතූ’’ති.

රූපං හෙතූතිකථා නිට්ඨිතා.