16. සොළසමවග්ගො

(157) 2. පග්ගහකථා

745. පරො පරස්ස චිත්තං පග්ගණ්හාතීති? ආමන්තා. පරො පරස්ස චිත්තං ‘‘මා රජ්ජි,’’‘‘මා දුස්සි,’’‘‘මා මුය්හි,’’‘‘මා කිලිස්සී’’ති පග්ගණ්හාතීති? න හෙවං වත්තබ්බෙ…පෙ… පරො පරස්ස චිත්තං පග්ගණ්හාතීති? ආමන්තා. පරො පරස්ස අලොභං කුසලමූලං ජනෙති… අදොසං කුසලමූලං ජනෙති… අමොහං කුසලමූලං ජනෙති… සද්ධං ජනෙති… වීරියං ජනෙති… සතිං ජනෙති… සමාධිං ජනෙති… පඤ්ඤං ජනෙතීති? න හෙවං වත්තබ්බෙ…පෙ… පරො පරස්ස චිත්තං පග්ගණ්හාතීති? ආමන්තා. පරො පරස්ස උප්පන්නො ඵස්සො ‘‘මා නිරුජ්ඣී’’ති පග්ගණ්හාතීති? න හෙවං වත්තබ්බෙ…පෙ… පරො පරස්ස උප්පන්නා වෙදනා…පෙ… උප්පන්නා පඤ්ඤා ‘‘මා නිරුජ්ඣී’’ති පග්ගණ්හාතීති? න හෙවං වත්තබ්බෙ…පෙ….

පරො පරස්ස චිත්තං පග්ගණ්හාතීති? ආමන්තා. පරො පරස්ස අත්ථාය රාගං පජහති… දොසං පජහති… මොහං පජහති…පෙ… අනොත්තප්පං පජහතීති? න හෙවං වත්තබ්බෙ…පෙ….

පරො පරස්ස චිත්තං පග්ගණ්හාතීති? ආමන්තා. පරො පරස්ස අත්ථාය මග්ගං භාවෙති… සතිපට්ඨානං භාවෙති…පෙ… බොජ්ඣඞ්ගං භාවෙතීති? න හෙවං වත්තබ්බෙ…පෙ….

පරො පරස්ස චිත්තං පග්ගණ්හාතීති? ආමන්තා. පරො පරස්ස අත්ථාය දුක්ඛං පරිජානාති…පෙ… මග්ගං භාවෙතීති? න හෙවං වත්තබ්බෙ…පෙ….

පරො පරස්ස චිත්තං පග්ගණ්හාතීති? ආමන්තා. අඤ්ඤො අඤ්ඤස්ස කාරකො, පරඞ්කතං සුඛං දුක්ඛං අඤ්ඤො කරොති අඤ්ඤො පටිසංවෙදෙතීති? න හෙවං වත්තබ්බෙ…පෙ….

පරො පරස්ස චිත්තං පග්ගණ්හාතීති? ආමන්තා. නනු වුත්තං භගවතා – ‘‘අත්තනාව කතං පාපං…පෙ… නාඤ්ඤො අඤ්ඤං විසොධයෙ’’ති. අත්ථෙව සුත්තන්තොති? ආමන්තා. තෙන හි න වත්තබ්බං – ‘‘පරො පරස්ස චිත්තං පග්ගණ්හාතී’’ති.

746. න වත්තබ්බං – ‘‘පරො පරස්ස චිත්තං පග්ගණ්හාතී’’ති? ආමන්තා. නනු අත්ථි බලප්පත්තා, අත්ථි වසීභූතාති? ආමන්තා. හඤ්චි අත්ථි බලප්පත්තා, අත්ථි වසීභූතා, තෙන වත රෙ වත්තබ්බෙ – ‘‘පරො පරස්ස චිත්තං පග්ගණ්හාතී’’ති.

පග්ගහකථා නිට්ඨිතා.