15. පන්නරසමවග්ගො
(148) 4. ඛණලයමුහුත්තකථා
722. ඛණො පරිනිප්ඵන්නො, ලයො පරිනිප්ඵන්නො, මුහුත්තං පරිනිප්ඵන්නන්ති? ආමන්තා. රූපන්ති? න හෙවං වත්තබ්බෙ…පෙ… වෙදනා… සඤ්ඤා… සඞ්ඛාරා… විඤ්ඤාණන්ති? න හෙවං වත්තබ්බෙ…පෙ….
723. න වත්තබ්බං – ‘‘මුහුත්තං පරිනිප්ඵන්නන්ති? ආමන්තා. නනු වුත්තං භගවතා – ‘‘තීණිමානි, භික්ඛවෙ, කථාවත්ථූනි! කතමානි තීණි? අතීතං වා, භික්ඛවෙ, අද්ධානං ආරබ්භ කථං කථෙය්‍ය – ‘එවං අහොසි අතීතමද්ධාන’න්ති; අනාගතං වා, භික්ඛවෙ, අද්ධානං ආරබ්භ කථං කථෙය්‍ය – ‘එවං භවිස්සති අනාගතමද්ධාන’න්ති; එතරහි වා, භික්ඛවෙ, පච්චුප්පන්නං අද්ධානං ආරබ්භ කථං කථෙය්‍ය – ‘එවං හොති එතරහි පච්චුප්පන්න’න්ති. ඉමානි ඛො, භික්ඛවෙ, තීණි කථාවත්ථූනී’’ති. අත්ථෙව සුත්තන්තොති? ආමන්තා. තෙන හි මුහුත්තං පරිනිප්ඵන්නන්ති.
ඛණලයමුහුත්තකථා නිට්ඨිතා.