15. පන්නරසමවග්ගො

(146) 2. අඤ්ඤමඤ්ඤපච්චයකථා

718. අවිජ්ජාපච්චයාව සඞ්ඛාරා, න වත්තබ්බං – ‘‘සඞ්ඛාරපච්චයාපි අවිජ්ජා’’ති? ආමන්තා. නනු අවිජ්ජා සඞ්ඛාරෙන සහජාතාති? ආමන්තා. හඤ්චි අවිජ්ජා සඞ්ඛාරෙන සහජාතා, තෙන වත රෙ වත්තබ්බෙ – ‘‘අවිජ්ජාපච්චයාපි සඞ්ඛාරා, සඞ්ඛාරපච්චයාපි අවිජ්ජා’’ති.

තණ්හාපච්චයාව උපාදානං, න වත්තබ්බං – ‘‘උපාදානපච්චයාපි තණ්හා’’ති? ආමන්තා. නනු තණ්හා උපාදානෙන සහජාතාති? ආමන්තා. හඤ්චි තණ්හා උපාදානෙන සහජාතා, තෙන වත රෙ වත්තබ්බෙ – ‘‘තණ්හාපච්චයාපි උපාදානං, උපාදානපච්චයාපි තණ්හා’’ති.

719. ‘‘ජරාමරණපච්චයා, භික්ඛවෙ, ජාති, ජාතිපච්චයා භවො’’ති – අත්ථෙව සුත්තන්තොති? නත්ථි. තෙන හි අවිජ්ජාපච්චයාව සඞ්ඛාරා, න වත්තබ්බං – ‘‘සඞ්ඛාරපච්චයාපි අවිජ්ජා’’ති. තණ්හාපච්චයාව උපාදානං, න වත්තබ්බං – ‘‘උපාදානපච්චයාපි තණ්හා’’ති.

‘‘විඤ්ඤාණපච්චයා, භික්ඛවෙ, නාමරූපං, නාමරූපපච්චයාපි විඤ්ඤාණ’’න්ති [දී. නි. 2.58, ථොකං පන විසදිසං] – අත්ථෙව සුත්තන්තොති? ආමන්තා. තෙන හි අවිජ්ජාපච්චයාපි සඞ්ඛාරා, සඞ්ඛාරපච්චයාපි අවිජ්ජා; තණ්හාපච්චයාපි උපාදානං, උපාදානපච්චයාපි තණ්හාති.

අඤ්ඤමඤ්ඤපච්චයකථා නිට්ඨිතා.