(144) 9. අපරියාපන්නකථා

709. දිට්ඨිගතං අපරියාපන්නන්ති? ආමන්තා. මග්ගො ඵලං නිබ්බානං, සොතාපත්තිමග්ගො සොතාපත්තිඵලං, සකදාගාමිමග්ගො සකදාගාමිඵලං, අනාගාමිමග්ගො අනාගාමිඵලං, අරහත්තමග්ගො අරහත්තඵලං, සතිපට්ඨානං සම්මප්පධානං ඉද්ධිපාදො ඉන්ද්‍රියං බලං බොජ්ඣඞ්ගොති? න හෙවං වත්තබ්බෙ…පෙ….

710. න වත්තබ්බං – ‘‘දිට්ඨිගතං අපරියාපන්න’’න්ති? ආමන්තා. පුථුජ්ජනො ‘‘කාමෙසු වීතරාගො’’ති වත්තබ්බොති? ආමන්තා. ‘‘විගතදිට්ඨියො’’ති වත්තබ්බොති? න හෙවං වත්තබ්බෙ. තෙන හි දිට්ඨිගතං අපරියාපන්නන්ති.

අපරියාපන්නකථා නිට්ඨිතා.

චුද්දසමවග්ගො.

තස්සුද්දානං –

අකුසලමූලං පටිසන්දහති කුසලමූලං, කුසලමූලං පටිසන්දහති අකුසලමූලං, සළායතනං ඡවිඤ්ඤාණකායා, අරියරූපං මහාභූතානං උපාදාය, ස්වෙව අනුසයො තං පරියුට්ඨානං, පරියුට්ඨානං චිත්තවිප්පයුත්තං, යථාධාතු තඤ්ඤෙව අනුසෙති, දිට්ඨිගතං අබ්‍යාකතං, දිට්ඨිගතං අපරියාපන්නන්ති.