14. චුද්දසමවග්ගො

(139) 4. අරියරූපකථා

698. අරියරූපං මහාභූතානං උපාදායාති? ආමන්තා. අරියරූපං කුසලන්ති? ආමන්තා. මහාභූතා කුසලාති? න හෙවං වත්තබ්බෙ …පෙ… මහාභූතා අබ්‍යාකතාති? ආමන්තා. අරියරූපං අබ්‍යාකතන්ති? න හෙවං වත්තබ්බෙ…පෙ… අරියරූපං මහාභූතානං උපාදායාති? ආමන්තා. අරියරූපං අනාසවං අසංයොජනියං අගන්ථනියං අනොඝනියං අයොගනියං අනීවරණියං අපරාමට්ඨං අනුපාදානියං අසංකිලෙසියන්ති? ආමන්තා. මහාභූතා අනාසවා…පෙ… අසංකිලෙසියාති? න හෙවං වත්තබ්බෙ…පෙ… මහාභූතා සාසවා සංයොජනියා…පෙ… සංකිලෙසියාති? ආමන්තා. අරියරූපං සාසවං සංයොජනියං…පෙ… සංකිලෙසියන්ති? න හෙවං වත්තබ්බෙ…පෙ….

699. න වත්තබ්බං – ‘‘අරියරූපං මහාභූතානං උපාදායා’’ති? ආමන්තා. නනු වුත්තං භගවතා – ‘‘යං කිඤ්චි, භික්ඛවෙ, රූපං චත්තාරි මහාභූතානි චතුන්නඤ්ච මහාභූතානං උපාදායරූප’’න්ති [ම. නි. 1.347; අ. නි. 11.15]! අත්ථෙව සුත්තන්තොති? ආමන්තා. තෙන හි අරියරූපං මහාභූතානං උපාදායාති.

අරියරූපකථා නිට්ඨිතා.