13. තෙරසමවග්ගො

(133) 8. අසාතරාගකථා

674. අත්ථි අසාතරාගොති? ආමන්තා. දුක්ඛාභිනන්දිනො සත්තා, අත්ථි කෙචි දුක්ඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, දුක්ඛං අජ්ඣොසාය තිට්ඨන්තීති? න හෙවං වත්තබ්බෙ…පෙ… නනු සුඛාභිනන්දිනො සත්තා, අත්ථි කෙචි සුඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, සුඛං අජ්ඣොසාය තිට්ඨන්තීති? ආමන්තා. හඤ්චි සුඛාභිනන්දිනො සත්තා, අත්ථි කෙචි සුඛං පත්ථෙන්ති පිහෙන්ති එසන්ති ගවෙසන්ති පරියෙසන්ති, සුඛං අජ්ඣොසාය තිට්ඨන්ති, නො ච වත රෙ වත්තබ්බෙ – ‘‘අත්ථි අසාතරාගො’’ති.

අත්ථි අසාතරාගොති? ආමන්තා. දුක්ඛාය වෙදනාය රාගානුසයො අනුසෙති, සුඛාය වෙදනාය පටිඝානුසයො අනුසෙතීති? න හෙවං වත්තබ්බෙ…පෙ… නනු සුඛාය වෙදනාය රාගානුසයො අනුසෙති, දුක්ඛාය වෙදනාය පටිඝානුසයො අනුසෙතීති? ආමන්තා. හඤ්චි සුඛාය වෙදනාය රාගානුසයො අනුසෙති, දුක්ඛාය වෙදනාය පටිඝානුසයො අනුසෙති, නො ච වත රෙ වත්තබ්බෙ – ‘‘අත්ථි අසාතරාගො’’ති.

675. න වත්තබ්බං – ‘‘අත්ථි අසාතරාගො’’ති? ආමන්තා. නනු වුත්තං භගවතා – ‘‘සො එවං අනුරොධවිරොධං සමාපන්නො යං කිඤ්චි වෙදනං වෙදයති සුඛං වා දුක්ඛං වා අදුක්ඛමසුඛං වා, සො තං වෙදනං අභිනන්දති අභිවදති අජ්ඣොසාය තිට්ඨතී’’ති [ම. නි. 3.409 මහාතණ්හාසඞ්ඛයෙ]! අත්ථෙව සුත්තන්තොති? ආමන්තා. තෙන හි අත්ථි අසාතරාගොති.

අසාතරාගකථා නිට්ඨිතා.