13. තෙරසමවග්ගො
(127) 2. කුසලපටිලාභකථා
658. කප්පට්ඨො කුසලං චිත්තං න පටිලභෙය්‍යාති? ආමන්තා. කප්පට්ඨො දානං දදෙය්‍යාති? ආමන්තා. හඤ්චි කප්පට්ඨො දානං දදෙය්‍ය, නො ච වත රෙ වත්තබ්බෙ – ‘‘කප්පට්ඨො කුසලං චිත්තං න පටිලභෙය්‍යා’’ති.
කප්පට්ඨො කුසලං චිත්තං න පටිලභෙය්‍යාති? ආමන්තා. කප්පට්ඨො චීවරං දදෙය්‍ය…පෙ… පිණ්ඩපාතං දදෙය්‍ය…පෙ… සෙනාසනං දදෙය්‍ය…පෙ… ගිලානපච්චයභෙසජ්ජපරික්ඛාරං දදෙය්‍ය … ඛාදනීයං දදෙය්‍ය… භොජනීයං දදෙය්‍ය… පානීයං දදෙය්‍ය… චෙතියං වන්දෙය්‍ය… චෙතියෙ මාලං ආරොපෙය්‍ය… ගන්ධං ආරොපෙය්‍ය… විලෙපනං ආරොපෙය්‍ය…පෙ… චෙතියං අභිදක්ඛිණං [පදක්ඛිණං (පී.)] කරෙය්‍යාති? ආමන්තා. හඤ්චි කප්පට්ඨො චෙතියං අභිදක්ඛිණං කරෙය්‍ය, නො ච වත රෙ වත්තබ්බෙ – ‘‘කප්පට්ඨො කුසලං චිත්තං න පටිලභෙය්‍යා’’ති…පෙ….
659. කප්පට්ඨො කුසලං චිත්තං පටිලභෙය්‍යාති? ආමන්තා. තතො වුට්ඨානං කුසලං චිත්තං පටිලභෙය්‍යාති? ආමන්තා. රූපාවචරං…පෙ… අරූපාවචරං…පෙ… ලොකුත්තරං කුසලං චිත්තං පටිලභෙය්‍යාති? න හෙවං වත්තබ්බෙ…පෙ….
කුසලපටිලාභකථා නිට්ඨිතා.