11. එකාදසමවග්ගො

(115) 10. අනිච්චතාකථා

628. අනිච්චතා පරිනිප්ඵන්නාති? ආමන්තා. තාය අනිච්චතාය අනිච්චතා පරිනිප්ඵන්නාති? න හෙවං වත්තබ්බෙ…පෙ… තාය අනිච්චතාය අනිච්චතා පරිනිප්ඵන්නාති? ආමන්තා. තාය තායෙව නත්ථි දුක්ඛස්සන්තකිරියා, නත්ථි වට්ටුපච්ඡෙදො, නත්ථි අනුපාදාපරිනිබ්බානන්ති? න හෙවං වත්තබ්බෙ.

ජරා පරිනිප්ඵන්නාති? ආමන්තා. තාය ජරාය ජරා පරිනිප්ඵන්නාති? න හෙවං වත්තබ්බෙ…පෙ… තාය ජරාය ජරා පරිනිප්ඵන්නාති? ආමන්තා. තාය තායෙව නත්ථි දුක්ඛස්සන්තකිරියා, නත්ථි වට්ටුපච්ඡෙදො, නත්ථි අනුපාදාපරිනිබ්බානන්ති? න හෙවං වත්තබ්බෙ…පෙ….

මරණං පරිනිප්ඵන්නන්ති? ආමන්තා. තස්ස මරණස්ස මරණං පරිනිප්ඵන්නන්ති? න හෙවං වත්තබ්බෙ. තස්ස මරණස්ස මරණං පරිනිප්ඵන්නන්ති? ආමන්තා. තස්ස තස්සෙව නත්ථි දුක්ඛස්සන්තකිරියා, නත්ථි වට්ටුපච්ඡෙදො, නත්ථි අනුපාදාපරිනිබ්බානන්ති? න හෙවං වත්තබ්බෙ…පෙ….

629. රූපං පරිනිප්ඵන්නං, රූපස්ස අනිච්චතා අත්ථීති? ආමන්තා. අනිච්චතා පරිනිප්ඵන්නා, අනිච්චතාය අනිච්චතා අත්ථීති? න හෙවං වත්තබ්බෙ…පෙ… රූපං පරිනිප්ඵන්නං, රූපස්ස ජරා අත්ථීති? ආමන්තා. ජරා පරිනිප්ඵන්නා, ජරාය ජරා අත්ථීති? න හෙවං වත්තබ්බෙ…පෙ….

රූපං පරිනිප්ඵන්නං, රූපස්ස භෙදො අත්ථි, අන්තරධානං අත්ථීති? ආමන්තා. මරණං පරිනිප්ඵන්නං, මරණස්ස භෙදො අත්ථි, අන්තරධානං අත්ථීති? න හෙවං වත්තබ්බෙ…පෙ….

වෙදනා …පෙ… සඤ්ඤා… සඞ්ඛාරා…පෙ… විඤ්ඤාණං පරිනිප්ඵන්නං, විඤ්ඤාණස්ස අනිච්චතා අත්ථීති? ආමන්තා. අනිච්චතා පරිනිප්ඵන්නා, අනිච්චතාය අනිච්චතා අත්ථීති? න හෙවං වත්තබ්බෙ …පෙ… විඤ්ඤාණං පරිනිප්ඵන්නං, විඤ්ඤාණස්ස ජරා අත්ථීති? ආමන්තා. ජරා පරිනිප්ඵන්නා, ජරාය ජරා අත්ථීති? න හෙවං වත්තබ්බෙ…පෙ….

විඤ්ඤාණං පරිනිප්ඵන්නං, විඤ්ඤාණස්ස භෙදො අත්ථි, අන්තරධානං අත්ථීති? ආමන්තා. මරණං පරිනිප්ඵන්නං, මරණස්ස භෙදො අත්ථි, අන්තරධානං අත්ථීති? න හෙවං වත්තබ්බෙ…පෙ….

අනිච්චතාකථා නිට්ඨිතා.

එකාදසමවග්ගො.

තස්සුද්දානං –

අනුසයා අබ්‍යාකතා, අහෙතුකා, චිත්තවිප්පයුත්තා, අඤ්ඤාණෙ විගතෙ ඤාණී, ඤාණං චිත්තවිප්පයුත්තං, යත්ථ සද්දෙ [යත්ථ සද්දො (සී.), යථාසද්දං (?)] ඤාණං පවත්තති, ඉද්ධිබලෙන සමන්නාගතො කප්පං තිට්ඨෙය්‍ය, චිත්තසන්තති සමාධි, ධම්මට්ඨිතතා, අනිච්චතාති.