(106-108) 1-3. තිස්සොපි අනුසයකථා
605. අනුසයා අබ්‍යාකතාති? ආමන්තා. විපාකාබ්‍යාකතා කිරියාබ්‍යාකතා රූපං නිබ්බානං චක්ඛායතනං…පෙ… ඵොට්ඨබ්බායතනන්ති? න හෙවං වත්තබ්බෙ…පෙ….
කාමරාගානුසයො අබ්‍යාකතොති? ආමන්තා. කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණං අබ්‍යාකතන්ති? න හෙවං වත්තබ්බෙ…පෙ… කාමරාගො කාමරාගපරියුට්ඨානං…පෙ… කාමච්ඡන්දනීවරණං අකුසලන්ති? ආමන්තා. කාමරාගානුසයො අකුසලොති? න හෙවං වත්තබ්බෙ…පෙ….
පටිඝානුසයො අබ්‍යාකතොති? ආමන්තා. පටිඝං පටිඝපරියුට්ඨානං පටිඝසංයොජනං අබ්‍යාකතන්ති? න හෙවං වත්තබ්බෙ…පෙ… පටිඝං පටිඝපරියුට්ඨානං පටිඝසංයොජනං අකුසලන්ති? ආමන්තා. පටිඝානුසයො අකුසලොති? න හෙවං වත්තබ්බෙ…පෙ….
මානානුසයො අබ්‍යාකතොති? ආමන්තා. මානො මානපරියුට්ඨානං මානසංයොජනං අබ්‍යාකතන්ති? න හෙවං වත්තබ්බෙ …පෙ… මානො මානපරියුට්ඨානං මානසංයොජනං අකුසලන්ති? ආමන්තා. මානානුසයො අකුසලොති? න හෙවං වත්තබ්බෙ …පෙ….
දිට්ඨානුසයො අබ්‍යාකතොති? ආමන්තා. දිට්ඨි දිට්ඨොඝො දිට්ඨියොගො දිට්ඨිපරියුට්ඨානං දිට්ඨිසංයොජනං අබ්‍යාකතන්ති? න හෙවං වත්තබ්බෙ…පෙ… දිට්ඨි දිට්ඨොඝො දිට්ඨියොගො දිට්ඨිපරියුට්ඨානං දිට්ඨිසංයොජනං අකුසලන්ති? ආමන්තා. දිට්ඨානුසයො අකුසලොති? න හෙවං වත්තබ්බෙ…පෙ….
විචිකිච්ඡානුසයො අබ්‍යාකතොති? ආමන්තා. විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණං අබ්‍යාකතන්ති? න හෙවං වත්තබ්බෙ…පෙ… විචිකිච්ඡා විචිකිච්ඡාපරියුට්ඨානං විචිකිච්ඡාසංයොජනං විචිකිච්ඡානීවරණං අකුසලන්ති? ආමන්තා. විචිකිච්ඡානුසයො අකුසලොති? න හෙවං වත්තබ්බෙ…පෙ….
භවරාගානුසයො අබ්‍යාකතොති? ආමන්තා. භවරාගො භවරාගපරියුට්ඨානං භවරාගසංයොජනං අබ්‍යාකතන්ති? න හෙවං වත්තබ්බෙ…පෙ… භවරාගො භවරාගපරියුට්ඨානං භවරාගසංයොජනං අකුසලන්ති? ආමන්තා. භවරාගානුසයො අකුසලොති? න හෙවං වත්තබ්බෙ…පෙ….
අවිජ්ජානුසයො අබ්‍යාකතොති? ආමන්තා. අවිජ්ජා අවිජ්ජොඝො අවිජ්ජායොගො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණං අබ්‍යාකතන්ති? න හෙවං වත්තබ්බෙ…පෙ… අවිජ්ජා අවිජ්ජොඝො අවිජ්ජායොගො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණං අකුසලන්ති? ආමන්තා. අවිජ්ජානුසයො අකුසලොති? න හෙවං වත්තබ්බෙ…පෙ….
606. න වත්තබ්බං – ‘‘අනුසයා අබ්‍යාකතා’’ති? ආමන්තා. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සානුසයො’’ති වත්තබ්බොති? ආමන්තා. කුසලාකුසලා ධම්මා සම්මුඛීභාවං ආගච්ඡන්තීති? න හෙවං වත්තබ්බෙ…පෙ… තෙන හි අනුසයා අබ්‍යාකතාති. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සරාගො’’ති වත්තබ්බොති? ආමන්තා. කුසලාකුසලා ධම්මා සම්මුඛීභාවං ආගච්ඡන්තීති? න හෙවං වත්තබ්බෙ…පෙ… තෙන හි රාගො අබ්‍යාකතොති.
607. අනුසයා අහෙතුකාති? ආමන්තා. රූපං නිබ්බානං චක්ඛායතනං…පෙ… ඵොට්ඨබ්බායතනන්ති? න හෙවං වත්තබ්බෙ…පෙ….
කාමරාගානුසයො අහෙතුකොති? ආමන්තා. කාමරාගො කාමරාගපරියුට්ඨානං කාමරාගසංයොජනං කාමච්ඡන්දනීවරණං අහෙතුකන්ති? න හෙවං වත්තබ්බෙ…පෙ… කාමරාගො කාමරාගපරියුට්ඨානං…පෙ… කාමච්ඡන්දනීවරණං සහෙතුකන්ති? ආමන්තා. කාමරාගානුසයො සහෙතුකොති? න හෙවං වත්තබ්බෙ…පෙ… පටිඝානුසයො…පෙ… මානානුසයො… දිට්ඨානුසයො… විචිකිච්ඡානුසයො… භවරාගානුසයො… අවිජ්ජානුසයො අහෙතුකොති? ආමන්තා. අවිජ්ජා අවිජ්ජොඝො අවිජ්ජායොගො අවිජ්ජාපරියුට්ඨානං අවිජ්ජාසංයොජනං අවිජ්ජානීවරණං අහෙතුකන්ති? න හෙවං වත්තබ්බෙ …පෙ… අවිජ්ජා අවිජ්ජොඝො…පෙ… අවිජ්ජානීවරණං සහෙතුකන්ති? ආමන්තා. අවිජ්ජානුසයො සහෙතුකොති? න හෙවං වත්තබ්බෙ…පෙ….
608. න වත්තබ්බං – ‘‘අනුසයා අහෙතුකා’’ති? ආමන්තා. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සානුසයො’’ති වත්තබ්බොති? ආමන්තා. අනුසයා තෙන හෙතුනා සහෙතුකාති? න හෙවං වත්තබ්බෙ…පෙ… තෙන හි අනුසයා අහෙතුකාති. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සරාගො’’ති වත්තබ්බොති? ආමන්තා. රාගො තෙන හෙතුනා සහෙතුකොති? න හෙවං වත්තබ්බෙ…පෙ… තෙන හි රාගො අහෙතුකොති.
609. අනුසයා චිත්තවිප්පයුත්තාති? ආමන්තා. රූපං නිබ්බානං චක්ඛායතනං…පෙ… ඵොට්ඨබ්බායතනන්ති? න හෙවං වත්තබ්බෙ…පෙ….
කාමරාගානුසයො චිත්තවිප්පයුත්තොති? ආමන්තා. කාමරාගො කාමරාගපරියුට්ඨානං කාමරාගසංයොජනං කාමොඝො කාමයොගො කාමච්ඡන්දනීවරණං චිත්තවිප්පයුත්තන්ති? න හෙවං වත්තබ්බෙ…පෙ… කාමරාගො කාමරාගපරියුට්ඨානං…පෙ… කාමච්ඡන්දනීවරණං චිත්තසම්පයුත්තන්ති? ආමන්තා. කාමරාගානුසයො චිත්තසම්පයුත්තොති? න හෙවං වත්තබ්බෙ…පෙ….
610. කාමරාගානුසයො චිත්තවිප්පයුත්තොති? ආමන්තා. කතමක්ඛන්ධපරියාපන්නොති? සඞ්ඛාරක්ඛන්ධපරියාපන්නොති. සඞ්ඛාරක්ඛන්ධො චිත්තවිප්පයුත්තොති? න හෙවං වත්තබ්බෙ. සඞ්ඛාරක්ඛන්ධො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො චිත්තවිප්පයුත්තොති? න හෙවං වත්තබ්බෙ…පෙ….
කාමරාගානුසයො සඞ්ඛාරක්ඛන්ධපරියාපන්නො චිත්තවිප්පයුත්තොති? ආමන්තා. කාමරාගො සඞ්ඛාරක්ඛන්ධපරියාපන්නො චිත්තවිප්පයුත්තොති? න හෙවං වත්තබ්බෙ…පෙ… කාමරාගො සඞ්ඛාරක්ඛන්ධපරියාපන්නො චිත්තසම්පයුත්තොති? ආමන්තා. කාමරාගානුසයො සඞ්ඛාරක්ඛන්ධපරියාපන්නො චිත්තසම්පයුත්තොති? න හෙවං වත්තබ්බෙ…පෙ….
කාමරාගානුසයො සඞ්ඛාරක්ඛන්ධපරියාපන්නො චිත්තවිප්පයුත්තො, කාමරාගො සඞ්ඛාරක්ඛන්ධපරියාපන්නො චිත්තසම්පයුත්තොති? ආමන්තා. සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ…පෙ….
සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ…පෙ….
611. පටිඝානුසයො මානානුසයො දිට්ඨානුසයො විචිකිච්ඡානුසයො භවරාගානුසයො අවිජ්ජානුසයො චිත්තවිප්පයුත්තොති? ආමන්තා. අවිජ්ජා අවිජ්ජොඝො අවිජ්ජායොගො අවිජ්ජානීවරණං චිත්තවිප්පයුත්තන්ති? න හෙවං වත්තබ්බෙ…පෙ… අවිජ්ජා අවිජ්ජොඝො අවිජ්ජායොගො අවිජ්ජානීවරණං චිත්තසම්පයුත්තන්ති? ආමන්තා. අවිජ්ජානුසයො චිත්තසම්පයුත්තොති? න හෙවං වත්තබ්බෙ…පෙ….
612. අවිජ්ජානුසයො චිත්තවිප්පයුත්තොති? ආමන්තා. කතමක්ඛන්ධපරියාපන්නොති? සඞ්ඛාරක්ඛන්ධපරියාපන්නොති. සඞ්ඛාරක්ඛන්ධො චිත්තවිප්පයුත්තොති? න හෙවං වත්තබ්බෙ. සඞ්ඛාරක්ඛන්ධො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො චිත්තවිප්පයුත්තොති? න හෙවං වත්තබ්බෙ…පෙ….
අවිජ්ජානුසයො සඞ්ඛාරක්ඛන්ධපරියාපන්නො චිත්තවිප්පයුත්තොති? ආමන්තා. අවිජ්ජා සඞ්ඛාරක්ඛන්ධපරියාපන්නා චිත්තවිප්පයුත්තාති? න හෙවං වත්තබ්බෙ…පෙ… අවිජ්ජා සඞ්ඛාරක්ඛන්ධපරියාපන්නා චිත්තසම්පයුත්තාති? ආමන්තා. අවිජ්ජානුසයො සඞ්ඛාරක්ඛන්ධපරියාපන්නො චිත්තසම්පයුත්තොති? න හෙවං වත්තබ්බෙ…පෙ….
අවිජ්ජානුසයො සඞ්ඛාරක්ඛන්ධපරියාපන්නො චිත්තවිප්පයුත්තො, අවිජ්ජාසඞ්ඛාරක්ඛන්ධපරියාපන්නා චිත්තසම්පයුත්තාති? ආමන්තා. සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ.
සඞ්ඛාරක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? ආමන්තා. වෙදනාක්ඛන්ධො සඤ්ඤාක්ඛන්ධො එකදෙසො චිත්තසම්පයුත්තො එකදෙසො චිත්තවිප්පයුත්තොති? න හෙවං වත්තබ්බෙ…පෙ….
613. න වත්තබ්බං – ‘‘අනුසයා චිත්තවිප්පයුත්තා’’ති? ආමන්තා. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සානුසයො’’ති වත්තබ්බොති? ආමන්තා. අනුසයා තෙන චිත්තෙන සම්පයුත්තාති? න හෙවං වත්තබ්බෙ. තෙන හි අනුසයා චිත්තවිප්පයුත්තාති. පුථුජ්ජනො කුසලාබ්‍යාකතෙ චිත්තෙ වත්තමානෙ ‘‘සරාගො’’ති වත්තබ්බොති? ආමන්තා. රාගො තෙන චිත්තෙන සම්පයුත්තොති? න හෙවං වත්තබ්බෙ. තෙන හි රාගො චිත්තවිප්පයුත්තොති.
තිස්සොපි අනුසයකථා නිට්ඨිතා.